រយៈពេល២៤ឆ្នាំ ជប៉ុនផ្តល់ជំនួយហិរញ្ញប្បទានជាង៣ពាន់លានដុល្លារ
រាជធានីភ្នំពេញ ៖ ចាប់ពីឆ្នាំ១៩៩២ដល់ឆ្នាំ២០១៦នេះ ប្រទេសជប៉ុនបានផ្ដល់ហិរញ្ញប្បទានទាំងហិរញ្ញប្បទានឥតសំណង និងឥណទានសម្បទានសម្រាប់គម្រោងអភិវឌ្ឍន៍ …
រាជធានីភ្នំពេញ ៖ ចាប់ពីឆ្នាំ១៩៩២ដល់ឆ្នាំ២០១៦នេះ ប្រទេសជប៉ុនបានផ្ដល់ហិរញ្ញប្បទានទាំងហិរញ្ញប្បទានឥតសំណង និងឥណទានសម្បទានសម្រាប់គម្រោងអភិវឌ្ឍន៍នានាដល់កម្ពុជា សរុបមានចំនួន៣.៤៨៣លានដុល្លារអាមេរិក ដែលក្នុងនោះហិរញ្ញប្បទានឥតសំណងចំនួនប្រមាណ២.៤៦៣លានដុល្លារអាមេរិក។ នេះបើយោងតាមខ្លឹមសារក្នុងជំនួបពិភាក្សាការងាររវាងលោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយលោកឯកអគ្គរាជទូតថ្មីរបស់ជប៉ុនប្រចាំកម្ពុជា ដែលធ្វើឡើងកាលពីថ្ងៃទី១៤ ធ្នូ នៅទីស្ដីការក្រសួងសេដ្ឋកិច្ច ។
ក្នុងជំនួបនេះដែរ លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ស្របតាមសេចក្ដីថ្លែងការណ៍រួមរបស់ប្រមុខដឹកនាំនៃប្រទេសទាំងពីរដែលបានគូសបញ្ជាក់ពីទំនាក់ទំនង និងកិច្ចសហប្រតិបត្តិការនៃប្រទេសទាំងពីរ កម្ពុជា-ជប៉ុនមិនត្រឹមតែជាដៃគូអភិវឌ្ឍន៍ដ៏ល្អក្នុងរយៈពេលវែងប៉ុណ្ណោះទេ ប៉ុន្ដែប្រទេសទាំងពីរគឺជាដៃគូយុទ្ធសាស្ត្រផងដែរ ។
លោកទេសរដ្ឋមន្ត្រីថ្លែងថា ៖ « គោលនយោបាយសហប្រតិបត្តិការរបស់ប្រទេសជប៉ុនសម្រាប់កម្ពុជា គឺជាការចូលរួមអនុវត្តឲ្យបានសម្រេចនូវគោលនយោបាយអភិវឌ្ឍន៍ ពិសេសគោលដៅកាត់បន្ថយភាពក្រីក្រ ដូចមានចែងនៅក្នុងយុទ្ធសាស្ត្រចតុកោណដំណាក់កាលទី៣ និងផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៤-២០១៨ » ។
លោកបន្ដថា បើទោះបីកម្ពុជាទទួលរងនូវបញ្ហាប្រឈមមួយចំនួនដូចជា គ្រោះធម្មជាតិ និងឥទ្ធិពលអាក្រក់ពីវិបត្តិកលិយុគហិរញ្ញវត្ថុអន្តរជាតិ ព្រមទាំងការធ្លាក់ចុះនៃសេដ្ឋកិច្ចសកលលោកក្ដី កម្ពុជាមានការអភិវឌ្ឍលើគ្រប់វិស័យ ជាពិសេសកំណើនសេដ្ឋកិច្ចខ្ពស់ល្អជាលំដាប់ប្រកបដោយចីរភាព និងបរិយាប័ន្នជាមធ្យមជាង៨%ក្នុង១ឆ្នាំ ក្នុងរយៈពេល១៥ឆ្នាំកន្លងមក។ ជាក់ស្ដែង នៅក្នុងឆ្នាំ២០១៥ កម្ពុជាសម្រេចបានកំណើនសេដ្ឋកិច្ច៧% និងអត្រានៃភាពក្រីក្របានថយចុះយ៉ាងខ្លាំង ស្របតាមគោលដៅដែលបានកំណត់នៅក្នុងយុទ្ធសាស្ត្រចតុកោណដំណាក់កាលទី៣ ។
