រាជធានីភ្នំពេញ ៖ គិតត្រឹមថ្ងៃអាទិត្យ ទី១៨ ធ្នូ កន្លងមកនេះ ក្រុមកីឡាប៉េតង់កម្ពុជារកបានមេដាយចំនួន៦គ្រឿងហើយពីការប្រកួតជ្រើសរើសជើងឯកអាស៊ីលើកទី២០ នៅទីក្រុងណៃពិដោ ប្រទេសមីយ៉ាន់ម៉ា ។
ការប្រកួតនេះធ្វើឡើងចាប់ពីថ្ងៃទី១៦ដល់១៩ ធ្នូ ប៉ុន្តែគិតត្រឹមថ្ងៃទី១៨ ធ្នូ ក្រុមកីឡាកម្ពុជារកបានមេដាយចំនួន៦គ្រឿងក្នុងនោះមេដាយមាស១គ្រឿង មេដាយប្រាក់២គ្រឿង និងមេដាយសំរឹទ្ធ៣គ្រឿង ។ កីឡាករសុខ ចាន់មាន រកបានមេដាយមាស១គ្រឿងពីការប្រកួតលើវិញ្ញាសាវាយយកពិន្ទុ ។ ចំណែកមេដាយប្រាក់២គ្រឿងទៀត រកបានដោយកីឡាករ ឃួន លីហ័រ លើវិញ្ញាសាវាយយកពិន្ទុ និងវិញ្ញាសាប្រកួតជាក្រុម៣នាក់ទល់នឹង៣នាក់ផ្នែកយុវជន ។ រីឯមេដាយសំរឹទ្ធ៣គ្រឿងទៀត១គ្រឿងរកបានដោយកីឡាការិនី កែរ ឡេង លើវិញ្ញាសាវាយយកពិន្ទុ និង២គ្រឿងទៀតរកបានលើវិញ្ញាសាប្រកួតជាក្រុម៣នាក់ទល់នឹង៣នាក់ផ្នែកបុរស និងផ្នែកនារី ។
គួររំលឹកផងដែរថា ការចេញទៅប្រកួតលើកនេះចែកចេញជា៣ផ្នែកគឺ៖
ផ្នែកបុរសដឹកនាំដោយលោក អុឹម ផាត មានកីឡាករ៤រូបគឺ កីឡាករសុខ ចាន់មាន, សៀង វណ្ណា, តឹប ណរ៉ា និងហេង ថា ។
ផ្នែកយុវជនដឹកនាំដោយលោក អ៊ុក យ៉ារី មានកីឡាករ៤រូបគឺ កីឡាករ ទីវ រដ្ឋា, ឃួន លីហ័រ, កុយ សុភ័ក្ត្រា និងថង់ ហាស់សិទ្ធិទេវរាជ និងផ្នែកនារីដឹកនាំដោយលោក សុខ ម៉ុង មានកីឡាការិនី៤រូបគឺកីឡាការិនី កែរ ឡេង,ឃួន យ៉ារី, ស្រ៊ាង សុរ៉ាឃីម និងអ៊ុន ស្រីយ៉ា ៕
ចែករំលែកព័តមាននេះ