រាជធានីភ្នំពេញ ៖ នៅក្នុងឆ្នាំ២០១៦នេះ អត្រានៃការលក់ស៊ីមកាតទូរស័ព្ទចល័តមានចំនួនប្រមាណ១៩លាន៥សែន ស្មើនឹង១៣០%។ ចំណែកអត្រាអ្នកជាវសេវាអ៊ីនធើរណេតមានប្រមាណ៧លាន ស្មើនឹងប្រមាណ៤៥%នៃចំនួនប្រជាពលរដ្ឋកម្ពុជាសរុប ។ នេះបើតាមប្រសាសន៍លោករដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានថ្លែងនៅក្នុងពិធីប្រកាសឲ្យប្រើកម្មវិធីផ្ដល់ព័ត៌មានសេវាសាធារណៈតាមរយៈទូរស័ព្ទស្មាតហ្វូន កាលពីថ្ងៃទី១៣ ធ្នូ នៅសាលាភូមិន្ទរដ្ឋបាល ។
លោករដ្ឋមន្ត្រី ត្រាំ អ៊ីវតឹក លើកឡើងថា បច្ចុប្បន្ននេះ នៅកម្ពុជាមានការរីកចម្រើនយ៉ាងខ្លាំងគួរឲ្យកត់សម្គាល់នូវប្រព័ន្ធបច្ចេកវិទ្យា និងព័ត៌មាន ។ ជាក់ស្ដែង នៅក្នុងឆ្នាំ២០១៥កន្លងមក តាមតួលេខរបស់ក្រសួងប្រៃសណីយ៍និងទូរគមនាគមន៍ កម្ពុជាបានពង្រីកខ្សែកាបអុបទិចប្រមាណ២៦.៤១១គីឡូម៉ែត្រ ដែលមានក្រុមហ៊ុនចំនួនបីនៅកម្ពុជា បានទទួលអាជ្ញាប័ណ្ណធ្វើអាជីវកម្មពង្រីកបណ្ដាញខ្សែកាបអុបទិច ហើយនឹងបញ្ចប់ការស្ថាបនាខ្សែកាបអុបទិចឲ្យរួចរាល់នៅក្នុងឆ្នាំ២០១៧ខាងមុខ ។
លោកបន្ថែមថា តាមគម្រោងរបស់ក្រសួង ក៏ដូចជាប្រតិបត្តិករទូរគមនាគមន៍នៅក្នុងប្រទេសកម្ពុជា នឹងខិតខំពង្រីកបណ្ដាញសេវាអ៊ីនធើរណេតឲ្យបានដល់តំបន់ជនបទដាច់ស្រយាល និងនៅតាមបណ្ដាខេត្តឆ្ងាយៗពីរាជធានីភ្នំពេញ ។ លោកថា ៖ « តាមរយៈការពង្រីកវិសាលភាពសម្រាប់ប្រជាជនទូទៅអាចប្រើប្រាស់បាននេះ ប្រជាជនកម្ពុជាជាច្រើនទៀតនឹងទទួលបានសេវាកម្មអ៊ីនធើរណេតប្រើប្រាស់ ដោយរំពឹងថា អត្រានៃអ្នកប្រើប្រាស់សេវាអ៊ីនធើរណេតកើនឡើងដល់៨០%នៃចំនួនប្រជាជនសរុបនៅក្នុងឆ្នាំ២០២០ខាងមុខ » ។
លោកបញ្ជាក់ថា រាជរដ្ឋាភិបាលកម្ពុជាបានជំរុញឲ្យពលរដ្ឋ ក៏ដូចជាមន្ត្រីរាជការតាមស្ថាប័ននានាប្រើប្រាស់ប្រព័ន្ធព័ត៌មានវិទ្យាឲ្យបានច្រើននិងទូលំទូលាយ ។ ជាក់ស្ដែង រាជរដ្ឋាភិបាលបានជំរុញឲ្យក្រសួងស្ថាប័នរដ្ឋនានាបង្កើតគេហទំព័រផ្ទាល់ខ្លួន និងរៀបចំការចុះបញ្ជីនានាតាមប្រព័ន្ធអេឡិចត្រូនិកផងដែរ ។
នៅក្នុងពិធីប្រកាសដាក់ឲ្យប្រើប្រាស់កម្មវិធីផ្ដល់ព័ត៌មានសេវាសាធារណៈតាមរយៈទូរស័ព្ទស្មាតហ្វូនរបស់ក្រសួងប្រៃសណីយ៍ និងទូរគមនាគមន៍ និងក្រសួងមុខងារសាធារណៈ នៅថ្ងៃនោះដែរ លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈ បានមានប្រសាសន៍ដែរថា ការដាក់ឲ្យប្រើប្រាស់កម្មវិធីផ្ដល់ព័ត៌មានសេវាសាធារណៈតាមរយៈទូរស័ព្ទស្មាតហ្វូនសម្រាប់សាធារណជនទូទៅនេះ វាស្របពេលកំណើននៃអ្នកប្រើប្រាស់អ៊ីនធើរណេត និងស្មាតហ្វូនមានចំនួនច្រើន ។ លោកមានប្រសាសន៍ថា ៖ « បើតាមដែលខ្ញុំដឹងនោះ គិតមកដល់ពេលនេះ អ្នកប្រើប្រាស់ស្មាតហ្វូនទំនើបៗ ដែលអាចប្រើប្រាស់អ៊ីនធើរណេតបាន មានចំនួន៥លានឯណោះ ហើយចំនួននេះនឹងបន្តកើនឡើងជាលំដាប់ ខណៈការនាំចូលទូរស័ព្ទស្មាតហ្វូនមកកម្ពុជាកាន់តែច្រើនឡើងផងដែរពីមួយឆ្នាំទៅមួយឆ្នាំ » ៕
ចែករំលែកព័តមាននេះ