វៀតណាម ៖ មុនពេលវិលនិវត្តន៍មកកាន់ប្រទេសកម្ពុជាវិញនាល្ងាចថ្ងៃទី២១ ធ្នូនេះ សម្តេចអគ្គមហាសេនាបតីតេជោ ហ៊ុន សែន បាននិងកំពុងបន្តដំណើរទៅទីក្រុងហូជីមិញ ដើម្បីបំពេញទស្សនកិច្ចផ្លូវការនិងបិទបញ្ចប់ដំណើរទស្សនកិច្ចរយៈពេលពីរថ្ងៃនៅទីនោះ ។
កាលពីថ្ងៃទី២០ ធ្នូ សម្តេចតេជោនាយករដ្ឋមន្រ្តី បានជួបចរចាទ្វេភាគីជាមួយលោកនាយករដ្ឋមន្រ្តីវៀតណាម ង្វៀន ស៊ុនហ្វុក និងអញ្ជើញចូលរួមជាអធិបតីនៅក្នុងពិធីចុះហត្ថលេខាលើឯកសារសំខាន់ៗចំនួន៣រួមមាន៖ ១-សន្ឋិសញ្ញាស្តីពីការផ្ទេរទណ្ឌិត ២-សន្ឋិសញ្ញាស្តីពីជំនួយទៅវិញទៅមក ផ្នែកច្បាប់លើវិស័យព្រហ្មទណ្ឌ ចុះហត្ថលេខាដោយ លោក អង្គ វង្សវឌ្ឍនា រដ្ឋមន្រ្តីក្រសួងយុត្តិធម៌ និង ទី៣-កិច្ចព្រមព្រៀងស្តីពីកិច្ចសហប្រតិបត្តិការរវាងក្រសួងធម្មការនិងសាសនា និងគណៈកម្មាធិការជនជាតិនៃប្រទេសវៀតណាម ដែលចុះហត្ថលេខាដោយ លោក ប្រាក់ សុខុន រដ្ឋមន្រ្តីក្រសួងការបរទេស ។
មេដឹកនំាប្រទេសទាំងពីរបានប្តេជ្ញាពង្រឹងនូវកិច្ចសហប្រតិបត្តិការអោយបានល្អដើម្បីថែរក្សានូវសុខសន្តិភាព និងពង្រឹងទំហំពាណិជ្ជកម្មនៃប្រទេសទាំងពីរអោយកើនឡើង ៥ពាន់លានដុល្លា ដើម្បីប្រទេសជាតិកាន់តែរីកចម្រើនទៅមុខ។
នៅក្នុងដំណើរទស្សនកិច្ចនៅថ្ងៃដំបូងលើទឹកដីវៀតណាមកាលពីថ្ងៃម្សិលមិញផងដែរ សម្តេចអគ្គមហាសេនាបតីតេជោ ហ៊ុន សែន ក៍បានជួបពិភាក្សាការងារជាមួយលោក ង្វៀង ហ៊្វូជុង អគ្គលេខាបក្សកុម្មុយនីស្តវៀតណាម , លោក ត្រាន់ដាយ ក្វាង ប្រធានរដ្ឋវៀតណាម និងលោកស្រី ង្វៀន ធី គឹមងិន ប្រធានរដ្ឋសភា ដើម្បីរឹតចំណងមិត្តភាពសហប្រតិបត្តិការ ដែលនាំមកនូវផលប្រយោជន៍ និងការរីកចម្រើនសម្រាប់ប្រជាជាតិនៃប្រទេសទាំងពីរ ៕
ចែករំលែកព័តមាននេះ