ខេត្ដព្រៃវែង ៖ ជាហេតុការណ៍កម្រមួយដែលសត្វជ្រូកឈ្មោលក្រចក៥មួយក្បាលមានទំងន់ជាង២០០គីឡូក្រាម សំបុរខ្មៅ បានវាយប្រហារលើលោកតាម្នាក់រហូតដល់ស្លាប់ក្នុងចំការស្វាយរបស់គាត់ ខណៈព្យាយាមដេញវាយវានឹងព្រនង់ឱ្យចេញពីក្នុងដីចំការដោយខឹងវាបានបំផ្លាញដើមស្វាយរបស់គាត់អស់៣ទៅ៤ដើម ។ រឿងរ៉ាវនេះបានកើតមានឡើងកាលពីវេលាម៉ោង៥និង៣០នាទីព្រឹកថ្ងៃទី ១៥ មេសា នៅភូមិផាត់សណ្ដោង ឃុំព្នៅទី១ ស្រុកស៊ីធរកណ្ដាល ។តាមប្រភពព័ត៌មានបានឱ្យដឹងថា លោកតារងគ្រោះឈ្មោះស៊ាង សុខ អាយុ៦៣ឆ្នាំ បានស្លាប់ដោយសារតែជ្រូកនេះត្របាក់ខាំនៅក្នុងដីចំការស្វាយរបស់គាត់ខាងលិចវត្ដផាត់សណ្ដោងប្រមាណ១០០ម៉ែត្រ ។
តាមការបំភ្លឺរបស់លោក តុន ទីន មេប៉ុស្ដិ៍ ក៏ដូចជាប្រជាពលរដ្ឋរស់នៅទីនោះបានឱ្យដឹងថា ជារៀងរាល់ថ្ងៃលោកតាស៊ាង សុខ តែងទៅថែទាំចំការដាំកូនស្វាយដើម្បីស្រោចទឹកការពារក្រែងគោក្របីចូលស៊ី។
មុនពេលកើតហេតុមួយ ថ្ងៃលោកតាបានទៅមើលចំការស្វាយដូចសព្វមួយដងក៏ប្រទះឃើញជ្រូកបាធំមួយក្បាលកំពុងខាំស៊ីកូនស្វាយរបស់គាត់ឃើញដូចនោះ គាត់ក៏យកដុំដីគប់ និងដេញឱ្យជ្រូកនោះចេញព្រមទាំងបានស្រែកខ្លាំងៗទៅកាន់ជ្រូកជាការគំរាមថា បើថ្ងៃស្អែកមកស៊ីទៀតអញមិនទុកជីវិតឯងទេ ។ លុះដល់ព្រឹកថ្ងៃទី១៥ មេសា ឆ្នាំ ២០១០ វេលាម៉ោង៥និង៣០នាទីព្រឹក គាត់ទៅចំការក៏ប្រទះឃើញជ្រូកមួយក្បាលនេះមកខាំកូនស្វាយគាត់ឱ្យបាក់ខូចអស់៣ទៅ៤ដើម។ លោកតាខឹងណាស់ក៏យកព្រនង់ឫស្សីដេញវាយជ្រូកនោះត្រូវ២-៣ព្រនង់។ ជ្រូកនោះស្ទុះរត់ទៅទល់គូទនឹងគុម្ពស្វាយដែលនៅជាប់នឹងចំការរបស់គាត់អត់ចេញទៅណាទេ។ តាឃើញបែបនេះក៏ស្ទុះទៅវាយមួយព្រនង់ទៀតត្រូវស្មាខាងមុខហើយជ្រូកនោះក៏ស្ទុះលោតហក់មកវិញបុកតាឱ្យដួលដាច់ផ្ញារមកក្រោយ រួចយកចង្កូមដ៏មុតស្រួចរបស់វាទាំងសងខាងខាំ វ័ធទៅលើខ្លួនលោកតាវក់វីដូចគេយកកាំបិតមកប្រលះសាច់ជ្រូកដូច្នោះដែរ។
