រាជធានីភ្នំពេញ ៖ គ្រាន់តែវត្តមានមកដល់ប្រទេសកម្ពុជារបស់កីឡាករល្បីឈ្មោះលំដាប់ពិភពលោក មេនី ប៉ាក់គីអៅ ក្នុងដំណើរទស្សនកិច្ចរបស់ប្រធានាធិបតីហ្វ៊ីលីពីន គេកត់សម្គាល់ថា ប្រទេសកម្ពុជាបានក្លាយជាចំណាប់អារម្មណ៍របស់ប្រទេសក្នុងតំបន់ និងពិភពលោកបាត់ទៅហើយ កាលពីពាក់កណ្ដាលខែធ្នូកន្លងទៅ ។ អ៊ីចឹងហើយទើបការប្រកាសចុះមកថតស្ពតរបស់ប៉ាក់គីអៅ ក្នុងពេលខាងមុខ ដោយលោកនឹងនិយាយភាសាខ្មែរផងដើម្បីផ្សព្វផ្សាយដល់សាធារណជន និងអន្តរជាតិ គឺពិតជាធ្វើឱ្យប្រទេសកម្ពុជាក្លាយជាមុខសញ្ញាកាន់តែប្រសើរក្នុងក្រសែភ្នែកអន្តរជាតិ ជាពិសេសលើវិស័យកីឡាតែម្ដង ។
ក្នុងដំណើរទទួលស្វាគមន៍ប្រធានាធិបតីហ្វ៊ីលីពីនដែលមកទស្សនកិច្ចនៅកម្ពុជាកាលពីថ្ងៃទី១៣និង១៤ ធ្នូ មុននោះ កីឡាករប៉ាក់គីអៅ ដែលអមដំណើរមកជាមួយត្រូវគេឃើញក្លាយជាតួអង្គចាប់អារម្មណ៍នាំមុខគេពីសំណាក់មហាជនខ្មែរ និងអន្តរជាតិ ជាងវត្តមានរបស់លោកប្រធានាធិបតីហ្វ៊ីលីពីននោះផង ។ ស្ទើរតែគ្រប់ការបង្ហាញខ្លួនរបស់លោក កីឡាករប៉ាក់គីអៅ ត្រូវគេប្រមាញ់ដោយកាមេរ៉ាតូចធំ និងមានការចោមរោមគាំទ្រយ៉ាងណែនណាន់តាន់តាប់ ជាពិសេសក្នុងពេលដែលលោកបង្ហាញខ្លួនសំណេះសំណាលនឹងកីឡាករកម្ពុជា និងមន្ត្រីជាន់ខ្ពស់ក្នុងសហព័ន្ធអូឡាំពិកកម្ពុជា ។ អ្នកគាំទ្រក្រៅពីឃើញប្រជ្រៀតគ្នាចូលចាប់ដៃលោក ម្នាក់ៗក៏សុំថតរូបស្ទើរតែពិបាកឱ្យលោកបង្ហាញខ្លួនទៅហើយដោយសារតែលោកត្រូវបានគេស្គាល់ថា ជាកីឡាករល្បីឈ្មោះលំដាប់ពិភពលោក ។ អ្នកគាំទ្រជាជនបរទេសជាពិសេសគឺជនជាតិហ្វ៊ីលីពីន មានការផ្ដល់ដំណឹងថាចំណាយលុយទិញសំបុត្រមកស្កាត់ជួបកីឡាកររូបនេះដល់ប្រទេសកម្ពុជាតែម្ដង ទើបធ្វើឱ្យប្រទេសកម្ពុជាមានការចាប់អារម្មណ៍យ៉ាងសម្បើមក្នុងពេលកីឡាករប៉ាក់គីអៅ ជាន់ដីកម្ពុជា ។ កីឡាកររូបនេះបានអះអាងថា លោកនឹងចុះមកជួយកម្ពុជាក្នុងដំណើរចុះមកជាលើកទី២ ដោយក្រៅពីជួយបង្វឹកកីឡាករកម្ពុជាឱ្យមានជំនាញប្រដាល់អាជីព ក៏នឹងស្ម័គ្រចិត្តជួយថតស្ពតមួយឱ្យកម្ពុជានិយាយពីគ្រឿងញៀន និងបញ្ហាចរាចរណ៍ ដោយលោកនឹងនិយាយភាសាខ្មែរនៅក្នុងស្ពតនោះផងដែរ ។ ទោះមិនទាន់បញ្ជាក់ថា ពេលណាឱ្យច្បាស់ថាលោកនឹងចុះមកកម្ពុជា តែកីឡាករប៉ាក់គីអៅ បានអះអាងថា លោកនឹងរៀបចំពេលវេលាចុះមកឆាប់ៗ ដើម្បីបំពេញពាក្យសន្យាកុំឱ្យប្រទេសកម្ពុជាខកចិត្ត ។
