មនុស្សជាច្រើនតែងបានឮ ឬអានសៀវភៅជាច្រើនក្បាលទាក់ទងនឹងការវិនិយោគក្នុងផ្នែកអចលនទ្រព្យ ។ ពួកគេព្យាយាមរក្សាទុកនូវប្រាក់ដែលខ្លួនសន្សំពីការងារដើម្បីបង់រំលស់លំនៅឋាន ឬខុនដូ ។
អចលនទ្រព្យ គឺជាទ្រព្យដែលគួរវិនិយោគបំផុត និងផ្តល់ផលតបស្នងល្អសម្រាប់អ្នកវិនិយោគក្នុងរយៈពេលត្រឹមត្រូវ ចំគោលដៅ ត្រូវទីតាំង និងពេលវេលាប៉ុណ្ណោះ ។ ហេតុផលវិនិយោគដែលមើលទៅមានតម្លៃពីមនុស្សជាច្រើន បានធ្វើឱ្យការវិនិយោគផ្នែកនេះផ្តល់ផលតបស្នងខ្ពស់ ។ ប៉ុន្តែការវិនិយោគអចលនទ្រព្យនឹងទទួលជោគជ័យជានិច្ចឬយ៉ាងណា ?
១-ជ្រើសរើសទីតាំងខុស ៖
ជាកត្តាដំបូងដែលសំខាន់បំផុត ហើយមនុស្សជាច្រើនក៏បានឮមករហូតដែរ ។ វិធីដែលធ្វើឱ្យអចលនទ្រព្យទទួលជោគជ័យ គឺផ្អែកលើទីតាំង ។ ទីតាំងនេះ គឺសំដៅដល់បរិស្ថានព័ទ្ធជុំវិញ ការរីកដុះដាល ភាពងាយស្រួលក្នុងជីវិតប្រចាំថ្ងៃ និងកំពុងមានតម្រូវការទិញពីអ្នករស់នៅតំបន់នេះផងដែរ ។
ការខុសឆ្គងរបស់អ្នកវិនិយោគអចលនទ្រព្យ ដែលខាតទុន គឺការជ្រើសរើសទីតាំងអន់ថយ ឬមិនគួរឱ្យចាប់អារម្មណ៍ ។ ទីតាំងអន់ថយ គឺជាចំណុចដែលមានមនុស្សណែនតាន់តាប់ចូលមកកាន់តែច្រើន ជាកន្លែងចោលសំរាម និងជាកន្លែងយករ៉ែដែលនាំឱ្យកខ្វក់ ដែលនឹងធ្វើឱ្យតម្លៃអចលនទ្រព្យធ្លាក់ចុះ ។
២-ទិញក្នុងតម្លៃខ្ពស់ខ្លាំងពេក ៖
ស្ថានភាពថមថយផ្នែកសេដ្ឋកិច្ចបានបង្កផលប៉ះពាល់ដល់អចលនទ្រព្យ ខណៈដែលអ្នកបានទិញវាក្នុងតម្លៃខ្ពស់ ។ តម្លៃអចលនទ្រព្យបានធ្លាក់ចុះជាបន្តបន្ទាប់ ដោយសារតម្រូវការថយចុះយ៉ាងទាន់ហន់ និងការជួលកម្លាំងពលកម្មការងារក្នុងបរិវេណនោះធ្លាក់ចុះ ។ ម្យ៉ាងទៀត ការបិទក្រុមហ៊ុន ជាពិសេស ការប្តូរទីតាំងនៃការផលិត ឬការផ្អាកជួលរបស់ក្រុមហ៊ុនខ្នាតធំ បានធ្វើឱ្យប៉ះពាល់ដល់កម្លាំងពលកម្ម, ក្រុម Demand បាត់បង់ទៅឆាប់រហ័ស បន្ទាប់មកប៉ះពាល់ដល់ផ្នែក Over Supply គឺបណ្តាលឱ្យតម្លៃអចលនទ្រព្យធ្លាក់ចុះ ដែលអ្នកទិញអាចនឹងខាតទុនបាន ។
