រាជធានីភ្នំពេញ ៖ កម្មការិនីរោងចក្រកាត់ដេរម្នាក់ដែលបាត់ខ្លួនពីផ្ទះជួលអស់រយៈពេល១យប់ លុះព្រឹកឡើងត្រូវបានបងប្អូនសាច់ញាតិតាមរកប្រទះឃើញសាកសពនៅក្នុងទឹកបឹងមួយកន្លែងដែលពោរពេញទៅដោយកក់ដុះយ៉ាងក្រាស់ឃ្មឹក។ សពនារីរងគ្រោះត្រូវបានគេដឹងភ្លាមៗថា ស្លាប់ដោយសារការវាយ និងកាប់ដែលប្រភពនានាបានសន្និដ្ឋានថា អាចត្រូវគេចាប់រំលោភរួចសម្លាប់ជាក្រោយ។ ការប្រទះឃើញសពនេះគឺកាលពីវេលាម៉ោង៩ព្រឹក ថ្ងៃទី៨ ខែមីនា ឆ្នាំ២០១១ នៅក្នុងទឹកបឹងដែលមានកក់ដុះក្រាស់ឃ្មឹក ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌដង្កោ ។
នារីរងគ្រោះឈ្មោះឃួន ឡាង អាយុ២១ឆ្នាំ ជាកម្មការិនីរោងចក្រកាត់ដេរយីហោ ហ្វ័រឈូន ស្នាក់នៅផ្ទះជួលក្នុងភូមិកើតហេតុខាងលើ និងមានស្រុកកំណើតក្នុងភូមិត្រពាំងស្គុនឃុំត្រពាំងរាំង ស្រុកជុំគិរី ខេត្តកំពត មានស្នាមរបួសរយះលើចង្កា ហើមមុខ និងបែកក្បាល។ នេះជាការស្លាប់ដោយអំពើឃាតកម្មដែលគេសង្ស័យថា ជាអំពើរំលោភសម្លាប់ ហើយឃាតកអាចជាមនុស្សស្គាល់គ្នា។ ក្រោយពេលប្រទះឃើញសពមន្ត្រីប៉ូលិសបច្ចេកទេសស្នងការដ្ឋានរាជធានីភ្នំពេញបានចុះទៅពិនិត្យដែរ ប៉ុន្តែមិនបានប្រាប់ឱ្យដឹងថា ជាករណីរំលោភរួចសម្លាប់ ឬក៏បែបណាឡើយ។
តាមប្រភពព័ត៌មានពីបងប្អូនស្ត្រីរងគ្រោះបានឱ្យដឹងថា នាងឃួន ឡាង បានបាត់ខ្លួនតាំងពីវេលាម៉ោង៦ល្ងាច ថ្ងៃទី៧ ខែមីនា ម្លេ៉ះដែលពេលនោះពុំដឹងថា នាងទៅទីណាឡើយ។ ខណៈនោះគេបាននាំគ្នាទូរស័ព្ទរកនាង ហើយទូរស័ព្ទចូលជាធម្មតា ប៉ុន្តែនាងអត់ទទួលទូរស័ព្ទនោះទេ ពុំដឹងថា ពេលនោះនាងស្លាប់ហើយក៏មិនដឹង លុះដល់វេលាម៉ោង៨យប់ស្រាប់តែទូរស័ព្ទលែងចូលរហូតតែម្តង។ ពេលនោះគេមានការព្រួយបារម្ភខ្លាំងណាស់ ហើយនាំគ្នាដើររកគ្រប់ទីកន្លែង ប៉ុន្តែរកមិនឃើញទេ លុះដល់ព្រឹកឡើងថ្ងៃទី៨ មីនា នាំគ្នាដើររកម្តងទៀត ក៏ប្រទះឃើញកាតរបស់នាងនៅចម្ងាយប្រមាណ៤០ម៉ែត្រពី មាត់បឹង មិនតែប៉ុណ្ណោះមានឈាមនៅជិតនោះទៀតផង។ ដោយមានការសង្ស័យ គេក៏នាំគ្នាដើររកនៅក្បែរៗនោះទៀត ហើយក្រោយមកក៏បានប្រទះឃើញសពនៅក្នុងទឹកបឹងដែលព័ទ្ធជុំជិតទៅដោយកក់យ៉ាងក្រាស់ឃ្មឹក។ ប្រភពដដែលបានឱ្យដឹងទៀតថា ក្រោយពេលឃើញហេតុការណ៍ដ៏តក់ស្លុតបែបនេះ ពួកគេបាននាំគ្នាស្រង់សពចេញពីក្នុងទឹករួចហើយទើបប្តឹងប៉ូលិសមូលដ្ឋានឱ្យចុះទៅពិនិត្យមើល និងបានសំណូមពរដល់សមត្ថកិច្ចឱ្យជួយស្រាវជ្រាវវែកមុខឃាតកឱ្យឃើញដើម្បីផ្តល់ភាពយុត្តិធម៌ដល់សពជនរងគ្រោះផង។
ប្រភពខាងលើបានបន្តថា នារីរងគ្រោះមុនពេលស្លាប់បានស្គាល់បុរសពោះម៉ាយម្នាក់ដែលជាអ្នកបើកបររថយន្តឈ្នួល ក្នុងខណៈពេលដែលនាងជិះរថយន្តនោះទៅចូលរួមពិធីមង្គលការមិត្តភក្តិនៅឯខេត្តកំពង់ចាមកាលពី កន្លះខែមុននេះ ។ បុរសនោះក្រោយពីបានឃើញនាងភ្លាមក៏ស្រឡាញ់ភ្លែត និងតាមសុំស្នេហ៍យ៉ាងមុខក្រាស់បំផុត ប៉ុន្តែនាងមិនបានយល់ព្រមទេ ព្រោះបុរសនោះពោះម៉ាយ និងចាស់ពេកគឺអាយុប្រមាណជាង៤០ឆ្នាំទៅហើយ។ ទោះបីជានាងមិនព្រមស្រឡាញ់ក្តី ក៏បុរសនោះបានទូរស័ព្ទមករកនាងសុំស្នេហ៍ដដែល ហើយនាងបានប្រាប់ទៅវិញថា នាងចង់សុំធ្វើជាកូនធម៌ ប៉ុន្តែបុរសនោះមិនព្រម។ លុះនៅថ្ងៃអាទិត្យ ទី៦ មីនា បុរសនោះបានទូរស័ព្ទមករកនាងទៀត និងបានប្រាប់ថា យករូបថតដែលនាងថតកាលពីទៅការមិត្តភក្តិនោះមកឱ្យ។
ប្រភពដដែលបានបន្តទៀតថា ពេលនោះគេអត់បានដឹងថា នាងបានជួបបុរសនោះឬក៏អត់ឡើយ លុះដល់ល្ងាចថ្ងៃទី៧ មីនា មានគេទូរស័ព្ទចូលមកនាងម្តងទៀត ប៉ុន្តែពុំដឹងថាជាបុរសនោះ ឬនរណាឡើយ ហើយនាងបានចេញពីផ្ទះជួលបាត់រហូតដល់ពេលឃើញសពនេះតែម្តង ៕
ចែករំលែកព័តមាននេះ