ខេត្តបាត់ដំបង ៖ មន្ត្រីនគរបាលស្រុកកំរៀងម្នាក់ត្រូវរថយន្តបុ.កស្លា.ប់ ពេលកំពុងជិះម៉ូតូនៅលើផ្លូវជាតិលេខ៥៩ កាលពីវេលាម៉ោង៨និង៣០នាទីយប់ថ្ងៃទី១២ កក្កដា ចំណុចភូមិស្វាយ ឃុំបឹងរាំង ស្រុកកំរៀង តែគេមិនទាន់ដឹងពីមូលហេតុនៅឡើយទេ។
សេចក្ដីរាយការណបានឲ្យដឹងថា ជនរងគ្រោះឈ្មោះ សៀង នេត ប្រុសអាយុ៤៣ឆ្នាំ ជាមន្ត្រីនគរបាល រស់នៅភូមិថ្មី ឃុំត្រាង ស្រុកកំរៀង។ សេចក្ដីរាយការណ៍បានបន្តថា មន្ត្រីនគរបាលរូបនេះបានជិះម៉ូតូពីទិសខាងលិចទៅកើត ហើយត្រូវរថយន្តបុ.កពេញទំហឹង ពេលកំពុងធ្វើដំណើរក្នុងគោលដៅផ្ទុយគ្នា ។ ប៉ុន្តែសេចក្ដីរាយការណ៏មិនបានបញ្ជាក់អំពីមូលហេតុ ដែលនាំមានគ្រោះថ្នាក់នោះទេ។
រថយន្តដែលបុកមន្ត្រីនគរបាល ម៉ាកសាំយ៉ុង ពាក់ស្លាកលេខភ្នំពេញ 2AA-1550 អ្នកបើកបរបានដាក់មេប្រូច ក្រោយកើតហេតុ។ លោក វ៉េ គឹមចត់ អធិការស្រុកកំរៀង មិនអាចសុំការបំភ្លឺបានទេ ជុំវិញមន្ត្រីនគរបាលម្នាក់ស្លា.ប់ដោយសាររថយន្តបុកខាងលើនេះ ដោយសារលោកមិនលើកទូរស័ព្ទ។
នេះគឺជាទម្លាប់របស់លោកអធិការរូបនេះ ដែលប្រកាន់មិនលើកទូរស័ព្ទដាច់ខាត និយាយជាមួយអ្នកសារព័ត៌មានឡើយ បើទោះជាលេខរបស់លោកជាច្រើនខ្សែបានបង្ហោះតាមបណ្ដាញសង្គមជាសាធារណ ប្រកាសឲ្យពលរដ្ឋទំនាក់ទំនងក្ដី។
យ៉ាងណាក្ដី បើតាមប្រភពព័ត៌មានបានបង្ហើបក្រៅផ្លូវការថា មន្ត្រីនគរបាលនោះជិះម៉ូតូមិនពាក់មួកសុវត្ថិភាពទេ ហើយគេសង្ស័យគាត់ស្រវឹងផងដែរ ទើបជួបគ្រោះថ្នាក់បែបនេះ ៕
ចែករំលែកព័តមាននេះ