ចិន ៖ តាមប្រភពព័ត៌មាន Oddity Central ស្ត្រីចំណាស់ម្នាក់ អាយុ៦៣ឆ្នាំបានប្រកាសរកក្មេងស្រីមករួមដំណើរកម្សាន្តជាមួយ ដោយគាត់ជាអ្នកចេញលុយឱ្យទាំងអស់ ។ ពោលគឺអ្នកដែលស្ម័គ្រមករួមដំណើរកំសាន្តជាមួយលោកស្រី គឺមិនចាំបាច់ចេញលុយមួយរៀលទេ ហើយបានiPhone7 ប្រើទៀតផង។
លោកស្រី Li Yanling បាននិយាយថា លោកស្រីរស់នៅម្នាក់ឯង ក្រោយពេលកូនស្រីរបស់លោកស្រី ទៅរស់នៅប្រទេសកាណាដាបាត់ ។ ប្តីរបស់លោកស្រី បានទៅចូលរួមដំណើរកំសាន្តជាមួយមិត្តភក្តិ ដោយទុកឱ្យគាត់នៅម្នាក់ឯងក្នុងផ្ទះ នាទីក្រុងចឹងចូវ ប្រទេសចិន។
លោកស្រីបានសរសេរបង្ហោះចូលក្នុងប្រព័ន្ធបណ្តាញសង្គម WeChat ថា «ខ្ញុំរស់នៅក្នុងទីក្រុងចឹងចូវតែម្នាក់ឯង ហើយខ្ញុំចង់បានក្មេងស្រីចិត្តល្អម្នាក់ ដែលមានអាយុចន្លោះពី១៩ឆ្នាំ ទៅ២៤ឆ្នាំ ទៅដើរលេងជាមួយខ្ញុំ ដើម្បីមានគ្នានិយាយលេង និងជួយថតរូបគ្នាទៅវិញទៅមក ។ ខ្ញុំចង់ឃើញសមុទ្រនៅ Sanya នាពេលឆ្នាំនេះ តែខ្ញុំមិនចង់ទៅដើរលេងតែម្នាក់ឯងទេ» ។
លើសពីនេះទៀត លោកស្រីក៏បានបញ្ជាក់បន្ថែមថា ក្មេងស្រីដែលស្ម័គ្រចិត្តមកជាមួយលោកស្រី មិនចាំបាច់ត្រូវចំណាយលើការដើរលេងនោះទេ ។ អ្វីៗទាំងអស់ គឺលោកស្រីជាអ្នកចំណាយ។ អ្វីដែលកាន់តែអស្ចារ្យទៀតនោះ គឺលោកស្រីនឹងផ្តល់ជូន iPhone7 មួយគ្រឿងជារង្វាន់លើកទឹកចិត្ត ។
ក្រោយពីបានឃើញសារបង្ហោះរបស់លោកស្រី មនុស្សជាច្រើននៅលើបណ្តាញសង្គមបានស្ម័គ្រចិត្តចូលខ្លួន ទៅដើរលេងជាមួយលោកស្រី ដោយមិនទទួលយក iPhone7 ឬក៏ឲ្យលោកស្រីចំណាយប្រាក់លើខ្លួនឡើយ ។ អ្វីដែលពួកគេចង់ធ្វើ គឺមិនចង់ឲ្យលោកស្រីជួបភាពឯកា ។
ចែករំលែកព័តមាននេះ