ឪពុកម្តាយទៅធ្វើកម្មករនៅថៃទុកកូន5នាក់ឱ្យជីដូនរើសកួរស្រូវចិញ្ចឹម
ខេត្តពោធិ៍សាត់ ៖ កុមារបងប្អូនបង្កើតចំនួន៥នាក់ រស់នៅជាមួយជីដូនចាស់ជរាស្ថិតក្នុងជីវភាពក្រីក្រលំបាកតោកយ៉ាកណាស់ដោយសារតែឪពុកម្ដាយ
ខេត្តពោធិ៍សាត់ ៖ កុមារបងប្អូនបង្កើតចំនួន៥នាក់ រស់នៅជាមួយជីដូនចាស់ជរាស្ថិតក្នុងជីវភាពក្រីក្រលំបាកតោកយ៉ាកណាស់ដោយសារតែឪពុកម្ដាយ
ខេត្តពោធិ៍សាត់ ៖ កុមារបងប្អូនបង្កើតចំនួន៥នាក់ រស់នៅជាមួយជីដូនចាស់ជរា ស្ថិតក្នុងជីវភាពក្រីក្រលំបាកតោកយ៉ាកណាស់ ដោយសារតែឪពុកម្ដាយទៅធ្វើកម្មករនៅឯប្រទេសថៃបាត់ អស់រយៈពេល៧ទៅ៨ខែមកហើយ គ្មានដំណឹងសោះគឺបាត់ឈឹង ។
ស្ត្រីចំណាស់ជាជីដូនឈ្មោះជិន យ៉េន អាយុ៦៤ឆ្នាំ រស់នៅភូមិទួលខ្មែរ ឃុំស្នាមព្រះ ស្រុកបាកាន ។ ចំណែកចៅៗ ដែលរស់នៅជាមួយចំនួន៥នាក់នោះមានឈ្មោះផៃ សុផាន ភេទស្រី អាយុ១៣ឆ្នាំ រៀនថ្នាក់ទី៦ ។ ឈ្មោះផៃ សម្ជស្ស ភេទស្រី អាយុ១០ឆ្នាំ រៀនថ្នាក់ទី០៤ ។ ឈ្មោះ ផៃ សុភាព ភេទស្រី អាយុ០៧ឆ្នាំ រៀនថ្នាក់ទី០២ ។ ឈ្មោះផៃ ផាន់នី ភេទប្រុស អាយុ០៥ឆ្នាំ និងឈ្មោះផៃ ផាន់ណា ភេទប្រុស អាយុ០១ឆ្នាំ០៥ខែ ។
ស្ត្រីជាជីដូនឈ្មោះ ជិន យ៉េន បានរៀបរាប់ប្រាប់អ្នកយកព័ត៌មានកោះសន្តិភាពយើងថា ឪពុកចៅៗទាំង៥នាក់នេះឈ្មោះហ៊ាន ផា អាយុ៤៣ឆ្នាំ និង ម្ដាយឈ្មោះកែ ផា អាយុ៣៣ឆ្នាំ ។
ដោយសារតែគ្មានមុខរបរអ្វីពិតប្រាកដក្នុងការរកប្រាក់ចំណូលចិញ្ចឹមកូននោះ ពួកគេទាំងពីរនាក់បាននាំគ្នាទៅធ្វើកម្មករ នៅឯប្រទេសថៃអស់រយៈពេល៧ទៅ៨ខែមកហើយ មិនទាន់ឃើញត្រឡប់មកវិញសោះ មិនដឹងថា វាសនាពួកគេយ៉ាងណានោះទេ ហើយក៏មិនដែលឃើញផ្ញើលុយមកឲ្យកូនទិញអង្ករហូបដែរ ។
ជីដូនរៀបរាប់ទៀតថា សព្វថ្ងៃនេះគាត់មានការលំបាកខ្លាំងណាស់ ក្នុងការទទួលបន្ទុកចិញ្ចឹមចៅទាំង៥នាក់ ដែល៣នាក់ទៅរៀន និង២នាក់ទៀតនៅតូចៗនៅឡើយ ។
រាល់ថ្ងៃគាត់ដើររើសកួរស្រូវតាមស្រែដែលគេច្រូតរួច មួយថ្ងៃបានមួយកន្តាំងពីរកន្តាំង យកមកបុកចេញជាអង្ករដើម្បីដាំបាយ ឬបបរឲ្យចៅហូប ដែលថ្ងៃខ្លះដាច់ពេលក៏មានដែរ ដោយសារសុខភាពទៅមិនរួច។ ចំណែកម្ហូបអាហារវិញមិនដែលបានអ្វីឆ្ងាញ់មានរសជាតិក្រៅពីស្ងោរផ្ទី ឬស្លឹកបាសនោះទេ ។
លោកយាយបានអំពាវនាវដល់សប្បុរសជនដែលមានចិត្តសប្បុរសធម៌ មេត្តាជួយឧបត្ថម្ភដល់ចៅៗរបស់គាត់ទាំង៥នាក់ផង ទោះជាគ្រឿងហូបចុក សម្លៀកបំពាក់ឬអ្វីក៏ដោយ ដើម្បីឲ្យពួកគេបានរស់និងបានរៀន ខណៈពេលដែលឪពុកម្ដាយរបស់គេបាត់ដំណឹងសូន្យឈឹង ៕
ចែករំលែកព័តមាននេះ