ខេត្តបាត់ដំបង ៖ សេចក្តីរាយការណ៍ឱ្យដឹងថា មានការចុះបង្ក្រាបរបស់កម្លាំងកងរាជអាវុធហត្ថ សហការជាមួយមន្ត្រីរដ្ឋបាលព្រៃ ឈើបាត់ដំបង បានចាប់ឃាត់រថយន្តយោធាមួយគ្រឿង កាលពីវេលាម៉ោង៣រសៀលថ្ងៃទី១៤ ធ្នូ នេះ ស្ថិតតាមបណ្តោយផ្លូវជាតិលេខ៥ ត្រង់ចំណុចភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង ដោយមានដឹកឈើប្រភេទធ្នង់ជាច្រើនដុំ និងឃាត់ខ្លួនបុរស២នាក់ផងដែរ ។
ប្រភពឱ្យដឹងថា ជនសង្ស័យទាំង២នាក់ដែលត្រូវឃាត់ខ្លួន ម្នាក់ឈ្មោះងឿម សំណាង អាយុ២៦ឆ្នាំ ជាមន្ត្រីយោធាកងទ័ពជើងគោកទិសទី៤ និងម្នាក់ទៀតឈ្មោះស្វាយ យឿន អាយុ៤៤ឆ្នាំ ជាមន្ត្រីអង្គភាពជាមួយគ្នា ។ រីឯរថយន្តខាងលើ អត់មានពាក់ស្លាកលេខទេ តែជាប្រភេទរថយន្តយោធា ដោយត្រូវកម្លាំងរកឃើញឈើប្រភេទធ្នង់ចំនួន៩៨ដុំ ។ បច្ចុប្បន្ន ឈើធ្នង់ត្រូវបានយកទៅរក្សាទុកនៅខណ្ឌរដ្ឋបាលព្រៃឈើបាត់ដំបង ដើម្បីចាត់ការតាមច្បាប់ ។
ចែករំលែកព័តមាននេះ