រាជធានីភ្នំពេញ ៖ ក្រសួងសេដ្ឋកិច្ចនិងហិរញ្ញវត្ថុ និងដៃគូអភិវឌ្ឍន៍នានាបានបើកកិច្ចប្រជុំក្រុមការងារបច្ចេកទេសសម្រាប់កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដោយផ្តោតសំខាន់ទៅលើប្រធានបទសំខាន់ចំនួនពីរគឺ ១-របាយការណ៍ត្រួតពិនិត្យតាមដានសមិទ្ធកម្មប្រចាំត្រីមាសទី៣ឆ្នាំ២០១៦ និង២-វឌ្ឍនភាពការកែសម្រួលផែនការសកម្មភាពរួមដំណាក់កាលទី៣ (CAP3) ។ នេះបើយោងតាមសេចក្តីប្រកាសព័ត៌មានចេញផ្សាយកាលពីម្សិលមិញ ។
សេចក្ដីប្រកាសដដែលបានបន្ដថា ក្នុងប្រធានបទទី១ លទ្ធផលសម្រេចបានច្រើនតាមផ្នែកសំខាន់ៗនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ តួយ៉ាងមាន ៖
ក-បន្តពង្រឹងភាពជឿទុកចិត្តនៃថវិកា លំហូរចំណូលនិងចំណាយថវិកាកាន់តែរលូន ការទូទាត់សាច់ប្រាក់កាន់តែមានភាពល្អប្រសើរ ព្រមទាំងកាត់បន្ថយបានទាំងស្រុងនូវបញ្ហាបំណុលកកស្ទះ ។
ខ-បន្តពង្រឹងគណនេយ្យភាពហិរញ្ញវត្ថុ កិច្ចការសំខាន់ៗ និងចាំបាច់មួយចំនួនត្រូវបានបន្តពង្រឹងនិងបញ្ចប់ ជាពិសេស ការរៀបចំ និងដាក់ឱ្យអនុវត្តប្រព័ន្ធព័ត៌មានវិទ្យាសម្រាប់ការគ្រប់គ្រងហិរញ្ញវត្ថុសាធារណៈឱ្យសម្រេចតាមគោលដៅ ។ ទន្ទឹមនឹងនេះ ត្រូវរៀបចំបញ្ចប់ការងារជាមូលដ្ឋានដែលនៅសេសសល់នៅក្នុងដំណាក់កាលទី១ ដើម្បីឈានឆ្ពោះទៅអនុវត្តដំណាក់កាលទី២ នៅឆ្នាំ២០១៧ ។
គ-ការផ្សារភ្ជាប់ថវិកាទៅនឹងគោលនយោបាយ គឺជាគោលដៅស្នូលនៃដំណាក់កាលទី៣ ក្នុងនោះការងារអាទិភាពមួយចំនួនត្រូវបានពង្រឹងដូចជា ការអនុវត្តថវិកាកម្មវិធី និងអង្គភាពថវិកានៅតាមក្រសួង ស្ថាប័ន ការពិនិត្យកែសម្រួល និងរៀបចំយុទ្ធសាស្ត្រកែទម្រង់ប្រព័ន្ធថវិកាឆ្នាំ២០១៧-២០២៥ និងគោលនយោបាយវិមជ្ឈការហិរញ្ញវត្ថុនៅថ្នាក់ក្រោមជាតិ ។
ឃ-ការត្រៀមលក្ខណៈសម្រាប់ជំហានបន្ទាប់ ធ្វើការពិនិត្យ និងរៀបចំក្របខ័ណ្ឌថវិកាក្របខ័ណ្ឌគណនេយ្យភាព និងក្របខ័ណ្ឌសវនកម្មផ្អែកលើសមិទ្ធកម្មដែលផ្សារភ្ជាប់ការចំណាយ សម្រាប់កម្មវិធីនីមួយៗ ។
ង-ការគាំទ្រដល់ការអនុវត្តកម្មវិធីកែទម្រង់ប្រកបដោយជោគជ័យនិងចីរភាព ពង្រឹងនិងពង្រីកភាពជាអ្នកដឹកនាំ សមត្ថភាពគ្រប់គ្រង សមត្ថភាពបច្ចេកទេស ភាពជាម្ចាស់ការទទួលខុសត្រូវ និងមានសមានគតិភាពជាមួយការគាំទ្រ ការអនុវត្តកម្មវិធី កែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៣ និងដំណាក់កាលបន្ទាប់ ។
ចំណែកប្រធានបទទី២ គឺជាផែនការសកម្មភាពរួមដំណាក់កាលទី៣ នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈត្រូវបានកែសម្រួល និងដាក់ចេញជា៥ផ្នែក ២១គោលបំណង និង៦៨ចង្កោមសកម្មភាព ដែលតម្រូវឱ្យគ្រប់ក្រសួង ស្ថាប័ន និងអង្គភាពក្រោមឱវាទនៃក្រសួងសេដ្ឋកិច្ច និងហិរញ្ញវត្ថុ រៀបចំផែនការសកម្មភាពលម្អិតទៅតាមគោលបំណងនិងចង្កោមសកម្មភាពនៅក្នុងផែនការសកម្មភាពដំណាក់កាលទី៣ ដែលពាក់ព័ន្ធនឹងមុខងារ និងភារកិច្ចរបស់សាមីអង្គភាព ដើម្បីគាំទ្រដល់ការអនុវត្តកម្មវិធីកែទម្រង់ដំណាក់កាលទី៣ ការផ្សារភ្ជាប់ថវិកាទៅនឹងគោលនយោបាយ ។
ក្នុងឱកាសនោះដែរ លោកបណ្ឌិត អូន ព័ន្ធមុនីរ័ត្ន ទេសរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានផ្តល់អនុសាសន៍ និងណែនាំជាវិធានការសម្រាប់អនុវត្តបន្ត ដោយសំណូមពរដល់គ្រប់ភាគីពាក់ព័ន្ធ ជាពិសេស តំណាងដៃគូអភិវឌ្ឍទាំងអស់បន្តជួយគាំទ្ររាជរដ្ឋាភិបាល លើការងារកែទម្រង់ការគ្រប់គ្រងហិរញ្ញវត្ថុសាធារណៈ ក៏ដូចជាកម្មវិធីកែទម្រង់ធំៗដទៃទៀត ដែលមានភាពប្រទាក់ក្រឡាគ្នា និងកំពុងបំពេញឱ្យគ្នា ។
លើសពីនេះ លោកទេសរដ្ឋមន្ត្រី ក៏បានអំពាវនាវដល់គ្រប់ក្រសួងស្ថាប័នពាក់ព័ន្ធទាំងអស់បន្តការយកចិត្តទុកដាក់ខ្ពស់ក្នុងការចូលរួមអនុវត្តកម្មវិធីកែទម្រង់នេះ ជាពិសេស ការពិនិត្យនិងធ្វើបច្ចុប្បន្នភាពផែនការសកម្មភាពរួមដំណាក់កាលទី៣ ដើម្បីគាំទ្រដល់ការអនុវត្តកម្មវិធីកែទម្រង់ដំណាក់កាលទី៣ ការផ្សារភ្ជាប់ថវិកាទៅនឹងគោលនយោបាយ ដែលជាកម្មវិធីអាទិភាពមួយក្នុងចំណោមកម្មវិធីកែទម្រង់ចម្បងទាំងបីរបស់រាជរដ្ឋាភិបាល ៕
ចែករំលែកព័តមាននេះ