ខេត្តកណ្ដាល ៖ បុរសម្នាក់ខិលខូចរកលេខដាក់គ្មានទេ អំពើល្អមិនគិតធ្វើ គឺសាងតែអំពើអាក្រក់ ហើយត្រូវបានជាប់ពន្ធនាគារ២ដងមកហើយ គឺលើកទី១ លួចមាន់អ្នកស្រុកត្រូវចាប់ខ្លួន
ខេត្តកណ្ដាល ៖ បុរសម្នាក់ខិលខូចរកលេខដាក់គ្មានទេ អំពើល្អមិនគិតធ្វើ គឺសាងតែអំពើអាក្រក់ ហើយត្រូវបានជាប់ពន្ធនាគារ២ដងមកហើយ គឺលើកទី១ លួចមាន់អ្នកស្រុកត្រូវចាប់ខ្លួន និងជាប់គុករយៈពេល ១៣ខែ និងលើកទី២ លួចអាវុធរបស់នគរបាល ប៉ុស្តិ៍ដំណាក់អំពិល ជាប់គុក១៨ខែ។ ប៉ុន្តែមិនព្រមរាងចាលឡើយ។ រីឯម្ដងនេះ បានផឹកស្រាស្រវឹងស្រែកជេរគំរាមសម្លាប់អតីតជាអធិការរងនគរបាលស្រុក អង្គស្នួលម្នាក់ និងបានវាយបំផ្លាញទ្រព្យសម្បត្តិនៅក្នុងផ្ទះរបស់គាត់បណ្ដាលឲ្យរងការខូចខាតខ្ទេចខ្ទី។
ខណៈនោះត្រូវបាននគរបាលស្រុកចុះទៅសហការណ៍ ជាមួយនគរបាលប៉ុស្ដិ៍ ដំណាក់អំពិល ឃាត់ខ្លួនបាននាំយកទៅសាកសួរ និងកសាងសំណុំរឿងបញ្ជូនទៅសាលាដំបូងខេត្តកណ្ដាលចាត់ការតាមច្បាប់។ ការខចាប់ខ្លួននោះបានធ្វើឡើងកាលពីម៉ោង៤និង ៣០នាទី ថៃ្ងទី១១ ខែធ្នូ ឆ្នាំ២០១៦ នៅចំណុចភូមិពងទឹក ឃុំដំណាក់អំពិល ស្រុកអង្គស្នួល ខេត្តកណ្តាល។ ជនសង្ស័យដែលត្រូវនគរបាលឃាត់ខ្លួននោះ ឈ្មោះ ស៊ីម ជីម ហៅមាំង អាយុ៣០ឆ្នាំ ជនជាតិខែ្មរ មានទីលំនៅក្នុងភូមិឃុំកើតហេតុខាងលើ។
ដោយឡែកជនរងគ្រោះឈ្មោះ រ៉េត ជា ភេទប្រុស អាយុ៥៦ឆ្នាំ ជនជាតិខែ្មរ ជាអធិការរង នគរបាលស្រុកអង្គស្នួល មានទីលំនៅក្នុងភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល។ ត្រូវជននោះវាយបំផ្លាញរបស់របរមួយចំនួនមានដូចជាធុងចម្រោះទឹកស្អាតចំនួន០១ ជើងទម្រធុងចម្រោះទឹកស្អាត២ ចានបាយ និងស្លាបព្រាមួយចំនួនទៀតផងដែរ។ តាមប្រភពព័ត៌មានបានឲ្យដឹងថា នៅមុនពេលកើតហេតុជនសង្ស័យខាងលើបានផឹកស៊ីស្រវឹងជោគជាំ ហើយបានរករឿងអតីតអធិការនគរបាលស្រុកអង្គស្នួលម្នាក់ ដោយជននោះបានជេរប្រមាថ និងគំរាមសម្លាប់ជនរងគ្រោះយកទៅស្ងោរស៊ុប។
មិនតែប៉ុណ្ណោះបានវាយបំផ្លាញសម្ភារខាងលើថែមទៀត ទើបត្រូវនគរបាលចុះទៅចាប់ខ្លួនបាននាំយកទៅសាកសួរ និងកសាងសំណុំរឿងបញ្ជូនទៅសាលាដំបូងខេត្តកណ្ដាលចាត់ការតាមច្បាប់។ ក្រោយពេលចាប់ខ្លួនជននោះបានសារភាពថា ធ្លាប់ជាប់ពន្ធនាគារ២ដងមកហើយគឺលើកទី១លួចមាន់អ្នកស្រុកត្រូវចាប់ខ្លួន ជាប់គុករយៈពេល ១៣ខែ និងលើកទី២ លួចអាវុធរបស់នគរបាល ប៉ុស្តិ៍ដំណាក់អំពិលជាប់គុក១៨ខែ។ ពេលនេះត្រូវនគរបាលឃាត់ខ្លួនញាត់ចូលគុកជាលើកទី៣ទៀតហើយ៕
ចែករំលែកព័តមាននេះ