ឥណ្ឌាអាចមកវិនិយោគលើវិស័យសំខាន់ៗជាច្រើននៅកម្ពុជា
រាជធានីភ្នំពេញ ៖ នៅក្នុងជំនួបជាមួយប្រតិភូអ្នកសារព័ត៌មានឥណ្ឌា ដឹកនាំដោយលោក អ៊ិន ស៊ីតធូ (N. Sitlhou) លេខាទូតទី១នៃស្ថានទូតឥណ្ឌាប្រចាំកម្ពុជា …
រាជធានីភ្នំពេញ ៖ នៅក្នុងជំនួបជាមួយប្រតិភូអ្នកសារព័ត៌មានឥណ្ឌា ដឹកនាំដោយលោក អ៊ិន ស៊ីតធូ (N. Sitlhou) លេខាទូតទី១នៃស្ថានទូតឥណ្ឌាប្រចាំកម្ពុជា កាលពីរសៀលថ្ងៃទី១២ ធ្នូ កន្លងទៅ រដ្ឋមន្ត្រីក្រសួងពាណិជ្ជកម្មកម្ពុជា បានគូសបញ្ជាក់ថា វិនិយោគិនឥណ្ឌាអាចវិនិយោគលើវិស័យសំខាន់ៗជាច្រើននៅកម្ពុជាដូចជា ការអប់រំ, បច្ចេកវិទ្យា, ទេសចរណ៍, ភាពយន្ត, និងសហគ្រាសធុនតូច និងមធ្យម ដោយសារបច្ចុប្បន្ន កម្ពុជាកំពុងតែធ្វើទំនើបកម្មទៅលើវិស័យឧស្សាហកម្ម ចេញពីការប្រើប្រាស់កម្លាំងអតិបរមា ទៅជាការប្រើប្រាស់ជំនាញខ្ពស់នៅត្រឹមឆ្នាំ២០២៥ ។
ថ្លែងប្រាប់ប្រតិភូអ្នកសារព័ត៌មានឥណ្ឌានាឱកាសនោះ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានគូសបញ្ជាក់ថា ៖ « កម្ពុជាមានគោលនយោបាយលើកទឹកចិត្តសម្រាប់វិនិយោគិនល្អជាងគេក្នុងតំបន់ ដោយសារអ្នកវិនិយោគមិនត្រឹមតែអាចគ្រប់គ្រងជំនួញ និងប្រមូលប្រាក់ចំណេញបាន១០០%ប៉ុណ្ណោះទេ ប៉ុន្តែពួកគេថែមទាំងអាចរីករាយជាមួយប្រព័ន្ធអនុគ្រោះពន្ធផ្សេងៗផ្តល់ដោយសហគមន៍អឺរ៉ុប, សហរដ្ឋអាមេរិក, ប្រទេសចិន និងប្រទេសផ្សេងៗទៀត » ។
លោក ប៉ាន សូរស័ក្តិ មានប្រសាសន៍បន្ថែមថា ៖ « នៅក្រោមក្របខ័ណ្ឌភាពជាដៃគូសេដ្ឋកិច្ចទូលាយកម្រិតតំបន់ (RCEP) រាជរដ្ឋាភិបាលកម្ពុជាបានដាក់ចេញនូវគោលនយោបាយបើកចំហជើងមេឃ ដើម្បីស្វាគមន៍រាល់ការហោះហើរដោយត្រង់ពីប្រទេសឥណ្ឌា សំដៅទាក់ទាញវិនិយោគិន និងភ្ញៀវទេសចរ ចូលមកទស្សនាប្រទេសកម្ពុជាឲ្យបានកាន់តែច្រើន » ។
ជាមួយគ្នានេះ លោករដ្ឋមន្ត្រី ក៏បានលើកឡើងពីកំណើនសេដ្ឋកិច្ចរបស់កម្ពុជា ដែលសម្រេចបានក្នុងរង្វង់៧%រៀងរាល់ឆ្នាំ ក្នុងរយៈពេល១ទសវត្សរ៍ចុងក្រោយ និងលក្ខណៈពិសេសនៃទីតាំងភូមិសាស្ត្រសម្រាប់គម្រោងវិនិយោគតូចធំ ព្រមទាំងគោលនយោបាយអភិវឌ្ឍន៍ឧស្សាហកម្ម (IDP) របស់កម្ពុជា ឆ្នាំ២០១៥-២០២៥ ថែមទៀត ។
ដោយឡែក ប្រតិភូសារព័ត៌មានឥណ្ឌា ក៏បានសន្យាថា នឹងនាំយកព័ត៌មានទាំងនេះដើម្បីចែករំលែកជូនដល់វិនិយោគិនឥណ្ឌា និងប្រជាជនឥណ្ឌាទាំងអស់បន្ទាប់ពីបញ្ចប់ទស្សនកិច្ចរបស់ខ្លួននៅកម្ពុជាផងដែរ ។
យោងតាមរបាយការណ៍ស្ថានទូតឥណ្ឌាប្រចាំកម្ពុជា ទំហំពាណិជ្ជកម្មទ្វេភាគីកម្ពុជា-ឥណ្ឌា បានបន្ដមានកំណើនគួរឲ្យកត់សម្គាល់ពី១០៧,០៧លានដុល្លារក្នុងឆ្នាំ២០១១-២០១២ ដល់១៦៨,៣៨លានដុល្លារពីខែមករាដល់ខែវិច្ឆិកាឆ្នាំ២០១៥ ។
ចំណែកប្រជាជនឥណ្ឌាដែលកំពុងបម្រើការនៅវិស័យផ្សេងៗក្នុងប្រទេសកម្ពុជាមានប្រមាណ១.៥០០នាក់ ដែលភាគច្រើនពួកគេធ្វើការជាបុគ្គលិកអង្គការអន្តរជាតិ និងបណ្ដាទីភ្នាក់ងារនៅទីក្រុងភ្នំពេញ ។
បន្ថែមលើសពីនេះ ក៏មានសភាពាណិជ្ជកម្មឥណ្ឌានៅកម្ពុជាផងដែរ ដែលបានបង្កើតឡើងនៅឆ្នាំ២០១២ និងមានភារកិច្ចរៀបចំកម្មវិធីមួយចំនួនដូចជា សិក្ខាសាលាឬព្រឹត្តិការណ៍ ពាណិជ្ជកម្មជាដើម។ ទន្ទឹមនឹងនេះ អង្គភាព មួយនេះក៏បានធ្វើការជាមួយស្ថានទូតឥណ្ឌាប្រចាំកម្ពុជា ដើម្បីដោះស្រាយបញ្ហាប្រឈមរបស់វិនិយោគិនឥណ្ឌាដែលកំពុងរកស៊ីនៅកម្ពុជាផងដែរ ៕
ចែករំលែកព័តមាននេះ