មកដល់ពេលនេះស្ថានការណ៍នៅក្នុងប្រទេសថៃ ជាពិសេសនៅក្នុងទីក្រុងបាងកកពុំទាន់មានផ្ដល់សញ្ញាបង្ហាញពីភាពធូរស្រាលនៅឡើយទេ ផ្ទុយទៅវិញហាក់ដូចជាមានភាពតានតឹងកាន់តែខ្លាំងឡើងនៅត្រង់ថា ភាគីជំលោះទាំង២លោកនាយករដ្ឋមន្ដ្រីអាប់ភីស៊ីត និងក្រុមបាតុករអាវក្រហមដែលមានភក្ដីភាពចំពោះលោកថាក់ស៊ីននៅតែមិនចុះសម្រុងគ្នាចំពោះការចរចាសន្ដិភាពដើម្បីបញ្ចប់វិបត្ដិនយោបាយដែលអូសបន្លាយអស់រយៈពេលជាយូរមកហើយ ។
ការមិនចុះសម្រុងគ្នាលើកចុងក្រោយនេះគឺក្រុមបាតុករអាវក្រហមប្រកាសថា ពួកគេនឹងចរចាបញ្ចប់ការធ្វើបាតុកម្មជាមួយលោកអាប់ភីស៊ីត ប្រសិនបើលោកអាប់ភីស៊ីត យល់ព្រមដកទ័ពចេញពីកន្លែងធ្វើបាតុកម្មរបស់ពួកគេ ចំណែកខាងលោកអាប់ភីស៊ីត វិញថា រូបលោកនឹងចរចាជាមួយមេដឹកនាំក្រុមអាវក្រហម ប្រសិនបើក្រុមអាវក្រហមបញ្ចប់ការធ្វើបាតុកម្មរបស់ពួកគេជាមុន ។
ការខ្វែងគំនិតគ្នានេះត្រូវបានអ្នកវិភាគស្ថានការណ៍នយោបាយនៅក្នុងប្រទេសថៃនិយាយថា អាចមានការផ្ទុះអាវុធ និងការផ្ទុះឡើងអំពើហិង្សាបណ្ដាលឱ្យស្លាប់មនុស្ស និងរបួសជាច្រើននាក់ថែមទៀត ។ គិតត្រឹមវេលារសៀលថ្ងៃទី១៧ ឧសភា ចំនួនអ្នកស្លាប់ និងរបួសនៅក្នុងការប៉ះទង្គិចគ្នារវាងប៉ូលិស និងក្រុមបាតុករអាវក្រហមរយៈពេល៤ថ្ងៃជាប់ៗគ្នា គឺអ្នកស្លាប់កើនឡើងដល់៣៥នាក់ និងរបួស២៥១នាក់ រួចគេរំពឹងថា នៅមានអ្នកស្លាប់ថែមទៀត ៕
ចែករំលែកព័តមាននេះ