ម្នាក់ៗរន្ធត់គ្រប់គ្នា ពេលឃើញឡានឡើងខ្ទេចបែបនេះ
ខេត្តកណ្ដាល ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងកាលពីវេលាម៉ោង៤ និង៣០នាទីទៀបភ្លឺ ថ្ងៃទី១៦ ខែធ្នូ ឆ្នាំ២០១៦ ដោយរថយន្តហ៊ីយ៉ាន់ដាយ១គ្រឿង …
ខេត្តកណ្ដាល ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងកាលពីវេលាម៉ោង៤ និង៣០នាទីទៀបភ្លឺ ថ្ងៃទី១៦ ខែធ្នូ ឆ្នាំ២០១៦ ដោយរថយន្តហ៊ីយ៉ាន់ដាយ១គ្រឿងបានជ្រុលចង្កូតទៅបុករបងថ្មបណ្ដាលឲ្យក្រឡាប់ និងរងរបួសធ្ងន់-ស្រាល៤នាក់ ។ ហេតុការណ៍នេះកើតឡើងនៅតាមបណ្ដោយផ្លូវជាតិលេខ៦ ចន្លោះគីឡូម៉ែត្រលេខ ៣២-៣៣ ស្ថិតក្នុងភូមិសាមគ្គី ឃុំព្រែកដំបង ស្រុកមុខកំពូល ខេត្តកណ្ដាល ។
សមត្ថកិច្ចស្រុកមុខកំពូលបានឲ្យដឹងថា រថយន្តបង្កម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ 3D-1208 (អ្នកបើកបររត់គេចខ្លួនបាត់) ចំណែកជនរងគ្រោះទាំង៤នាក់មាន ១-ឈ្មោះ នង ងន់ឡែន ភេទប្រុស អាយុ២៦ឆ្នាំ ជាម្ចាស់រថយន្ត បានរងរបួសធ្ងន់, ២-ឈ្មោះ ធី ធឿន ភេទប្រុស អាយុ៤៨ឆ្នាំ ជាកម្មករ រងរបួសស្រាល, ៣-ឈ្មោះ ធឿន ថុន ភេទប្រុស អាយុ២១ឆ្នាំ ជាកម្មករ រងរបួសស្រាល និង ៤-ឈ្មោះ រឿន ឡៃ ភេទប្រុស អាយុ៣០ឆ្នាំ ជាកម្មករ រងរបួសស្រាល ។ ជនរងគ្រោះទាំង៤នាក់រស់នៅស្រុកកំពង់សៀម ខេត្តកំពង់ចាម ត្រូវបានគេបញ្ជូនទៅព្យាបាលនៅមន្ទីរពេទ្យភ្នំពេញទាំងអស់គ្នា ។
ប្រភពបន្តថា មុនពេលកើតហតុរថយន្តបង្កធ្វើដំណើរពីជើងទៅត្បូង លុះដល់ចំណុចកើតហេតុជាចំណុចផ្លូវកោង ក៏ជ្រុលទៅបុករបងថ្មបណ្ដាលឲ្យក្រឡាប់ និងរងរបួសធ្ងន់ និងស្រាលតែម្តង ។
ក្រោយពេលកើតហេតុ ជនរងគ្រោះទាំង៤នាក់ត្រូវបានបញ្ជូនទៅសង្គ្រោះនៅមន្ទីរពេទ្យនៅរាជធានីភ្នំពេញ ចំណែករថយន្តបង្កសមត្ថកិច្ចកំពុងរករថយន្តស្ទូចយកទៅរក្សាទុកនៅអធិការដ្ឋាននគរបាលស្រុកមុខកំពូលដើម្បីដោះស្រាយនៅពេលក្រោយ ៕
ចែករំលែកព័តមាននេះ