ក្នុងឱកាសនោះ លោក Hidehisa HORINOUCHI ឯកអគ្គរាជទូតជប៉ុនប្រចាំកម្ពុជា បានគូសបញ្ជាក់ថា ប្រទេសកម្ពុជាមានការរីកចម្រើន និងផ្លាស់ប្ដូរគួរឲ្យកត់សម្គាល់ ។ លោកថ្លែងថា ៖ « ប្រទេសជប៉ុននឹងខិតខំបន្ដពង្រឹង និងពង្រីកកិច្ចសហប្រតិបត្តិការទាំងផ្នែកហិរញ្ញវត្ថុ និងបច្ចេកទេស ឲ្យស្របទៅនឹងយុទ្ធសាស្ត្រអភិវឌ្ឍន៍ជាតិរបស់កម្ពុជា ជាពិសេសគោលនយោបាយអភិវឌ្ឍន៍វិស័យឧស្សាហកម្ម សំដៅលើកកម្ពស់ ការធ្វើពិពិធកម្មសេដ្ឋកិច្ចកម្ពុជា » ។
ជាមួយគ្នានេះ លោកឯកអគ្គរាជទូតក៏បានសម្ដែងនូវការអបអរដែលកម្ពុជាឆ្លងផុតពីចំណាត់ថ្នាក់ប្រទេសមានចំណូលទាបទៅជាប្រទេសមានចំណូលមធ្យមកម្រិតទាប ។ ទន្ទឹមនឹងនេះ លោកក៏សម្ដែងនូវការអបអរសាទរអំពីកិច្ចខិតខំប្រឹងប្រែងរួមគ្នា ដោយសម្រេចបាននូវការហោះហើរត្រង់រវាងប្រទេសទាំងពីរ ដែលនោះជាសមិទ្ធផលដ៏ធំធេងមួយអាចធានាបាននូវគុណប្រយោជន៍យ៉ាងច្រើនរវាងប្រទេស និងប្រជាជននៃប្រទេសទាំងពីរ ។
ភាគីទាំងពីរកម្ពុជា-ជប៉ុន ក៏បានពិភាក្សាអំពីការយកចិត្តទុកដាក់បន្ថែមទៅលើការធ្វើពាណិជ្ជកម្ម និងលើកកម្ពស់ការវិនិយោគជប៉ុននៅកម្ពុជា ដែលអាចធានាបាននូវគុណប្រយោជន៍យ៉ាងច្រើនដល់ប្រទេសនិងប្រជាជនទាំងពីរ ហើយកម្ពុជាក៏ស្នើឲ្យភាគីមិត្តជំរុញវិនិយោគិនជប៉ុនឲ្យមកបណ្ដាក់ទុននៅកម្ពុជាបន្ថែមទៀត ខណៈកម្ពុជានឹងបន្ដជួយសម្រួលដល់បរិយាកាសវិនិយោគរបស់វិនិយោគិនទាំងអស់ដែលគ្រោងនឹងមកបណ្ដាក់ទុននៅកម្ពុជា នាពេលអនាគត ។
គួររំឭកថា ទំហំពាណិជ្ជកម្មនៃប្រទេសទាំងពីរកម្ពុជា-ជប៉ុននៅពេលបច្ចុប្បន្ននេះ មានប្រមាណតែជាង១ពាន់លានដុល្លារប៉ុណ្ណោះ បើធៀបជាមួយបណ្ដាប្រទេសក្នុងតំបន់ គឺនៅមានកម្រិតតិចតួចនៅឡើយ ៕
ចែករំលែកព័តមាននេះ