នៅលើគណនីផ្លូវការរបស់សម្ដេចតេជោ ហ៊ុន សែន នាយករដ្ឋមន្ត្រី មានការសាទរយ៉ាងខ្លាំងបន្ទាប់ពីសម្ដេចបានប្រកាសដំណឹងនេះជាសាធារណៈ ។ ម្នាក់ៗបានអះអាងថា បើប៉ាក់គីអៅ ជួយបង្ហាត់ដល់កីឡាករខ្មែរ ហើយថតស្ពតអប់រំមួយឱ្យប្រទេសកម្ពុជាដោយមានទាំងការនិយាយភាសាខ្មែរ នោះមិនខុសពីជួយឱ្យពិភពលោកចាប់អារម្មណ៍ចំពោះវិស័យទេសចរណ៍ និងកីឡារបស់ប្រទេសកម្ពុជានោះទេ ដោយសារតែអ្នកខ្លះមិនទាន់ស្គាល់ច្បាស់ពីកម្ពុជានៅឡើយទេ ប៉ុន្តែក្រោយការជ្រោមជ្រែងរបស់កីឡាករប៉ាក់គីអៅ គ្មានអ្នកមិនទទួលស្គាល់វិស័យកីឡានៅកម្ពុជា និងមិនចាប់អារម្មណ៍ចំពោះកម្ពុជានោះទេ ដោយសារតែលោកគឺជាម្ចាស់ខ្សែក្រវាត់ពិភពលោកនាពេលបច្ចុប្បន្ន ។
កីឡាករប៉ាក់គីអៅ មុនការចាកចេញបានអះអាងថា លោកនឹងរៀនភាសាខ្មែរមុនពេលថតស្ពត ហើយលោកក៏ជឿជាក់ថា ការបង្ហាញខ្លួនរបស់លោកជួយដល់កម្ពុជាក្នុងពេលខាងមុខក៏នឹងជួយឱ្យកម្ពុជាមានការចាប់អារម្មណ៍ច្រើនឡើងផងដែរ។ លោកថា ខ្លួននឹងរួមចំណែកជួយផ្សព្វផ្សាយពីកម្ពុជា និងវិស័យកីឡានៅកម្ពុជា ដោយសារតែលោកក៏ចង់ឃើញវិស័យប្រដាល់របស់កម្ពុជាមានការរីកចម្រើនដែរ ។ លោកថា កម្ពុជា ជាប្រទេសដែលលោកចង់រួមចំណែកផ្សព្វផ្សាយ ទើបលោកសម្រេចចុះមកជាលើកទី២ ក្នុងពេលខាងមុខ ដើម្បីជួយផ្សព្វផ្សាយពីវិស័យកីឡានៅកម្ពុជាផង និងជួយថតស្ពតនិយាយជាភាសាខ្មែរផង ដើម្បីឱ្យពិភពលោកបានស្គាល់កម្ពុជា ។ លោកថា បើការចុះជួយក្នុងពេលខាងមុខមានភាពរលូន នោះលោកនឹងដាក់គម្រោងចុះមកកម្ពុជាក្នុងពេលបន្តបន្ទាប់ទៀត ដោយលោកមិនមានកំណត់ថានឹងចុះមកកម្ពុជាតែម្ដង ឬជួយវិស័យកីឡានៅកម្ពុជាតែម្ដងហើយផ្អាករហូតនោះទេ ។
គួរបញ្ជាក់ផងដែរថា ប្រទេសកម្ពុជាត្រូវបានក្រសែភ្នែកអន្តរជាតិផ្ដោតការចាប់អារម្មណ៍ជាបន្តបន្ទាប់ បន្ទាប់ពីមានវត្តមានជួយផ្សព្វផ្សាយរបស់បុគ្គលល្បីៗដូចជាលោកឈិន ឡុង ដែលជាតារាភាពយន្តហូលីវូដជាដើម ។ អីុចឹងហើយ ទើបគម្រោងចុះជួយរបស់កីឡាករប៉ាក់គីអៅ នឹងរឹតតែធ្វើឱ្យកម្ពុជាមិនត្រឹមតែចំណេញទីផ្សារទេសចរណ៍ប៉ុណ្ណោះ តែក៏នឹងមានការចាប់អារម្មណ៍លើវិស័យកីឡាផងដែរ ៕
ចែករំលែកព័តមាននេះ