រាជធានីភ្នំពេញ ៖ សាលារៀនវេស្ទឡាញន៍សាខាច្បារអំពៅ និងសាខាសន្ធរម៉ុក កាលពីព្រឹកថ្ងៃសុក្រ ទី២៥ កុម្ភៈ បានសហការជាមួយសាលាខណ្ឌមានជ័យ និងសាលាបឋមសិក្សាច្បារអំពៅទី១ និងច្បារអំពៅទី២ រៀបចំយុទ្ធនាការអប់រំផ្សព្វផ្សាយស្តីពីទិវាសំអាតទីក្រុង ដោយមានការចូលរួមពីមន្ត្រីសាលាខណ្ឌ គណៈកម្មការនាយកសាលាវេស្ទឡាញន៍ និងណត្សឡាញន៍ និងលោកគ្រូ អ្នកគ្រូ សិស្សានុសិស្សជាង១២០នាក់ ។
ការចូលរួមធ្វើអនាម័យ បរិស្ថានល្អ និងសណ្តាប់ធ្នាប់មូលដ្ឋាននាពេលនេះ គឺស្របទៅតាមគោលការណ៍ទាំង១០របស់មន្ទីរអប់រំ យុវជន និងកីឡា និងយោងទៅតាមប្រសាសន៍របស់លោកកែប ជុតិមា អភិបាលរាជធានីភ្នំពេញ ក៏ដូចជាការចូលរួមចំណែករបស់ប្រជាពលរដ្ឋគ្រប់ស្រទាប់ និងអាជ្ញាធរមូលដ្ឋានលើការថែរក្សាសោភ័ណភាពទីក្រុងតាមពាក្យស្លោក ទុកដាក់សំរាមត្រឹមត្រូវ អនាម័យល្អ ទីក្រុងមានសោភ័ណភាពផងដែរ ។
យុវសិស្សមិន សុជាតា ជាប្រធានក្រុមទទួលខុសត្រូវផ្នែកបរិស្ថាននៃយុវសិស្សស្ម័គ្រចិត្តក្នុងការងារសហគមន៍របស់សាលារៀនវេស្ទឡាញន៍ បានឱ្យដឹងថា សំរាមគឺជាប្រភពមេរោគ បើសិនជាយើងមិនចេះពីរបៀបទុកដាក់ និងបែងចែកឱ្យបានល្អទេនោះ អាចនឹងជះឥទ្ធិពលអាក្រក់ធ្វើឱ្យមានការប៉ះពាល់ដល់សុខភាពសាធារណៈពុំខានឡើយ ។ យុទ្ធនាការនេះពិតជាបានពញ្ញាក់ស្មារតីប្រជាពលរដ្ឋឱ្យយល់ដឹងបន្ថែមទៀតពីការថែរក្សាអនាម័យទីក្រុង ដើម្បីលើកស្ទួយសុខុមាលភាព សណ្តាប់ធ្នាប់សាធារណៈ និងសោភ័ណភាពរាជធានីភ្នំពេញ ។
លោកអ៊ុំ ថៃលីទី ប្រធានក្រុមយុវជនស្ម័គ្រចិត្តក្នុងការងារសហគមន៍បានឱ្យដឹងថា យុទ្ធនាការនេះគឺ ជាគំនិតផ្តួចផ្តើមរបស់សិស្សានុសិស្សនៃក្រុមយុវជនស្ម័គ្រចិត្តក្នុងការងារសហគមន៍ក្រោមការជួយឧបត្ថម្ភជាថវិកា និងសំភារពីសាលារៀន និងវេស្ទឡាញន៍ និងណត្សឡាញន៍។ លោកបានបន្ថែមទៀតថា ក្រុមយុវជនស្ម័គ្រចិត្តបានចូលរួមយ៉ាងសកម្មលើការងារសង្គមជាច្រើនមានដូចជា ការជួយឧបត្ថម្ភជាសំភារដល់អនុវិទ្យាល័យសៀមរាប វិទ្យាល័យហ៊ុនសែន ព្រៃនប់ អង្គការម្លប់តាប៉ាង មជ្ឈមណ្ឌលកុមារអន្តរជាតិ រៃអង្គាសថវិកាជួយជនរងគ្រោះដោយឧបទ្ទវហេតុនៅកោះពេជ្រ និងកងទ័ពឈរជើងការពារប្រាសាទព្រះវិហារ ព្រមទាំងរៀបចំសិក្ខាសាលាអប់រំបែបព្រះពុទ្ធសាសនា ច្បាប់ចរាចរណ៍ផ្លូវគោក និងការអប់រំសុខភាពបន្តពូជជាដើម ។
លោកប៉ិច បូឡែន ប្រធាននាយកប្រតិបត្តិវេស្ទឡាញន៍ឌីវឺឡុប មិនគ្រូប បានមានប្រសាសន៍ថា សាលារៀនវេស្ទឡាញន៍ និងណត្សឡាញន៍មិនត្រឹមតែផ្តល់នូវការអប់រំប្រកបដោយគុណភាពប៉ុណ្ណោះទេ ប៉ុន្តែថែមទាំងបានយកចិត្តទុកដាក់យ៉ាងខ្លាំងលើការងារសង្គមកិច្ច និងការងារមនុស្សធម៌តាមរយៈការចូលរួមជាមួយស្ថាប័នរដ្ឋ ឯកជន អង្គការជាតិ និងអន្តរជាតិនានា។ សាលារៀនវេស្ទឡាញន៍ បានទទួលការគាំទ្រពីសំណាក់មាតាបិតាសិស្ស លើកម្មវិធីសិក្សា និងសេវាកម្មផ្សេងៗរបស់ខ្លួន ។ ដូចនេះសាលារៀនបានកសាងអគារសិក្សាកំពស់៤ជាន់ ស្ថិតនៅខាងជើងអគារពន្ធដារខណ្ឌមានជ័យ ខាងក្រោយមន្ទីរពេទ្យបង្អែកខណ្ឌ ដែលនឹងចាប់ផ្តើមដំណើរការនៅខែឧសភា ឆ្នាំ២០១១ ខាងមុខនេះ ។
គួរបញ្ជាក់ថា សាលារៀនវេស្ទឡាញន៍ បានបង្កើតក្រុមយុវជនស្ម័គ្រចិត្តការងារសហគមន៍ក្នុងទិសដៅអនុវត្តគម្រោងចំនួន៥របស់ខ្លួន ដូចជាគម្រោងការងារបរិស្ថាន ការងារសុខភាព ការងារសិទ្ធិមនុស្ស និងគោលការណ៍ប្រជាធិបតេយ្យ ការងារអភិវឌ្ឍន៍តម្លៃនៃការរស់នៅ និងការងារសុវត្ថិភាពចរាចរណ៍ផ្លូវគោក ។ មិនតែប៉ុណ្ណោះ ក៏មានគម្រោងអំពីការលើកកំពស់សីលធម៌ សុជីវធម៌ មនុស្សធម៌ និងឱ្យមានការទទួលខុសត្រូវរបស់កុមារ និងយុវជនក្នុងប្រទេសកម្ពុជាផងដែរ ៕
ចែករំលែកព័តមាននេះ