ខេត្តក្រចេះ ៖ ពលរដ្ឋមួយចំនួនដែលតាំងលំនៅតាមមាត់ច្រាំងទន្លេមេគង្គ ក្នុងភូមិឈើទាលភ្លោះ ឃុំព្រែកសាម៉ាន់ ស្រុកឆ្លូង សម្រេចជម្លៀសខ្លួនចេញទៅកាន់កន្លែងសុវត្ថិភាព ខណៈដែលដីច្រាំងទន្លេកំពុងតែបាក់កាន់តែខ្លាំង។ ស្ថានភាពការបាក់ដីច្រាំងទន្លេ ត្រូវបានពលដ្ឋក៏ដូចជាអាជ្ញាធរបញ្ជាក់ថា បានកើតមានធ្ងន់ធ្ងរទៅដល់លំនៅឋានរបស់ពលរដ្ឋខ្មែរ និងឥស្លាម នៅឃុំព្រែកសម៉ាន់ ស្រុកឆ្លូង ក្នុងអំឡុងពេលប៉ុន្មានថ្ងៃជាប់ៗគ្នា ខណៈដែលស្ថានភាពភ្លៀងបានបង្អុរធ្លាក់ខ្លាំង។
រហូតមកទល់នឹងថ្ងៃទី១៩ ធ្នូនេះ មានផ្ទះឈើប្រក់សង្កសីយ៉ាងហោចមួយខ្នងផ្ទះ ត្រូវបានបាក់ស្រុតចូលក្នុងបាតទន្លេ និងមានផ្ទះជាង២០ខ្នងផ្ទះទៀតកំពុងតែយាយីដោយការបាក់ដី ហើយពលរដ្ឋជាម្ចាស់លំនៅឋានក៏កំពុងតែមានការព្រួយបារម្ភ។ ពលរដ្ឋខ្លះដែលបានរុះរើលំនៅឋានចេញពីតំបន់ជួរមាត់ទន្លេ ដែលប្រឈមនឹងការបាក់ និងបានស្នាក់នៅក្រោមផ្ទះអ្នកភូមិមួយរយៈ ក៏ដោយសារតែពួកគាត់មិនមានដីសម្រាប់ផ្លាស់ប្តូរនោះទេ។
យ៉ាងណាជាមួយនឹងបាតុភាពនេះក៏ត្រូវបានអាជ្ញាធរស្រុកបានស្នើឱ្យពលរដ្ឋត្រូវរុះរើ លំនៅដ្ឋានទៅរកកន្លែងសុវត្ថិភាព ខណៈដែលពលរដ្ឋទាំងនោះបានស្នើតបមកវិញឲ្យអាជ្ញាធរជួយផ្តល់ដីតំបន់ណាមួយឲ្យមកពួកគាត់ ដើម្បីរុះរើលំនៅឋានចេញទៅរស់នៅ តំបន់នោះ និងបញ្ចៀសពីការគ្រោះថ្នាក់។ លើកឡើងឲ្យដឹងនៅថ្ងៃទី១៩ ខែធ្នូ ពលរដ្ឋដែលរស់នៅតំបន់បាក់ច្រាំងអំពាវនាវ យ៉ាងទទូច ឲ្យអាជ្ញាធរជួយរកទីតាំងតំបន់ណាមួយដើម្បីឲ្យពួកគាត់បានជម្លៀសចេញទៅសាងសង់លំនៅឋាននៅតំបន់មានសុវត្ថិភាព។
ពួកគាត់ថា បើទោះបីជាអជ្ញាធរបាន អំពាវនាវឲ្យពួកគាត់រុះរើលំនៅឋានចេញពីតំបន់ប្រឈមនឹងគ្រោះថ្នាក់យ៉ាងណាក្តីក៏ពួកគាត់នៅមិនទាន់បានរុះរើនៅឡើយទេ ដោយសារតែគ្មានទីតាំងដីណាផ្សេងពិតប្រាកដ។ បើទោះជាមានការអំពាវនាវបែបនេះក្តី អាជ្ញាធរស្រុក នៅមិនទាន់បានបញ្ជាក់ជំហរ លើវិធានការណាមួយ ដល់ពលរដ្ឋខ្មែរ និងខ្មែរឥស្លាម ដែលកំពុងតែប្រឈមនិងបាតុភាព បាក់ដីច្រាំងទន្លេប៉ះពាល់ដល់លំនៅឋាននៅឡើយនោះទេ។ ដោយគ្រាន់តែស្នើឲ្យពលរដ្ឋ ត្រូវជម្លៀសចេញពីតំបន់ងាយរងគ្រោះបណ្តោះអាសន្នតែប៉ុណ្ណោះ។
នៅជុំវិញបាតុភាពនេះ លោក ហេង រត្ន័ម៉ូនីដា ប្រធានមន្ទីរធនធានទឹក ដែលបានចុះពិនិត្យមើលស្ថានភាពភូមិសាស្ត្រនៅតំបន់បាក់ ច្រាំងនោះបានឲ្យដឹងថា ការបាក់ស្រុតច្រាំងទន្លេប៉ះពាល់ដល់ផ្ទះពលរដ្ឋទាំងនោះក៏ព្រោះតែនៅតំបន់នេះស្ថិតនៅទីតាំង ដែលខ្សែទឹកហូរបុកខ្លាំង ហើយដីកទន្លេនៅតំបន់នេះងាយនឹងបាក់ស្រុតនៅពេលដែលទឹកហូរដោយត្រូវប្រឈមនឹងការបាក់ស្រុតដីជារៀងរាល់ឆ្នាំ៕
ចែករំលែកព័តមាននេះ