ខេត្តកំពង់ឆ្នាំង ៖ បទល្មើសលួចកាប់ដើមធ្នង់ចំនួន២៣ដើម ពីក្នុងព្រៃសហគមន៍ ព្រៃឈើពោធិជ្រក ជម្រកឬទ្ធិសែន ស្ថិតក្នុងភូមិដំណាក់កកោះ ឃុំពោធិ ស្រុកកំពង់លែង នៅតែជាប្រធានបទក្តៅនៅឡើយ ខណៈដែលជនប្រព្រឹត្តបទល្មើសមិនទាន់ត្រូវបានចាប់ខ្លួនមកផ្តន្ទាទោសតាមច្បាប់។ បទល្មើសយ៉ាងព្រហើននេះដែរ ត្រូវបានឯកឧត្តម ឈួរ ចន្ទ័ឌឿន អភិបាលខេត្តកំពង់ឆ្នាំង បានលើកឡើងក្នុងកិច្ចប្រជុំថា វាមិនមែនជាបទល្មើសតូចតាចឡើយ ត្រូវមានវិធានការ ឲ្យបានម៉ឺងម៉ាត់បំផុត ។
ឯកឧត្តម អភិបាលខេត្តកំពង់ឆ្នាំង បានសង្កត់ថា បទល្មើសព្រៃឈើ បឹងបួ ទន្លេ ភ្នំ កើតមានគ្រប់កន្លែង តើការ ការពារយ៉ាងម៉េច ។ ដូចនៅស្រុកកំពង់លែង លួចកាប់ដើមធ្នង់អស់២០ដើម តើការពារយ៉ាងម៉េច បើកាប់១ដើម ២ដើម ចុះថាគេលួច តែនេះកាប់ម្តងជាង២០ដើម។ រឿងនេះមិនមែនប្រជាពលរដ្ឋមិនដឹងនោះទេ អស់លោកធ្វើអីក៏គាត់ដឹងដែរ ចង់មិនចង់កាប់ហើយ កាត់ជាកង់ៗ ដឹកជញ្ជូនយកទៅកាន់កន្លែងសិប្បកម្ម តុ ទូ មួយកន្លែង នៅភូមិច្រណូកទៀត កុំថាគេមិនដឹង នេះជាការរំលោភមួយយ៉ាងធំ។
ឯកឧត្តម អភិបាលខេត្ត បានស្នើឲ្យ លោក សំ ចាន់ អភិបាលស្រុកកំពង់លែង ថាបើមានការរំលោភបែបនេះ ត្រូវចាត់ការភ្លាម ហើយបើចាត់ការមិនបានសុំអន្ត រាគមន៍ពីឯកឧត្តមនឹងចាត់ការហើយ។ ជុំវិញបញ្ហាលួចកាប់ដើមធ្នង់២៣ដើម ពីក្នុងព្រៃសហគមន៍នេះដែរ មន្ត្រីជំនាញរដ្ឋបាលព្រៃឈើ បាន ឲ្យដឹងថា បានបញ្ជូនសំណុំរឿង ដល់ដៃតុលាការយូហើយ តែមកដល់ពេលនេះមិនទាន់ឃើញ តុលាការចាត់ការបែបណានោះទេ ដោយក្នុងនោះបានចោទ ប្រកាន់ជនសង្ស័យជាមេខ្លោងម្នាក់ ឈ្មោះ ជៀប តឿង មានទីលំនៅ ភូមិកង្កែប ឃុំច្រណូក ស្រុកកំពង់លែង ឈ្មោះនេះក៏ជាម្ចាស់សប្បកម្មឈើ អត់ច្បាប់ផងដែរ ។
ឈ្មោះនេះ ត្រូវបានចោទប្រកាន់ពីបទ លួចកាប់ដើមធ្នង់២៣ដើម មានមុខកាត់ធំៗ ពីក្នុងសហគមន៍ ហើយបើយោងតាមផ្លូវច្បាប់ ត្រូវផាកពិន័យ ហើយនឹងត្រូវដាក់ពន្ឋនាគារទៀត។ សូមមរំឮកថា ក្នុងអំឡុងបុណ្យកាន់បិណ្ឌ មានជនពុំស្គាល់មុខបានលួចកាប់ដើមធ្នង់មានមុខកាត់ធំចំនួន២៣ដើម យកចេញពីព្រៃសហគមន៍ខាងលើ ស្ថិតក្នុងភូមិដំណាក់កកោះ ឃុំពោធិ ស្រុកកំពង់លែង ហើយបានបែកការណ៍ដឹងដល់សហគមន៍ នៅថ្ងៃទី៥ ខែតុលា ឆ្នាំ២០១៦ ទើបដាក់ពាក្យប្តឹងមកសមត្ថកិច្ច និងត្រូវបានមន្ត្រីជំនាញ ចុះស្រាវជ្រាវក្នុងករណីបទល្មើសនេះ ហើយបានស្គាល់អត្តសញ្ញាណដែរ តែខាងតុលាការ នៅមិនទាន់ចាត់ការនៅឡើយ ៕
ចែករំលែកព័តមាននេះ