រាជធានីភ្នំពេញ ៖ កាលពីដើមសប្តាហ៍មុន ធនាគារកណ្តាលសហរដ្ឋអាមេរិកបានចាប់ផ្តើមអនុវត្តជាផ្លូវការនូវការដំឡើងអត្រាការប្រាក់របស់ខ្លួន ដែលធ្វើឲ្យសេដ្ឋវិទូកម្ពុជាព្រមានពីផលប៉ះពាល់ដល់ភាពប្រកួតប្រជែងរបស់កម្ពុជានៅលើឆាកអន្តរជាតិ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានថ្លែងឲ្យដឹងតាមទូរស័ព្ទនាព្រឹកថ្ងៃទី១៦ធ្នូថា សហរដ្ឋអាមេរិកបានសម្រេចអនុវត្តជាផ្លូវការនូវការដំឡើងអត្រាការប្រាក់០,២៥% ដែលនេះជាទំហំធំមួយផងដែរ ។ ការដំឡើងអត្រាការប្រាក់បែបនេះ នឹងប៉ះពាល់ដល់ការប្រកួតប្រជែងរបស់ប្រទេសនេះ ព្រោះបើគេទិញទំនិញពីយើងថ្លៃ គេត្រូវចំណាយប្រាក់ច្រើន គេនឹងងាកទៅកាន់ប្រទេសដែលមានទំនិញតម្លៃថោកជាងយើង ហើយភាពប្រកួតប្រជែងរបស់យើងនឹងមានផលប៉ះពាល់ ។ លោកថ្លែងថា ៖ « ក្នុងស្ថានភាពនេះ នឹងធ្វើឲ្យការប្រកួតប្រជែងរបស់កម្ពុជាធ្លាក់ចុះ និងមានលំហូរសាច់ប្រាក់ចេញទៅវិញ ព្រោះពេលអត្រាការប្រាក់នៅប្រទេសគេខ្ពស់ គេនឹងយកប្រាក់របស់ពួកគេត្រឡប់ទៅវិញ ។ វានឹងមានបញ្ហាដល់កម្ពុជា ដូច្នេះ កម្ពុជាខ្លួនឯងត្រូវពង្រឹងការប្រើប្រាស់ប្រាក់រៀលឲ្យកាន់តែច្រើនកាន់តែល្អ ហើយកម្ពុជាត្រូវតែគិតពីបញ្ហានេះ » ។
លោកបណ្ឌិតបន្តថា ៖ « នៅពេលការប្រើប្រាស់រូបិយប័ណ្ណជាតិច្រើន តែងមានអ្នកចាញ់ និងអ្នកឈ្នះ ប៉ុន្តែដើម្បីផលប្រយោជន៍ជាតិ យើងត្រូវតែធ្វើវា ។ បច្ចុប្បន្ន ប្រាក់រៀលធៀបនឹងដុល្លារមានកម្រិតថេរនៅលើទីផ្សារប្តូរប្រាក់ ប៉ុន្តែការថេរមិនល្អនោះទេ គួរតែមានការប្រែប្រួល ទើបល្អ បើវាឡើងថ្លៃធៀបនឹងដុល្លារ ប៉ុន្តែបើវាចុះថោកធៀបនឹងដុល្លារ ការយកប្រាក់ដុល្លារជាការល្អជាង ។
ទោះជាយ៉ាងណា អ្នកប្រតិបត្តិផ្ទាល់ក្នុងឧស្សាហកម្មហិរញ្ញវត្ថុកម្ពុជា មិនបានបង្ហាញនូវការព្រួយបារម្ភ ឬលើកឡើងពីផលប៉ះពាល់ក្នុងវិស័យនេះទេ ។
លោក ស៊ីម សេនាជាតិ អគ្គនាយកគ្រឹះស្ថានមីក្រូហិរញ្ញវត្ថុប្រាសាក់ ថ្លែងថា ការដំឡើងអត្រាការប្រាក់ មិនមានផលប៉ះពាល់ដល់វិស័យ នេះទេ ដោយសារប្រភពទុនក្នុងវិស័យនេះភាគច្រើន មិនសូវយកពីសហរដ្ឋអាមេរិក ហើយភាគច្រើននៃគ្រឹះស្ថានមីក្រូហិរញ្ញវត្ថុនានាគឺយកទុនពីអឺរ៉ុប និងប្រភពទុនយកមកពីប្រទេសចិន។ លោកបន្តថា ៖ « ការដំឡើងការប្រាក់នៅអាមេរិក មិនធ្វើឲ្យកម្ពុជាត្រូវដំឡើងអត្រាការប្រាក់នោះទេ គឺមានតែបន្ធូរបន្ថយដោយសារការប្រកួតប្រជែងកើនឡើង » ។
លោកបណ្ឌិត អិុន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី ថ្លែងថា ពេលកម្ពុជាត្រូវខ្ចីប្រាក់ជាដុល្លារ ត្រូវឡើងការប្រាក់ថែម០,២៥% ។ ប៉ុន្តែយើងមិនដឹងថា គ្រឹះស្ថានហិរញ្ញវត្ថុនានាប៉ុន្មានភាគរយ ដែលបានយកប្រភពទុនពីសហរដ្ឋអាមេរិកនោះទេ។ ធនាគារ និងមីក្រូហិរញ្ញវត្ថុភាគច្រើន ពួកគេមិនបានចុះកិច្ចព្រមព្រៀងក្នុងការផ្តល់ឥណទាននោះទេ ដូច្នេះឥណទានដែលមានផលប៉ះពាល់ គឺឥណទានដែលមានរយៈពេល៣ទៅ៥ឆ្នាំ ។ លោកបន្តថា ៖ « ដើម្បីជំរុញការវិនិយោគ គេតែងបន្ថយអត្រាការប្រាក់បញ្ញើ ប៉ុន្តែបើវិនិយោគកើនឡើងច្រើន គេដំឡើងអត្រាការប្រាក់សន្សំវិញ ដើម្បីបញ្ចៀសអតិផរណា ។ ខ្ញុំគិតថា ការដំឡើងអត្រាការប្រាក់បែបនេះ មិនមានផលប៉ះពាល់ដល់លំហូរទុនវិនិយោគពីបរទេសទេ ព្រោះបច្ចុប្បន្ន កម្ពុជាបានពឹងប្រភពទុនពីប្រទេសចិនកាន់តែច្រើន » ៕
ចែករំលែកព័តមាននេះ