រាជធានីភ្នំពេញ ៖ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី២០ ធ្នូ កន្លងមកនេះ មានរៀបចំធ្វើសន្និសីទសារព័ត៌មានមួយ ស្ដីពីការប្រកួតកីឡាកងយោធពលខេមរភូមិន្ទប្រចាំឆ្នាំ២០១៦ ដោយបានការចូលរួមពីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងលោកឧត្តមសេនីយ៍មាស សុភារិទ្ធ ប្រធានក្រុមការងារប្រតិបត្តិកីឡាករកងយោធពលខេមរភូមិន្ទ ។
លោក មាស សុភារិទ្ធ បានមានប្រសាសន៍ថា ការប្រកួតកីឡាកងយោធពលខេមរភូមិន្ទនេះត្រូវបានរៀបចំធ្វើឡើងតាំងពីឆ្នាំ១៩៩៦មកម៉្លេះ ដែលកាលណោះគេធ្វើឡើងនៅសាលានាយទាហានសកម្មត្មាតពង ។ ការប្រកួតនេះមានរយៈពេល៣ថ្ងៃចាប់ពីថ្ងៃទី៦ដល់ថ្ងៃទី៨ មករា ដើម្បីអបអរទិវា៧ មករា ឆ្នាំ២០១៧ផង និងដើម្បីគោរពវិញ្ញានក្ខន្ធដល់បងៗ និងពូៗកងទ័ពដែលបានពលីជីវិតនៅក្នុងសមរភូមិដើម្បីបុព្វហេតុប្រទេសជាតិមាតុភូមិ ។
លោកឧត្តមសេនីយ៍បានបន្តថា មូលហេតុដែលនាំឱ្យលើកយកការប្រកួតកីឡាកងទ័ពមកធ្វើនៅទីក្រុងរណបកោះពេជ្របែបនេះ គឺដោយសារតែមានការណែនាំពីលោកឧត្តមសេនីយ៍ ហ៊ុន ម៉ាណែត ក្នុងគោលបំណងឱ្យកងទ័ព និងប្រជាជនកាន់តែបង្កើនភាពស្និទ្ធស្នាលជាមួយគ្នា ព្រោះការប្រកួតនេះក៏មានមហាជនចូលរួមដែរ ។
ការប្រកួតនេះត្រូវបានបែងចែកជា២ប្រភេទ គឺប្រភេទទី១មាន២០ក្រុមក្នុងមួយក្រុមមានគ្នា១៥នាក់ ក្នុងនោះកងទ័ពមាន១១ក្រុម និងមហាជនមាន៩ក្រុម ។ ប្រភេទទី២ មាន១០ក្រុម ដែលជាក្រុមមហាជនសុទ្ធសាធ ។ ចំណែកវិញ្ញាសាប្រកួតសម្រាប់ប្រភេទទី១ មានរត់កម្ម៉ង់ដូសម្រាប់កងទ័ពចម្ងាយ៤គីឡូម៉ែត្រ សែងប្រង់ការទម្ងន់៥០គីឡូក្រាមចម្ងាយ១,៥គីឡូម៉ែត្រ និងរត់ឆ្លងឧបសគ្គ ។ ប្រភេទទី២មានរត់កម្ម៉ង់ដូចម្ងាយ៣គីឡូម៉ែត្រ សែងប្រង់ការទម្ងន់៥០គីឡូក្រាមចម្ងាយ១គីឡូម៉ែត្រ និងរត់ឆ្លងឧបសគ្គ ។ នៅក្នុងរយៈពេល៣ថ្ងៃនៃការប្រកួតកីឡាកងទ័ពនេះ ក៏មានស្តង់ពិព័រណ៍លក់ផលិតផលខ្មែរយើង ការតាំងបង្ហាញនូវសម្ភារយោធាមានដូចជារថយន្តកងទ័ពប្រើប្រាស់នៅក្នុងសមរភូមិ និងរថពាសដែកផងដែរ ។ ក្រៅពីនោះក៏មានស្តង់លក់ផលិតផលខ្មែរយើងសុទ្ធរាប់រយស្តង់ទៀតផង ដែលនឹងញ៉ាំងឱ្យកម្មវិធីប្រកួតកីឡាកងទ័ពឆ្នាំ២០១៧នេះ មានភាពអធិកអធមក្រៃលែង ។
លោក វ៉ាត់ ចំរើន បានមានប្រសាសន៍ថា ការប្រកួតកីឡាកងទ័ពនេះ ខាងអូឡាំពិកគ្រាន់តែចូលរួមសហការគាំទ្រប៉ុណ្ណោះ ចំពោះបញ្ហាបច្ចេកទេសវិញ គឺខាងកងទ័ពគេជាអ្នករៀបចំ ។ ទោះបីជាយ៉ាងណា រវាងគណៈកម្មាធិការជាតិអូឡាំពិក និងកងយោធពលខេមរភូមិន្ទត្រូវតែមានកិច្ចសហការជាមួយគ្នា ដោយសារកន្លងមកយើងបានចុះអនុស្សរណៈជាមួយគ្នារួចហើយ ៕
ចែករំលែកព័តមាននេះ