ខេត្តពោធិ៍សាត់ ៖ គិតមកត្រឹមព្រឹកម៉ោង១០ថ្ងៃទី១៥ ខែកក្កដានេះ មិនទាន់រកឃើញស.ពស្ត្រីជាប្រពន្ធមានផ្ទៃពោះ៧ខែនៅឡើយទេ ករណីទឹកកួចមួយគ្រួសារនៅខេត្តពោធិ៍សាត់ ខណៈកងកម្លាំងសមត្ថកិច្ចអាជ្ញាធរមូលដ្ឋានកំពុងស្វែងរក។
លោកអធិការនគរបាលស្រុកវាលវែង បានបញ្ជាក់ឱ្យដឹងនៅព្រឹកថ្ងៃទី១៥ នេះថា កងកម្លាំងសមត្ថកិច្ចអាជ្ញាធរមូលដ្ឋានកំពុងស្វែងរកស.ពស្ត្រីជាបន្តទៀត ។
សូមបញ្ជាក់ថា ជនរងគ្រោះមួយគ្រួសារ រួមមានប្ដី ប្រពន្ធ មានផ្ទៃពោះ៧ខែ និងកូនស្រីអាយុ៣ឆ្នាំម្នាក់ ត្រូវបានទឹកហូរកួចបោកយកទៅបាត់ជាមួយនឹងម៉ូតូ ដោយគ្មាននរណាម្នាក់បានឃើញ ខណៈពេលធ្វើដំណើរកាត់ទឹកដែលកំពុងតែហូរខ្លាំង នៅលើផ្លូវរហូតដល់ ៣ថ្ងៃទើបសាច់ញាតិតាមរកដឹងថាស្លា.ប់ ។ ករណីនេះភ្ញាក់ផ្អើលឡើងនៅវេលាម៉ោង១២ថ្ងៃត្រង់ ថ្ងៃទី១៤ ខែកក្កដានេះ ត្រង់ចំណុចស្ទឹងកាច់ ក្នុងភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់ ។
លោក ធាង ឡេង អធិការនគរបាលស្រុកវាលវែងប្រាប់ឱ្យដឹងថា ជនរងគ្រោះទីមួយឈ្មោះ ជាសុខគឿន ភេទប្រុស អាយុ ៣៩ឆ្នាំ ទី២ ត្រូវជាប្រពន្ធឈ្មោះ ចាន់ភក្តី អាយុ៣៥ឆ្នាំ និងកូនស្រីទើបអាយុ៣ឆ្នាំ ឈ្មោះ លីចន្ថា ហៅឃៀងម៉ៃ គ្រួសារនេះរស់នៅក្នុងភូមិ ឈើទាល ឃុំត្នោតជុំ ស្រុកក្រគរ ខេត្តពោធិ៍សាត់ ។
លោកអធិការបានបញ្ជាក់ឱ្យដឹងថា នៅថ្ងៃកើតហេតុក្នុងចន្លោះម៉ោង ៦និង៧យប់ ថ្ងៃទី១២ ខែកក្កដា ជនរងគ្រោះមួយគ្រួសារខាងលើនេះ ជិះម៉ូតូមួយគ្រឿងធ្វើដំណើរលើផ្លូវជាតិលេខ៥៥ ពីឃុំថ្មដា ចុះមកខាងក្រោម ទំនងសំដៅទៅផ្ទះ លុះមកដល់ចំណុចកើតហេតុខាងលើត្រង់ចន្លោះគីឡូម៉ែត្រលេខ ១៥៥ និង១៥៦ ដោយសារតែមានភ្លៀងធ្លាក់ខ្លាំងធ្វើឲ្យសន្ទុះទឹកកើនឡើងហូរកាត់កំណាត់ផ្លូវយ៉ាងកំហុក ហើយជនរងគ្រោះសម្រេចចិត្តឆ្លងកាត់ទាំងប្រថុយប្រថាន បណ្ដាលឲ្យកម្លាំងទឹកនាំយកជនគ្រោះ និងម៉ូតូធ្លាក់ទៅខាងក្រោម ដោយគ្មាននរណាម្នាក់បានឃើញហេតុការណ៍ ដោយសារជាតំបន់ភ្នំចន្លោះទីតាំងកើតហេតុមានភាពស្ងប់ស្ងាត់មិនមានផ្ទះប្រជាពលរដ្ឋ ។
លោកថា ករណីនេះកើតឡើងរយៈពេលបីថ្ងៃ ពោលមកដល់ថ្ងៃទី១៤ ទើបសាច់ញាតិតាមរក និងម្យ៉ាងទៀត មានប្រជាពលរដ្ឋប្រទះឃើញសព និងម៉ូតូនៅនឹងកន្លែងកើតហេតុរាយការណ៍មកសមត្ថកិច្ចទើបចុះដល់កន្លែងកើតហេតុ រកឃើញស.ពពីរនាក់ឪពុក និងកូន ប្រគល់ឲ្យសាច់ញាតិយកទៅធ្វើបុណ្យតាមប្រពៃណី ។ ដោយឡែកស្ត្រីរងគ្រោះដែលមានផ្ទៃពោះ ៧ ខែហើយនោះ សមត្ថកិច្ចនៅមិនទាន់រកឃើញនៅឡើយទេ ៕
ចែករំលែកព័តមាននេះ