ខេត្តព្រៃវែង ៖ មន្ត្រីជំនាញនៃមន្ទីរវប្បធម៌ និងវិចិត្រសិល្បៈខេត្តព្រៃវែង រួមទាំងអាជ្ញាធរ និងសមត្ថកិច្ចជាច្រើននាក់ បានចុះទៅពិនិត្យមើលទីតាំងដីទួលបុរាណមួយកន្លែង ដែលស្ថិតនៅក្នុងឃុំអ្នកលឿង ស្រុកពាមរក៍ បន្ទាប់ពីមានអ្នកនេសាទត្រីប្រទះឃើញវត្ថុបុរាណជាច្រើន ដូចជាភាជន៍ ចានឆ្នាំង ក្រឡដី និងបំណែកឆ្អឹងមនុស្សជាច្រើន បានកប់នៅក្នុងដីត្រង់ចំណុចទីតាំងខាងលើនោះ។ ការចុះទៅត្រួតពិនិត្យនេះ បានធ្វើឡើងកាលពីព្រឹកថ្ងៃទី១៧ ខែធ្នូ កន្លងទៅ ក្រោមការដឹកនាំរបស់លោក ភោគ ប៉ុន ប្រធានការិយាល័យបេតិកភណ្ឌ័ នៃមន្ទីរវប្បធម៌ និងវិចិត្រសិល្បៈខេត្ត ព្រមទាំងមានអ្នកស្រុកទៅចូលរួមមើលជាច្រើននាក់ផងដែរ។
លោក ភោគ ថានី មេឃុំអ្នកលឿងបានប្រាប់ឲ្យដឹងថា ទីទួលដែលអ្នកនេសាទប្រទះឃើញ មានវត្ថុបុរាណ និងបំណែកឆ្អឹងមនុស្សនេះ មានឈ្មោះទួលសំរោង ទួលនេះមានតាំងពីបុរាណមកម្លេះ តែមិនដឹងថាតាំងពីសម័យណានោះទេ ជាពិសេសក៏គ្មាននរណាម្នាក់បានដឹងថា នៅក្នុងទួលនេះមានវត្ថុបុរាណនោះដែរ គឺរហូតទាល់តែមានគ្រឿងចក្រចូលមកជីកយកដីក្បែរទួលនេះកាលពីប៉ុន្មានឆ្នាំមុន ហើយកើតទៅជាស្រះ និងមានអ្នកនេសាទមកបង់សំណាញ់ក្នុងស្រះនេះ ប្រទះឃើញ ភាជន៌ ចានឆ្នាំង និងបំណែកឆ្អឹងមនុស្ស ទើបរាយការណ៍ប្រាប់អ្នកពត៌មានទើបមានការភ្ញាក់ផ្អើលដល់មន្ត្រីជំនាញចុះមកពិនិត្យមើលតែម្តង។
បើតាមការឲ្យដឹងពីឈ្មោះ សោម ហ៊ាន ជាអ្នកនេសាទដែលប្រទះឃើញវត្ថុបុរាណទាំងនោះ មុនគេបានប្រាប់ឲ្យដឹងថា រូបគាត់បានប្រទះឃើញគ្រឿងចានឆ្នាំង និងភាជន៍បុរាណ នេះតាំងពីជាង២ឆ្នាំមុនមកម្លេះ នៅពេលដែលគាត់ទៅបង់សំណាញ់នៅស្រះទឹកក្បែរទួលនោះ ហើយពេលឃើញដំបូងគាត់មិនដឹងថាជាវត្ថុបុរាណអ្វីទេ គ្រាន់តែឃើញវាដូចជាឧបករណ៍ប្រើប្រាស់ ក៏រើសប្រមូលបានរបស់ដែលនៅល្អមិនទាន់បែកជាង១០ បានយកទៅឲ្យកូនលេងបាយឡុកបាយឡ ហើយកូនលេងយូរៗទៅក៏បែកអស់នៅសល់តែ៦ ទុកចោលក្នុងផ្ទះ។
