ប្រទេសចិន ៖ ការទិញលំនៅឋានថ្មីនៅចិនបានកើនឡើងយឺតម្តងទៀតក្នុងរយៈពេល១១ខែដំបូងឆ្នាំនេះ ដោយសារតែវិធានការរឹតបន្តឹងរបស់រដ្ឋាភិបាល ដែលធ្វើឱ្យប៉ះពាល់ដល់ការទិញ ។ នេះបើតាមទិន្នន័យរបស់ការិយាល័យស្ថិតិជាតិ ។
លំនៅឋានមានតម្លៃ៨,៧ទ្រីលានយន់ ឬ១,២៥ទ្រីលានដុល្លារអាមេរិក (មិនរាប់បញ្ចូលលំនៅឋានតម្លៃសមរម្យផ្តល់ជំនួយដោយរដ្ឋាភិបាល) ដែលលក់នៅទូទាំងប្រទេស ក្នុងចន្លោះខែមករា និងវិច្ឆិកា បានកើនឡើងប្រចាំឆ្នាំ៣៩,៣% ។ ប៉ុន្តែវាធ្លាក់ចុះពីកំណើន៤២,៦%ក្នុងរយៈពេល១០ខែដំបូង និងកើនឡើង៤៣,២%នៅ៣ត្រីមាសដំបូង ។
ចំណែកលំនៅឋានថ្មីមានទំហំប្រហែល១,១៩ប៊ីលានម៉ែត្រការ៉េត្រូវបានលក់ក្នុងរយៈពេល១១ខែ កើនឡើង២៤,៥%បើធៀបនឹងរយៈពេលដូចគ្នាកាលពីឆ្នាំមុន ។ ប៉ុន្តែចំនួននេះបានធ្លាក់ចុះពីកំណើន២៧%ក្នុងរយៈពេល១០ខែដំបូង និងកើនឡើងប្រចាំឆ្នាំ២៧,១% នៅ៣ត្រីមាសដំបូង ។ នេះបើតាមទិន្នន័យបានបង្ហាញ ។
លោក Mao Shengyong អ្នកនាំពាក្យនៃការិយាល័យនិយាយថា ៖ « គោលនយោបាយរឹតបន្តឹងដែលបានអនុវត្តនៅទីក្រុងទី២ និងទី១ ក្នុងខែតុលា និងវិច្ឆិកា មានប្រសិទ្ធភាពក្នុងការទប់ស្កាត់តម្លៃដ៏លឿននៃលំនៅឋាន » ។
កាលពីខែវិច្ឆិកា លំនៅឋានថ្មីក្នុងតម្លៃ ៩០៩,៨ប៊ីលានយន់ត្រូវបានលក់នៅទូទាំងប្រទេស ទាបជាងការលក់ក្នុងខែតុលា ដែលស្មើដល់ទៅ៩៤១,២ប៊ីលានយន់ឯណោះ ។ លំនៅឋានថ្មីទំហំសរុប១៣២,៥លានម៉ែត្រការ៉េ គឺស្ទើរតែនៅថេរតាំងពីខែតុលា ។
ទិន្នន័យបញ្ជាក់ថា ក្នុងរយៈពេល១១ខែដំបូងឆ្នាំនេះ ការវិនិយោគក្នុងគម្រោងលំនៅឋាននៅទូទាំងប្រទេសបានកើនឡើង៦%ប្រចាំឆ្នាំ ឬស្មើនឹង៦,២៥ទ្រីលានយន់ ខ្ពស់ជាងរយៈពេល១០ខែដំបូង០,១% ៕
ចែករំលែកព័តមាននេះ