ប្រទេសវ៉េណេស៊ុយអេឡា ៖ វ៉េណេស៊ុយអេឡា កាលពីថ្ងៃសៅរ៍បានបន្តរយៈពេលប្រើប្រាស់រូបិយប័ណ្ណ១០០ Bolivar របស់ខ្លួន រហូតដល់ថ្ងៃទី២ មករា ក្រោយពីការសម្រេចចិត្តឈប់ប្រើប្រាស់ក្រដាសប្រាក់នេះ
ប្រទេសវ៉េណេស៊ុយអេឡា ៖ វ៉េណេស៊ុយអេឡា កាលពីថ្ងៃសៅរ៍បានបន្តរយៈពេលប្រើប្រាស់រូបិយប័ណ្ណ១០០ Bolivar របស់ខ្លួន រហូតដល់ថ្ងៃទី២ មករា ក្រោយពីការសម្រេចចិត្តឈប់ប្រើប្រាស់ក្រដាសប្រាក់នេះ ដោយធ្វើឲ្យប្រទេសគ្មានសាច់ប្រាក់ បង្កឱ្យមានការតវ៉ា និងអំពើលួចប្លន់ ។
លោកប្រធានាធិបតី Nicolas Maduro ថ្លែងថា ការសម្រេចចិត្តដាក់រូបិយប័ណ្ណនេះឲ្យប្រជាជនប្រើឡើងវិញ គឺបន្ទាប់ពីរូបិយប័ណ្ណជំនួសដែលមានតម្លៃខ្ពស់ជាងមិនទាន់អាចប្រើបាន ដោយសារតែយន្តហោះដឹកជញ្ជូនរូបិយប័ណ្ណថ្មី៣គ្រឿងរងការបំផ្លាញ ។ ប៉ុន្តែលោកមិនបានប្រាប់ពីព័ត៌មានលម្អិតនៃការបំផ្លាញទេ ។ លោកថ្លែងថា ៖ « ពួកយើងត្រូវរង់ចាំការដឹកជញ្ជូនក្រដាសប្រាក់ថ្មី រួមទាំងក្រដាសប្រាក់៥០០ Bolivar ផងដែរ » ។
វ៉េណេស៊ុយអេឡា ត្រូវបានញាំញីដោយអតិផរណាខ្ពស់បំផុតរបស់ពិភពលោក ហើយលោក Maduro បានប្រកាសដ៏គួរឱ្យភ្ញាក់ផ្អើលថា ក្រដាសប្រាក់១០០ Bolivar នឹងត្រូវជំនួសកាលពីសប្តាហ៍មុន ។ វាជាក្រដាសប្រាក់ធំបំផុតក្នុងប្រទេសនេះ ប៉ុន្តែតម្លៃរបស់វាធៀបនឹងប្រាក់ដុល្លារអាមេរិក បានធ្លាក់ចុះ២សេន គឺធ្លាក់ចុះពី១០សេននៅដើមឆ្នាំ ។
ពេញ១សប្តាហ៍ ប្រជាពលរដ្ឋវ៉េណេស៊ុយអេឡាបានតម្រង់ជួររង់ចាំយ៉ាងយូរដើម្បីដាក់ក្រដាសប្រាក់១០០ Bolivar លែងមានតម្លៃរបស់ពួកគេទៅក្នុងធនាគារ ។
នៅពេលក្រដាសប្រាក់នេះលែងមានចរាចរកាលពីថ្ងៃសុក្រ ហើយក្រដាសប្រាក់ជំនួសមិនទាន់បញ្ជូនមកដល់ធនាគារ ឬម៉ាស៊ីន ATM ប្រជាពលរដ្ឋត្រូវបង្ខំចិត្តពឹងផ្អែកលើកាតឥណទាន ការផ្ទេរលុយតាមធនាគារ ឬព្យាយាមទិញរបស់របរជាមួយក្រដាសប្រាក់ដែលមានតម្លៃតូច និងលំបាករក ។
អាជ្ញាធរនិយាយថា មានការតវ៉ា និងអំពើលួចប្លន់កាលពីថ្ងៃសុក្រ និងព្រឹកថ្ងៃសៅរ៍ ក្នុងទីក្រុងយ៉ាងហោចណាស់៦ រួមទាំងទីក្រុង Maracaibo ជាកន្លែងដែលប៉ូលិសចុះបង្ក្រាបការលួចប្លន់នៅជិតធនាគារមួយ និងភាគខាងកើតរដ្ឋ Bolivar ដែលក្រុមមនុស្សបានបណ្តេញអាជីវកម្មជាច្រើន ។
កាលពីថ្ងៃសៅរ៍ អ្នកគាំទ្ររដ្ឋាភិបាលរាប់រយនាក់ និងសមាជិកគណបក្សកាន់អំណាចបានពាក់អាវក្រហមដើរក្បួននៅក្នុងទីក្រុង Caracas ដើម្បីគាំទ្រលោក Maduro និងតវ៉ាសង្គ្រាមសេដ្ឋកិច្ច ប្រឆាំងនឹងប្រទេសវ៉េណេស៊ុយអេឡា ។
ក្រោយពីការដាក់ក្រដាសប្រាក់នេះឲ្យចរាចរលើទីផ្សារវិញ លោក Maduro ថ្លែងថា ៖ « លោកនឹងបន្តបិទព្រំដែនជាមួយប្រទេសកូឡុំប៊ី និងប្រេស៊ីល រហូតដល់ថ្ងៃទី២ មករា ក្នុងគោលបំណងទប់ស្កាត់ពួកម៉ាហ្វីយ៉ា ដែលប្រើប្រាស់ក្រដាសប្រាក់ Bolivar និងដឹកនាំអ្នករិះគន់ចំអកដល់វ៉េណេស៊ុយអេឡា » ។
ភាពចលាចលរូបិយប័ណ្ណកើតឡើង ខណៈប្រទេសដែលសម្បូរប្រេងនេះកំពុងប្រឈមនឹងការធ្លាក់ចុះនៃសេដ្ឋកិច្ច ៕
ចែករំលែកព័តមាននេះ