បុរសរូបនេះបានបន្តទៀតថា រហូតដល់ថ្ងៃទី១៥ ខែធ្នូ ឆ្នាំ២០១៦នេះ រូបគាត់បានទៅផឹកស្រានៅផ្ទះរបស់ឈ្មោះ រោយ តង ភេទប្រុស អាយុ៥១ឆ្នាំ នៅភូមិ៥ ហើយពេលផឹកស៊ីនាំគ្នានិយាយរឿងវត្ថុបុរាណ ទើបរូបគាត់នឹកឃើញថា របស់ដែលគាត់រើសឲ្យកូនលេងនោះ មានសភាពចាស់ប្លែកក៏ទៅយកមកអោយឈ្មោះ រោយ តង មើលហើយឈ្មោះ រោយ តង មើលហើយសង្ស័យថាជាវត្ថុបុរាណ ក៏រាយការណ៍ប្រាប់អ្នកពត៌មានចុះទៅពិនិត្យមើល ទើបបែកធ្លាយរឿងដឹងថាជាវត្ថុបុរាណ ហើយទំនាក់ទំនងហៅមន្ត្រីជំនាញចុះទៅពិនិត្យមើលទីតាំងជាក់ស្តែងតែម្តង។
លោក ភោគ ប៉ុន ប្រធានការិយាល័យបេតិកភណ្ឌ នៃមន្ទីរវប្បធម៌ខេត្តព្រៃវែង បានឲ្យដឹងថា សម្ភារដែលអ្នកនេសាទរើសបាននោះ គឺជាវត្ថុបុរាណប្រភេទភាជន៍ ចាន និងក្រឡដី ដែលតាមការសន្និដ្ឋានជំហានបឋម គឺវាមានអាយុកាលជាង២ពាន់ឆ្នាំមកហើយ ចំណែកទីតាំងទួលសំរោងនេះ តាមការសន្និដ្ឋានវាគឺជាទួលបញ្ចុះសពសម័យបុរាណ កាលពីជាង២ពាន់ឆ្នាំមុន ដែលកាលនោះ ពេលបញ្ចុះសពគេតែងតែដាក់ជាមួយនូវសម្ភារប្រើប្រាស់ចំនួន៦មុខ ជូនដល់សាកសពសម្រាប់ប្រើប្រាស់ ដូចជាភាជន៍ ចានឆ្នាំងជាដើម។
ទោះជាយ៉ាងណាក៏ដោយលោក ភោគ ប៉ុន បានបញ្ជាក់ថា ក្រោយពីពិនិត្យឃើញថា ទួលសំរោងនេះគឺជាទួលបុរាណ ដែលមានវត្ថុបុរាណជាច្រើនទៀតនៅក្នុងទួលនេះ លោកបានស្នើសុំឲ្យខាងអាជ្ញាធរ ធ្វើការឡោមពទ្ធ័ការពារទីទួលបុរាណនេះទុកជាបណ្តោះអាសន្ន និងហាមមិនឲ្យមានការជីកកាប់គាស់ក្នុងបរិវេណទួលនេះទៀតនោះទេ បើទោះជាដីទួលនេះមានម្ចាស់កម្មសិទ្ធិក៏ដោយចុះ។ ចំណែខាងមន្ទីរវប្បធម៌ និងធ្វើរបាយការណ៍ជូនទៅក្រសួង វប្បធម៌ ដើម្បីស្នើសុំមន្ត្រីបច្ចេកទេស ចុះមកធ្វើការកំណត់ព្រំដីទួល១នេះ និងធ្វើកំណាយស្រាវជ្រាវស្វែងរកវត្ថុបុរាណ សម្រាប់យកទៅថែរក្សានិងអភិរក្សផងដែរ៕
ចែករំលែកព័តមាននេះ