តោខៀវ Chelsea ដែលបច្ចុប្បន្នកំពុងស្ថិតក្នុងកំពូលតារាងអង់គ្លេសប្រឺមីញេលីកចង់បានខ្សែបម្រើប្រយុទ្ធ និងខ្សែបម្រើស្លាបរបស់ក្លិបស្តេចស Real Madrid ដើម្បីជំនួសតំណែងកីឡាករ Oscar ក្រោយពីរូបគេត្រូវក្លិបលីកកំពូលចិន Shanghai SIPG ប្រមាញ់បានក្នុងតម្លៃខ្លួន៦២លានផោន ។ Antonio Conte គ្រូបង្វឹកក្លិប Chelsea ត្រៀមខ្លួនរួចជាស្រេចក្នុងការប្រមាញ់ Rodriguez ពី Real Madrid ក្នុងកិច្ចចរចាដេញថ្លៃណាមួយបើសិនជាអ្នកតំណាងយល់ព្រម ។
Antonio Conte កាលពីរដូវក្តៅឆ្នាំមុនបានព្យាយាមបញ្ចុះបញ្ចូល Rodriguez ឱ្យមកលេងនៅពហុកីឡដ្ឋាន Stamford Bridge តែត្រូវក្លិប Real Madrid រារាំងមិនឱ្យមានកីឡាកររូបណាដើរចេញពីក្លិបបានឡើយ ។ ក្នុងរដូវកាលនេះ Rodriguez បានបង្ហាញខ្លួនក្នុងការប្រកួតក្របខ័ណ្ឌអេស្ប៉ាញព្រីមេរ៉ាលីហ្គា៨លើក ដោយស្តែងចេញពីភាពស្វិតស្វាញ និងទេពកោសល្យរបស់ខ្លួនលើសមរភូមិវាលស្មៅ ។ យ៉ាងណាក៏ដោយក្លិប Real Madrid នឹងស្ទាក់ស្ទើរលក់កីឡាករសញ្ជាតិកូឡុំប៊ីវ័យ ២៥ឆ្នាំ Rodriguez ព្រោះ Gareth Bale ដែលជាកីឡាករល្អរបស់ក្លិបបានអវត្តមានពីការប្រកួតក្រោយរងរបួសក.ជើង ។
ប៉ុន្តែ Rodriguez បង្ហាញពីអារម្មណ៍ផ្ទាល់ខ្លួនថា ៖ «រូបគេចង់លេងនៅពហុកីឡដ្ឋាន Santiago Bernabeu របស់ក្លិប Real Madrid ច្រើនជាង» ។ ទន្ទឹមគ្នានេះដែរក្លិប Real Madrid ចង់ចំណេញដើមដែលគេធ្លាប់ចំណាយប្រមាណ ៧៥លានផោនលើកីឡាកររូបនេះយកពីក្លិប Monaco កាលពីឆ្នាំ២០១៤ ។
ម្យ៉ាងវិញទៀត មហិច្ឆតារបស់ Conte គឺចង់រក្សាតំណែងកំពូលតារាងរបស់ខ្លួននៅរដូវកាលនេះ ហើយវត្តមានរបស់ Rodriguez នឹងសហការជាមួយកីឡាករ Eden Hazard ព្រមទាំងកីឡាករក្នុងក្រុមច្រើនរូបទៀត ៕
ចែករំលែកព័តមាននេះ