ចាប់ខ្លួនមុខសញ្ញាយ៉ាងសកម្មជាបន្តបន្ទាប់ ក្រោយបែកធ្លាយសកម្មភាពក្នុងកាមេរ៉ា
- បាត់ដំបង
ក្រុមជនសង្ស័យចំនួន០៣នាក់ ដែលត្រូវកម្លាំងការិយាល័យព្រហ្មទណ្ឌកំរិតស្រាល ឃាត់ខ្លួនពីបទ
ខេត្តបាត់ដំបង ៖ ក្រុមជនសង្ស័យចំនួន០៣នាក់ ដែលត្រូវកម្លាំងការិយាល័យព្រហ្មទណ្ឌកំរិតស្រាល ឃាត់ខ្លួនពីបទ «កាច់សោលួចម៉ូតូ» យ៉ាងសកម្ម ពេលនេះត្រូវបានកសាងសំណុំរឿងបញ្ជូនទៅកាន់សាលាដំបូងខេត្ត នៅព្រឹកថ្ងៃទី១៤ ខែកក្កដា ឆ្នាំ២០២២នេះហើយ។ នេះបើតាមសេចក្ដីរាយការណ៍មន្ត្រីជំនាញ នៃការិយាល័យនេះ។
បើតាមរបាយការណ៍បានឲ្យដឹងថា ជនសង្ស័យទាំង០៣នាក់នេះ មាន ១- ឈ្មោះ កូវ ប៊ុនឡុច ហៅ សិន សេត អាយុ៤១ឆ្នាំ ២- ឈ្មោះកូវ រិទ្ធី ហៅ រិទ្ធ អាយុ៤២ឆ្នាំ និង៣- ឈ្មោះ ជា សុខនឿន ហៅ ស មឿន អាយុ៣៩ឆ្នាំ។ ក្នុងនោះជនសង្ស័យចំនួន០២នាក់ដែលមានត្រកូល កូវ រស់នៅភូមិជ្រៃថ្មី ឃុំជ្រៃ ស្រុកថ្មគោល ដោយឡែកម្នាក់ទៀតឈ្មោះ រិទ្ធី ហៅ រិទ្ធ មានស្រុកកំណើតនៅខណ្ឌព្រែកភ្នៅ រាជធានីភ្នំពេញ តែបានមកស្នាក់បណ្ដោះជាមួយជនជនសង្ស័យត្រកូល កូវ ខាងលើ ដើម្បីដើរធ្វើជាចោរលួចម៉ូតូ។
បើតាមរបាយការណ៍បានបញ្ជាក់ថា ជនទាំង០៣នាក់ខាងលើ ត្រូវបានចាប់ខ្លួននៅកន្លែងផ្សេងៗពីគ្នា កាលពីថ្ងៃទី១២ ខែកក្កដា នៅពេលកើតហេតុ និងក្រោយកើតហេតុ ខុសគ្នាតែប៉ុន្មានម៉ោងប៉ុណ្ណោះ។
បើតាមព្រឹត្តិហេតុ នៃការប្រព្រឹត្តអំពើចោរកម្មរបស់ជនសង្ស័យទាំង០៣នាក់នេះ គឺនៅវេលាម៉ោង៩និង៣០នាទីព្រឹកថ្ងៃទី១២ ខែកក្កដា គឺឈ្មោះនឿន បានជិះម៉ូតូឌុបឈ្មោះ ឡុច ទៅធ្វើសកម្មភាពលួចយកម៉ូតូគេមួយគ្រឿងនៅចំណុចភូមិភ្ជាវ ឃុំត្រែង ស្រុករតនមណ្ឌល។ ហើយម៉ូតូនោះ គឺម៉ាកហុងដាឌ្រីម ស៊េរីឆ្នាំ២០១៩ ពាក់ស្លាកលេខ បាត់ដំបង 1AF-8945 ដែលជារបស់ជនរងគ្រោះឈ្មោះ ឈួន សាវ័ន ភេទប្រុស អាយុ៣២ឆ្នាំ។
ប្រភពដដែលបន្តថា ពេលនោះ ជនដៃដល់ឈ្មោះ ឡុច ជាអ្នកចុះធ្វើសកម្ម តែត្រូវម្ចាស់ និងអ្នកភូមិឃើញទាន់ ក៏ស្រែកផ្អើលឆោឡោ រួចតាមក្របួច.កបានភ្លាមៗ ទើបប្រគល់ឲ្យសមត្ថកិច្ច។ ក្រោយពីនាំខ្លួនទៅសួរនាំ ទើបកម្លាំងការិយាល័យព្រហ្មទណ្ឌកំរិតស្រាល ឈានដល់តាមចាប់ខ្លួនបក្សពួកជននេះបានចំនួន០២នាក់ទៀតជាបន្តបន្ទាប់។
ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង បានប្រាប់ថា ក្រុមជនដៃដល់ទាំង០៣នាក់នេះ ធ្លាប់កាច់សោលួចម៉ូតូគេមួយករណីទៀត កាលពីថ្ងៃទី២២ ខែឧសភា កន្លងទៅនេះ នៅចំណុចភូមិចំការល្មុត ឃុំស្ដៅ ស្រុករនតមណ្ឌលដដែល ដែលម្ចាស់ម៉ូតូមានឈ្មោះ ហៅ ពៅ ភេទប្រុស អាយុ២៦ឆ្នាំ រស់នៅចំណុចកើតហេតុ។ កាលនោះឈ្មោះ ឡុច និងឈ្មោះ រិទ្ធី ជាអ្នកប្រព្រឹត្តផ្ទាល់ ហើយឈ្មោះ នឿន ជាអ្នកយកម៉ូតូទៅលក់។ ហើយជនដៃដល់បានជិះម៉ូតូម៉ាកឃ្លីក ពណ៌ស ទៅធ្វើសកម្មភាព ហើយសកម្មភាពរបស់ពួកគេបានជាប់នៅក្នុងកាមេរ៉ាសុវត្ថិភាពដែលបំពាក់នៅតាមផ្ទះលក់ដូរក្បែរផ្លូវនោះផងដែរ។
លោក ឈឿង គឹមសុង បានបញ្ជាក់បន្តថា តាមពិតមុខសញ្ញាក្រុមជនសង្ស័យទាំង០៣នាក់ខាងលើនេះ ត្រូវកម្លាំងជំនាញរបស់លោកកំណត់បានតាំងពីពេលនោះ ទើបលោកស្នងការខេត្ត បញ្ជាឲ្យតាមឃ្លាំមើលសកម្មភាពរបស់ពួកគេ។ លុះក្រុមនេះប្រព្រឹត្តលើកចុងក្រោយនៅ ឃុំត្រែង ហើយត្រូវអ្នកភូមិ និងម្ចាស់ម៉ូតូក្របួចបានភ្លាមៗ រួចប្រគល់ឲ្យសមត្ថកិច្ចនាំយកទៅសួរនាំ ទើបឈានដល់ឃាត់ខ្លួនបបក្សពួកគេទាំងអស់តែម្ដង។
លោកបានបញ្ជាក់ទៀតថា បើតាមការស៊ើបអង្កេតលើបទល្មើសដែលក្រុមនេះបានប្រព្រឹត្ត គឺពួកគេបានធ្វើសកម្មភាពលួចម៉ូតូជាច្រើនកន្លែងណាស់។ យ៉ាងណាក្ដី ជាមួយនឹងការឃាត់ខ្លួនក្រុមចោរលួចម៉ូតូដ៏សកម្មទាំង០៣នាក់នេះ សមត្ថកិច្ចក៏ដកហូតបានវត្ថុតាងរួមមាន ៖ កូនសោលេខ៨ រាងអក្សរ L ចំនួន០២ដើម, ផ្លែយូណឺវីសចុងរាងសំប៉ែត០១ដើ,ម ផ្លែស្វានចុងរាងសំប៉ែត០១ដើម, ផ្លែតួណឺវីសកែច្នៃរាងអក្សារ T ០១ដើម (ឧបករណ៍ទាំង០៣នេះ សម្រាប់កាច់សោម៉ូតូ) និងម៉ូតូចំនួន០២គ្រឿងទៀត គឺម៉ាកឃ្លីក និងម៉ាកហុងដាឌ្រីម ដែលម៉ូតូទាំង០២គ្រឿងនេះ ពួកគេតែងតែជិះធ្វើសកម្មភាពប្រព្រឹត្តអំពើចោកម្ម។
លោក ឈឿង គឹមសុង បានបញ្ជាក់ថា ក្រោយបញ្ចប់ការសួរនាំ ពេលនេះលោកស្នងការ បានបញ្ជាឲ្យកសាងសំណុំរឿងបញ្ជូនក្រុមចោរសកម្មទាំង០៣នាក់នេះ រួមទាំងវត្ថុតាងផង ទៅកាន់សាលាដំបូងខេត្តបាត់ការតាមផ្លូវច្បាប់ហើយ៕
ចែករំលែកព័តមាននេះ