សុបិនកណ្តាលថ្ងៃ អ្នកនាំពាក្យ ៖ សម រង្ស៊ី ថាឈ្នះៗ ប៉ុន្តែឃើញថាគាត់មិនដែលឈ្នះ
រាជធានីភ្នំពេញ ៖ លោក សម រង្ស៊ី ដែលកំពុងនិរទេសខ្លួននៅក្រៅប្រទេស បានបន្តអះអាងថា គណបក្សសង្គ្រោះជាតិនឹងឈ្នះការបោះឆ្នោតនៅពេលខាងមុខ
រាជធានីភ្នំពេញ ៖ លោក សម រង្ស៊ី ដែលកំពុងនិរទេសខ្លួននៅក្រៅប្រទេស បានបន្តអះអាងថា គណបក្សសង្គ្រោះជាតិនឹងឈ្នះការបោះឆ្នោតនៅពេលខាងមុខ ហើយដឹកនាំរាជរដ្ឋាភិបាល ឯគណបក្សកាន់អំណាចថា នេះជាការស្រមើស្រមៃ និងសុបិនតែប៉ុណ្ណោះ ។
យោងតាមវីដេអូឃ្លីបបង្ហោះតាមហ្វេសប៊ុកប្រមាណជិត៥នាទី លោក សម រង្ស៊ី ប្រធានគណបក្សសង្គ្រោះជាតិ បានលើកឡើងថា គណបក្សសង្គ្រោះជាតិនឹងឈ្នះក្នុងការបោះឆ្នោតនៅពេលខាងមុខ រហូតដល់ដឹកនាំរាជរដ្ឋាភិបាលថែមទៀត ។ លោកបញ្ជាក់ថា «ពេលចាញ់ឆ្នោតបើមានក្រុមណា បុគ្គលណាមិនព្រមធ្វើតាម រដ្ឋាភិបាលថ្មីដែលរៀបចំដោយគណបក្សសង្គ្រោះជាតិឈ្នះឆ្នោត គឺយើងនឹងមានសិទិ្ធពេញលេញក្នុងការរៀបចំរដ្ឋាភិបាល ។ រដា្ឋភិបាលស្របច្បាប់មានតែមួយ ដោយមិនអាចមានរដ្ឋាភិបាលណាមួយទៀតទេ គឺរដ្ឋាភិបាលខុសច្បាប់ជាក្រុមឧទ្ទាម ។ តើក្រុមឧទ្ទាមមានសិទ្ធិតតាំងជាមួយរដ្ឋាភិបាលស្របច្បាប់ដឹកនាំដោយគណបក្សសង្គ្រោះជាតិឬទេ ? ខ្ញុំឆ្លើយថាអត់មានលទ្ធភាពទេ ពីព្រោះថាគ្មានអ្នកណាភ្ជាប់ខ្លួនជាមួយឧទ្ទាមនោះទេ» ។
មេដឹកនាំគណបក្សប្រឆាំងបានលើកឡើងទៀតថា នៅពេលគណបក្សលោកដឹកនាំរដ្ឋាភិបាល ហើយមានក្រុមឧទ្ទាមប្រឆាំងនោះនឹងគ្មានកម្លាំងណា ឬកងកម្លាំងប្រដាប់អាវុធចូលរួមមកប្រឆាំងរដ្ឋាភិបាលស្របច្បាប់នោះទេ ។ លោកបានគូសបញ្ជាក់ថា «រដ្ឋាភិបាលស្របច្បាប់ដឹកនាំដោយគណបក្សសង្គ្រោះជាតិ នោះ នឹងអំពាវនាវឲ្យខ្មែរទាំងអស់ មានទាំងកងកម្លាំងប្រដាប់អាវុធផង មករួបរួមជុំវិញគណបក្សសង្គ្រោះជាតិ ដែលដឹកនាំរដ្ឋាភិបាលថ្មី ។ នៅពេលណាមានក្រុមឧទ្ទាមណាមកប្រឆាំងនោះ យើងនឹងអំពាវនាវឲ្យប្រជាពលរដ្ឋនិងអន្តរជាតិជួយដោះស្រាយបញ្ហា និងយកកិច្ចព្រមព្រៀងសន្តិភាពទីក្រុងប៉ារីសជាធំ» ។
