រាជធានីភ្នំពេញ ៖ បាល់ទាត់ពានរង្វាន់ Soccer League 2016 ចាប់ផ្ដើមបើកការប្រកួតជាផ្លូវការហើយកាលពីថ្ងៃទី២០ ធ្នូ កន្លងមកនេះ នៅទីលានពហុកីឡដ្ឋានជាតិ ដោយមានការអញ្ជើញចូលរួមពីលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោក ស សុខា ប្រធានគណៈកម្មការប្រតិបត្តិរៀបចំការប្រកួត Soccer League 2016 ។ ក្នុងឱកាសនោះក៏មានពិធីដង្ហែក្បួនក្រុមកីឡាបាល់ទាត់ទាំង៦០ចូលទៅកាន់ទីលានប្រកួតទៀតផង ។
លោក ហ៊ុន ម៉ានី មានប្រសាសន៍ថា ការប្រកួតបាល់ទាត់ដណ្ដើមពានជើងឯកSoccer League2016នេះគឺជាលើកទី៤ហើយនិងធ្វើឡើងក្នុងស្មារតីសាមគ្គីគ្នា លើកស្ទួយវិស័យកីឡាបាល់ទាត់ជាតិរវាងយុវជន និងយុវជន ដោយមិនរើសអើងភេទ ឋានៈ ពណ៌សម្បុរ និងនិន្នាការនយោបាយឡើយ និងដើម្បីមហាគ្រួសារកីឡាយុវជនក្នុងស្មារតីអនាគតកីឡាបាល់ទាត់ក្នុងព្រះរាជាណាចក្រកម្ពុជា ។ ជាងនេះទៅទៀត ការប្រកួតនេះគឺជាការជំរុញ និងលើកទឹកចិត្តដល់យុវជនឱ្យបញ្ចេញទេពកោសល្យលេងកីឡា ជាជាងការចំណាយពេលឥតប្រយោជន៍ទៅសេពគ្រឿងញៀន លេងល្បែងស៊ីសង និងប្រព្រឹត្តអំពើអបាយមុខផ្សេងៗ ដែលសង្គមកំពុងតែស្អប់ខ្ពើម។
លោកបន្តថា ព្រឹត្តិការណ៍ប្រកួតបាល់ទាត់ដណ្ដើមពានជើងឯក Soccer League 2016 កាន់តែមានភាពល្អប្រសើរឡើងពីមួយឆ្នាំទៅមួយឆ្នាំ និងមានក្រុមចូលរួមប្រកួតកាន់តែច្រើនឡើង ជាក់ស្ដែងឆ្នាំនេះមានក្រុមចូលរួមប្រកួតរហូតដល់ទៅ៦០ ។ ដូច្នេះ ដើម្បីឱ្យការប្រកួតនេះទទួលបានជោគជ័យ និងមានប្រសិទ្ធភាពខ្ពស់ គ្រប់ក្រុមទាំងអស់ត្រូវរក្សានូវក្រមសីលធម៌ និងភាពអត់ធ្មត់ឱ្យបានខ្ពស់បំផុតដើម្បីរក្សាសាមគ្គីភាពផ្ទៃក្នុង និងត្រូវគោរពឱ្យបាននូវក្បួនច្បាប់វិន័យ បទបញ្ជាផ្ទៃក្នុង និងត្រូវទទួលយកការសម្រេចចិត្តរបស់គណៈកម្មការអាជ្ញាកណ្ដាលឱ្យខាងតែបាន ។
លោក ថោង ខុន មានប្រសាសន៍ថា កីឡាដើម្បីទាំងអស់គ្នា ហើយក៏ជាការផ្ដល់ឱកាសដល់យុវជនឱ្យស្គាល់ពីតម្លៃកីឡាដែរ ។ មិនតែប៉ុណ្ណោះការលេងកីឡា ក្រៅពីទទួលបាននូវភាពសប្បាយរីករាយ ក៏បានផ្ដល់នូវសុខភាពល្អ សាមគ្គីភាពសម្រាប់យុវជន ក្ដីសង្ឃឹមរបស់ប្រទេសជាតិយើង ។ ដូច្នេះយើងត្រូវរួមគ្នាធ្វើយ៉ាងណាឱ្យការប្រកួតកីឡាបាល់ទាត់ Soccer League កាន់តែមានប្រជាប្រិយភាពដើម្បីឈានទៅរកការប្រកួតកីឡាស៊ីហ្គេមលើកទី៣២ដែលកម្ពុជាទទួលធ្វើជាម្ចាស់ផ្ទះលើកដំបូងនៅក្នុងឆ្នាំ២០២៣ ខាងមុខ ។
សូមបញ្ជាក់ថា បាល់ទាត់ពានរង្វាន់Soccer League 2016នេះចាប់ផ្ដើមធ្វើពីថ្ងៃទី២០ធ្នូឆ្នាំ២០១៦ រហូតដល់ថ្ងៃទី៨ មករា ឆ្នាំ២០១៧៕
ចែករំលែកព័តមាននេះ