ឃើញហេតុការណ៍ដូចនោះ អ្នកស្រុកអ្នកភូមិក៏នាំគ្នាស្រែកឆោឡោឡើង ដើម្បីជួយតាដោយអ្នកខ្លះមានកាំបិត ខ្លះពូថៅ ខ្លះព្រនង់រត់ ចូលឈូឆរទៅរកជ្រូកដែលកំពុងប្រលះសាច់តា ដោយការវ័ធខាំហែកស៊ី។ លោកមេប៉ុស្ដិ៍ តុន ទីន បានបន្ដទៀតថា អ្នកស្រុកបានត្រឹមតែរត់ចូលទៅស្រែកបង្អើលឱ្យជ្រូកចេញដើម្បីជួយរំដោះតាស៊ាង សុខ ចេញពីចង្កូមមច្ចុរាជដើម្បីយកមកជួយសង្គ្រោះតែប៉ុណ្ណោះ ដោយពុំមាននរណាហ៊ានដេញកាប់ដេញវាយជ្រូកនេះឡើយ។ សូម្បីតែរូបលោកជាប៉ូលិសមានកាំភ្លើងអាកានៅនឹងដៃក៏ពុំហ៊ានបាញ់ដែរ ។ ចំណែកបងប្អូនកូនចៅជនរងគ្រោះដែលមានកំហឹងពុះកញ្ជ្រោលឃើញនឹងភ្នែកក៏ពុំហ៊ានសំលាប់ជ្រូកនេះដែរ។តាមប្រវត្ដិទាក់ទិននឹងជ្រូកកំណាចនេះត្រូវបានអ្នកភូមិឱ្យដឹងថា ជ្រូកនេះមានខ្ចាតប្រាំ (ក្រចក៥) ត្រូវបានម្ចាស់វាយល់ថាជាជ្រូកចង្រៃក៏យកមកលែងចោលនៅក្នុងវត្ដផាត់សណ្ដោងតាំងពីឆ្នាំ១៩៩៧មកម្ល៉េះ។ បើគិតទៅជ្រូកនេះមានអាយុ១៣ឆ្នាំហើយ មានចង្កូម មានខ្នាយ មានផ្កាយក្បាល និងមានទំងន់ជាង ២០០គីឡូក្រាម ។
ជ្រូកនេះចេញដើរពេលយប់គេតែងប្រទះឃើញមានពន្លឺនៅលើក្បាល ដោយហេតុនេះហើយទើបពុំមាននរណាហ៊ានធ្វើអ្វីវាឡើយ ។លោកតុន ទីន បានលើកឧទាហរណ៍បែបមានជំនឿទៅលើអ្វីមួយថា សព្វដងជ្រូកនេះទៅស៊ីដំណាំអ្នកស្រុកបន្ដិចបន្ដួចទេ បើយើងជេរឬវាយវាថ្ងៃនេះស្អែងឡើងជ្រូកនេះមកកំទេចទាំងអស់ បើយើងចេះនិយាយ ស្រួលនោះមិនអីទេ ។ចំណែកលោកតាស៊ាង សុខ ក្រោយពីបងប្អូនកូនចៅយកចេញពីចង្កូមជ្រូកបានហើយ យកមកដល់ផ្ទះបានដាច់ខ្យល់ស្លាប់មុនគ្រូពេទ្យមកដល់ ។ សពលោកតាត្រូវបានត្រួតពិនិត្យឃើញជ្រូកខ្វេះអស់ពោះវៀន ឯក្រលៀនទាំងគូនិងសាច់ត្រគាកត្រូវជ្រូកស៊ីគ្មានសល់ ។ការមានជំនឿទៅលើបារមីជ្រូកបាអនាថា នេះរហូតមិនហ៊ានសំលាប់អាចជាការយល់ បែបប្រតិកិរិយាមួយហើយ ព្រោះថាការខាំមនុស្សយ៉ាងសាហាវដល់ស្លាប់បែបនេះ វានឹងអាចបង្កគ្រោះថ្នាក់ដល់អ្នកដទៃទៀតនៅថ្ងៃណាមួយ ។
ចែករំលែកព័តមាននេះ