ទាក់ទងនឹងកិច្ចព្រមព្រៀងសន្តិភាពនោះដែរលោក សម រង្ស៊ី បានចោទប្រកាន់សម្តេចតេជោ ហ៊ុន សែន ថាចង់បំភ្លេចចោល និងអះអាងថា លោកគោរពនិងធ្វើឲ្យមានជីវិតឡើងវិញ ។ ជាងនេះ នឹងឲ្យម្ចាស់ហត្ថលេខីទាំងអស់គោរពតាមលទ្ធិប្រជាធិបតេយ្យទាំងអស់គ្នា ។
លោក សម រង្ស៊ី បានសង្កត់ធ្ងន់ថា នៅពេលណាដែលមានក្រុមឧទ្ទាមប្រឆាំងរដ្ឋាភិបាលថ្មីដែលដឹកនាំដោយគណបក្សសង្គ្រោះជាតិនោះ រដ្ឋាភិបាលថ្មីត្រូវតែកម្ចាត់ក្រុមឧទ្ទាមនោះ ។
ចំពោះការលើកឡើងបែបនេះរបស់លោក សម រង្ស៊ី ត្រូវបានអ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថា ជាការស្រមើស្រមៃនិងសុបិនទាំងកណ្តាលថ្ងៃប៉ុណ្ណោះ ។ លោកបញ្ជាក់ថា «ខ្ញុំយល់ថា ការលើកឡើងរបស់ សម រង្ស៊ី គឺជាការស្រមើស្រមៃ និងសុបិនទាំងកណ្តាលថ្ងៃ ហើយមិនអាចក្លាយជាការពិតបានទេ ។ ការដែលគាត់ប្រកាសថា ឈ្នះឆ្នោតហ្នឹងមិនមែនបច្ចុប្បន្ននេះទេ ។ គាត់ប្រកាសតាំងពីគាត់បង្កើតគណបក្សជាតិខ្មែរនៅឆ្នាំ១៩៩៥ម្ល៉េះ ។ អីុចឹងវាគ្មានអ្វីចម្លែកដែលសម រង្ស៊ី លើកឡើងថាឈ្នះៗ ក៏ប៉ុន្តែយើងឃើញថាគាត់មិនដែលឈ្នះទេ» ។
លោក សុខ ឥសាន លើកឡើងទៀតថា លោក សម រង្ស៊ី តែងតែលើកយកសភាពការណ៍ក្រៅប្រទេសរហូត ជាក់ស្តែងនោះពេលលោកស្រី អូង សានស៊ូជី ឈ្នះឆ្នោត គាត់ប្រកាសថាគាត់ឈ្នះឆ្នោតដែរ និងគណបក្សប្រឆាំងនៅតៃវ៉ាន់ឈ្នះឆ្នោត គាត់ក៏ថាគណបក្សគាត់ឈ្នះឆ្នោតដែរ ។
ចំណែកករណីកិច្ចព្រមព្រៀងសន្តិភាពទីក្រុងប៉ារីសវិញ ដែល លោក សម រង្ស៊ី ថា ប្រមុខរាជរដ្ឋាភិបាលកម្ពុជាបច្ចុប្បន្នមិនបានគោរពនោះ លោក សុខ ឥសាន បានលើកឡើងថា រាជរដ្ឋាភិបាលកម្ពុជាបានបញ្ចូលខ្លឹមសារសំខាន់ៗក្នុងរដ្ឋធម្មនុញ្ញអស់ហើយ ក្រោយការបោះឆ្នោតឆ្នាំ១៩៩៣ ។
លោកថ្លែងថា ការលើកឡើងពីការគិតគូរពាក់ព័ន្ធនឹងហត្ថលេខីនៃកិច្ចព្រមព្រៀងទីក្រុងប៉ារីសរបស់លោក សម រង្ស៊ី នោះ មិនមានប្រយោជន៍ទេ ។ ជាក់ស្តែងនោះលោកបានធ្វើតាំងពីយូរណាស់មកហើយ ដោយទៅពឹងអន្តរជាតិនិងប្រទេសជាហត្ថលេខីកិច្ចព្រមព្រៀងទីក្រុងប៉ារីស រហូតដល់សហគមន៍អឺរ់ុបទៀតផង ក៏ប៉ុន្តែគ្មានលទ្ធភាពនោះទេ ព្រោះថាក្នុងលក្ខន្តិកៈរបស់កិច្ចព្រមព្រៀងសន្តិភាពទីក្រុងប៉ារីសមិនអនុញ្ញាតឲ្យលូកដៃចូលក្នុងអធិបតេយ្យភាពកម្ពុជាទេ ៕
ចែករំលែកព័តមាននេះ