ជិតដល់ពេលផ្សំដំណេកទៅហើយ ស្រាប់តែ…
រាជធានីភ្នំពេញ ៖ ពិធីមង្គលការមួយដែលមានភ្ញៀវចូលរួមយ៉ាងអធិកអធមនឹងជិតដល់ពេលផ្សំដំណេកទៅហើយ ស្រាប់តែភ្ញៀវខាងកូនកំលោះនិងភ្ញៀវខាងកូនក្រមុំ …
រាជធានីភ្នំពេញ ៖ ពិធីមង្គលការមួយដែលមានភ្ញៀវចូលរួមយ៉ាងអធិកអធមនឹងជិតដល់ពេលផ្សំដំណេកទៅហើយ ស្រាប់តែភ្ញៀវខាងកូនកំលោះនិងភ្ញៀវខាងកូនក្រមុំឌឺដងដាក់គ្នាបន្ទាប់មកក៏យកដុំថ្ម កែវ ចាន គប់គ្នាទៅវិញទៅមក បង្កឲ្យមានការភ្ញាក់កាលពីវេលាម៉ោង១១ និង២០នាទីយប់ ថ្ងៃទី១៨ ខែធ្នូ ឆ្នាំ២០១៦ នៅផ្ទះខាងកូនស្រី នៅផ្លូវបេតុងអត់លេខ ស្ថិតក្នុងភូមិព្រៃកីខ សង្កាត់ពងទឹក ខណ្ឌដង្កោ ។
ប្រភពព័ត៌មានបានឲ្យដឹងថា មុនពេលកើតហេតុ នៅក្នុងពិធីមង្គលការនៅភូមិខាងលើមានទាំងភ្ញៀវកូនកំលោះនិងភ្ញៀវកូនក្រមុំ ចូលរួមពិសាភោជនីយអាហារដ៏អធឹកអធម លុះដល់ពេលជិត់ចប់ម៉ោងនៅសល់តែភ្ញៀវ៣តុទៀតតែប៉ុណ្ណោះកំពុងអង្គុយហូបអាហារផឹកស៊ីយ៉ាងសប្បាយរីករាយ តែមិនដឹងថាទាស់សម្តីគ្នារឿងអ្វីទេ គ្រាន់តែដឹងថា ភ្ញៀវទាំងសងខាងបានឌឺដងដាក់គ្នា ហើយភ្ញៀវខាងប្រុសបាននាំគ្នាបណ្តើរម៉ូតូចេញមកដាក់នៅមុខរោងបម្រុងជិះចេញទៅ ពេលនោះស្រាប់តែភ្ញៀវខាងកូនស្រីដែលជាអ្នកភូមិនៅទីនោះបាននាំគ្នាចេញមក រួចយកដុំថ្មគប់ភ្ញៀវខាងកូនប្រុសយ៉ាងប្រសាចពេញក្នុងរោងការ ហើយភ្ញៀវខាងកូនប្រុសបាននាំគ្នាយកកែវ ចាន ព្រមទាំងដុំថ្មគប់ទៅវិញ បណ្តាលឲ្យមានអ្នករងរបួសពកក្បាល ជាំខ្លួនទាំងសងខាង សូម្បីតែកូនកំលោះក៏ត្រូវរបួសដែរ ព្រមទាំងធ្វើឲ្យបែកកញ្ចក់ខាងមុខរថយន្តម៉ាកកាមរីឆ្លាម ពណ៌ទឹកប្រាក់ ពាក់ស្លាកលេខ ភ្នំពេញ 2M-5521 ដែលម្ចាស់ចតទុកនៅមុខផ្ទះទៀតផង ។
ប្រភពបន្តថា ភ្លាមៗនោះសមត្ថកិច្ចមូលដ្ឋានបានចុះទៅជាមួយអន្តរាគមន៍ តែមិនបានឃាត់ជនបង្កទាំងពីរក្រុមនោះទេ គឺឃាត់បានតែម៉ូតូចំនួន៥គ្រឿងប៉ុណ្ណោះ ក្នុងនោះម៉ាកហុងដាឌ្រីម៣គ្រឿង ស្កុបពី១គ្រឿង និងម៉ាក TODAY ១គ្រឿង យកទៅរក្សាទុកនៅប៉ុស្តិ៍នគរបាលពងទឹក ដើម្បីរង់ចាំទទួលបណ្តឹងតើខាងណាប្តឹងខាងណា ៕
ចែករំលែកព័តមាននេះ