ប្រទេសចិន ៖ អនុរដ្ឋមន្ត្រីក្រសួងហិរញ្ញវត្ថុចិន បានថ្លែងកាលពីថ្ងៃអាទិត្យកន្លងមកថា ប្រទេសចិនសង្ឃឹមថា នឹងគ្មានសង្គ្រាមពាណិជ្ជកម្មជាមួយសហរដ្ឋអាមេរិកទេ ។ ប៉ុន្តែពួកគេនឹងធ្វើសកម្មភាពត្រឹមត្រូវដើម្បីទប់ទល់វិញ
ប្រទេសចិន ៖ អនុរដ្ឋមន្ត្រីក្រសួងហិរញ្ញវត្ថុចិន បានថ្លែងកាលពីថ្ងៃអាទិត្យកន្លងមកថា ប្រទេសចិនសង្ឃឹមថា នឹងគ្មានសង្គ្រាមពាណិជ្ជកម្មជាមួយសហរដ្ឋអាមេរិកទេ ។ ប៉ុន្តែពួកគេនឹងធ្វើសកម្មភាពត្រឹមត្រូវដើម្បីទប់ទល់វិញ ប្រសិនបើវាកើតឡើងពិតមែន ។
លោក Zhu Guangyao ឱ្យដឹងថា ប្រទេសទាំងពីរគួរតែបោះបង់គំនិតឈ្នះចាញ់ ហើយងាកមករកការបង្កើនកិច្ចសហប្រតិបត្តិការសេដ្ឋកិច្ច និងពាណិជ្ជកម្មវិញ ។ លោកថ្លែងថា ៖ « ប្រទេសចិននឹងធ្វើសកម្មភាពត្រឹមត្រូវដើម្បីទប់ទល់នឹងសង្គ្រាមពាណិជ្ជកម្មជាមួយសហរដ្ឋអាមេរិក តាមរយៈទំនាក់ទំនងទ្វេភាគី និងអង្គការពាណិជ្ជកម្មពិភពលោក តែពួកយើងមិនសង្ឃឹមថា វានឹងកើតឡើងទេ » ។
ប្រទេសចិននឹងមិនដកថយក្នុងការការពារអត្ថប្រយោជន៍សំខាន់ៗរបស់ខ្លួនទេ ដូចជា បូរណភាពទឹកដី អធិបតេយ្យភាព និងសុវត្ថិភាពនៃប្រព័ន្ធនយោបាយ ។
លោកអនុរដ្ឋមន្ត្រីបានថ្លែងដូចនេះ បន្ទាប់ពីទំនាក់ទំនងរវាងប្រទេសចិន និងអាមេរិកកាន់តែធ្លាក់ចុះតាំងពីការបោះឆ្នោតក្នុងសហរដ្ឋអាមេរិកកន្លងមក ។
លោក Trump សន្យាថា នឹងចោទប្រទេសចិនជាអ្នកទម្លាក់តម្លៃប្រាក់នៅក្នុងថ្ងៃដំបូង ខណៈលោកឡើងកាន់តំណែង ព្រមទាំងដាក់ពន្ធ៤៥% លើផលិតផលនាំចូលពីចិន ។
ក្នុងខែនេះ ប្រទេសចិនក៏បានតវ៉ាយ៉ាងខ្លាំងផងដែរ បន្ទាប់ពីលោក Trump និយាយទូរស័ព្ទជាមួយលោកប្រធានាធិបតីតៃវ៉ាន់ Tsai Ing-wen ។
លើសពីនេះ កាលពីថ្ងៃសុក្រ ចិនចាប់បានឧបករណ៍ Drone មុជទឹករបស់អាមេរិកក្នុងសមុទ្រចិនខាងត្បូង ដែលធ្វើឲ្យមានការបះបោរកាន់តែខ្លាំងឡើង ។
កាសែតរដ្ឋមួយរបស់ចិនបាននិយាយកាលពីថ្ងៃសៅរ៍ថា ប្រទេសចិនសង្ឃឹមថា នឹងមានការដោះស្រាយដោយរលូនទាក់ទិននឹងការចាប់បានឧបករណ៍នេះ ។
មន្ត្រីអាមេរិកឱ្យដឹងថា ការកាត់បន្ថយចំនួនវិស័យដែលត្រូវបានហាមឃាត់ក្នុងការវិនិយោគពីបរទេសនោះ គឺសំខាន់ណាស់សម្រាប់ការចរចា ៕
ចែករំលែកព័តមាននេះ