៣-ចំណាយលើស ៖
ជាការចំណាយលើសពីប្រាក់របស់ខ្លួនតាំងចិត្តសន្សំទុក មិនថាចំណាយលើអចលនទ្រព្យ ឬបំណុលផ្សេងៗ ។ ក្រៅពីនេះ បើអត្រាការប្រាក់ខ្ពស់ទៀតនោះ នឹងធ្វើឱ្យមានភាពប្រថុយប្រថានដែលមិនបានតាំងចិត្ត ។ ដូច្នេះ ការចំណាយជាចម្បងអាចនឹងធ្វើឱ្យប្រាក់សុទ្ធដែលប្រើក្នុងជីវិតប្រចាំថ្ងៃនៅសល់ពុំគ្រប់គ្រាន់ ហើយត្រូវការខ្ចីប្រាក់បន្ថែមទៀត ។ ចុងក្រោយ ការមានអចលនទ្រព្យ គឺដូចជាធ្វើឱ្យជីវិតធ្លាក់ចុះ ដែលនេះមិនមែនជាការវិនិយោគដោយជោគជ័យឡើយ ។
៤-ប្រាក់ចំណូលធ្លាក់ចុះភ្លាមៗ ៖
ក្នុងទស្សនៈអ្នកទិញផ្ទះ គឺបញ្ហាបាត់បង់ការងារបានបណ្តាលឱ្យគ្មានប្រាក់ចំណូលបង់រំលស់ផ្ទះ ហើយក៏ត្រូវគ្រឹះស្ថានហិរញ្ញវត្ថុរឹបអូសយក ។ ចំណែកអ្នកវិនិយោគអចលនទ្រព្យវិញ គឺដោយសារការបន្ថែមតម្លៃខ្ពស់ជាបន្តបន្ទាប់ ដែលធ្វើឱ្យប្រាក់ចំណូលធ្លាក់ចុះ ខណៈទ្រព្យសម្បត្តិក៏ធ្លាក់ចុះដូចគ្នា ហើយអាចនឹងមិនគ្រប់គ្រាន់សម្រាប់បង់អត្រាការប្រាក់ផងដែរ ។
៥-មានការផ្លាស់ប្តូរ ៖
ការផ្លាស់ប្តូរនៃស្ថានភាពសេដ្ឋកិច្ច គ្រោះធម្មជាតិ ទឹកជំនន់ និងគ្រោះរំជួយដីជាដើម វានឹងធ្វើឱ្យអ្នកវិនិយោគអចលនទ្រព្យត្រូវប្រឈមមុខនឹងការធ្លាក់ចុះនៃតម្លៃយ៉ាងឆាប់រហ័ស ។ ដូច្នេះ ពាក្យថា «វិនិយោគលើអចលនទ្រព្យ គ្មានផ្លូវខាតទុន» អាចស័ក្តិសមនឹងការរីកចម្រើននាថ្ងៃអនាគត ។ ប៉ុន្តែអចលនទ្រព្យអាចមិនមែនជាការវិនិយោគដែលល្អបំផុតរហូតឡើយ ។
យើងអាចដឹងបានយ៉ាងដូចម្តេចថា តើគួរវិនិយោគក្នុងអចលនទ្រព្យឬអត់ ? យើងមានការងារស្ថិតស្ថេរហើយឬនៅ និងអាចទុកប្រាក់សម្រាប់បង់រំលស់ផ្ទះបានឬទេ ។ កុំជឿលើភ្នាក់ងារលក់ដែលនិយាយអូសទាញឱ្យវិនិយោគបែបទទួលបានចំណេញ ។ ការគិតបែបនេះ អាចនាំយើងទៅជួបនឹងគ្រោះថ្នាក់ខ្លាំងឡើង ។ ម្យ៉ាងទៀត កុំព្យាយាមបង្កើតបំណុលកាតឥណទាន ដែលនឹងធ្វើឱ្យការចំណាយកើនខ្ពស់ ៕
ចែករំលែកព័តមាននេះ