ប្រពន្ធទី2 ប្តឹងប្តីជាបើកបររថយន្តក្រុង លួចមានទី3 នាងទី1ប្តឹងទី2វិញ
រាជធានីភ្នំពេញ ៖ បុរសអ្នកបើកបររថយន្តក្រុងម្នាក់ដែលមានប្រពន្ធដល់ទៅ៣នាក់ ក្នុងនោះប្រពន្ធដើមមានវ័យជាង៤០ឆ្នាំមានកូន២នាក់រស់នៅឯខេត្តតាកែវ
រាជធានីភ្នំពេញ ៖ បុរសអ្នកបើកបររថយន្តក្រុងម្នាក់ដែលមានប្រពន្ធដល់ទៅ៣នាក់ ក្នុងនោះប្រពន្ធដើមមានវ័យជាង៤០ឆ្នាំមានកូន២នាក់រស់នៅឯខេត្តតាកែវ ។ ចំណែកប្រពន្ធទី២មានវ័យ៥៧ឆ្នាំនៅឯខេត្តក្រចេះ ។ ទោះបីមានប្រពន្ធ២ហើយក្តី ក៏មិនទាន់ស្កប់ស្កល់ដែរដោយគាត់បានលួចលាក់មានប្រពន្ធទី៣ទៀត នៅសង្កាត់ចោមចៅ ខណ្ឌពោធិ៍សែនជ័យ ដែលមានវ័យជាង៣០ឆ្នាំ គឺក្មេងជាងអ្នកមុន ។
សម្រាប់ប្រពន្ធទី១ និងទី២មានចុះសំបុត្រអាពាហ៍ពិពាហ៍ត្រឹមត្រូវ ចំណែកប្រពន្ធទី៣មិនទាន់បានចុះនៅឡើយទេ ។ ទោះបីជាបែបណាប្រពន្ធទី១ និងប្រពន្ធទី៣បានត្រូវរ៉ូវគ្នាល្អូកល្អឺនមិនមានទំនាស់គ្នានោះទេ ។ ដោយឡែកប្រពន្ធទី២វិញកន្លងមកមិនបានដឹងថា ប្ដីមានប្រពន្ធដើម និងប្រពន្ធទី៣ទេ ស្មានតែមានតែគាត់ម្នាក់ឯងប៉ុណ្ណោះ ។ លុះពេលបានដឹងពីពុតប្តីក៏បានទៅប្ដឹងនគរបាលប៉ុស្ដិ៍ចោមចៅឲ្យជួយឃាត់ខ្លួនប្ដី និងប្រពន្ធទី៣នាំទៅសាកសួរនៅប៉ុស្ដិ៍ និងបានទាមទារការសងជំងឺចិត្តពីប្ដី និងប្រពន្ធទី៣ចំនួន១០លានរៀល និងម៉ូតូម៉ាកហុងដាឌ្រីមសេ១២៥ស៊េរីឆ្នាំ២០១២មួយគ្រឿង ។
បន្ទាប់ពីផ្ទុះរឿងប្តឹងប្តីប្រពន្ធទី១មិនបាននៅសម្ងំស្ងៀមនោះទេ បានទូរស័ព្ទទៅប្រពន្ធទី៣ថា ខ្លួន មិនឲ្យប្រពន្ធទី២ធ្វើបាបប្ដីទទេៗនោះឡើយ គឺគាត់នឹងទារសំណងពីប្រពន្ធទី២ចំនួន៥ពាន់ដុល្លារវិញដែរ ព្រោះនាងឯងយកប្តីអញ។ ហេតុការណ៏នោះបានកើតឡើងកាលពីវេលាម៉ោង១០ព្រឹកថ្ងៃទី១៣ ធ្នូ ហើយបុរសជាប្ដី និងប្រពន្ធទី៣ត្រូវបានកម្លាំងនគរបាលទៅឃាត់ខ្លួនដល់ផ្ទះ ដែលមានទីតាំងស្ថិតនៅក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា បុរសជាប្ដីឈ្មោះ សោម ផល្លា អាយុ៥១ឆ្នាំ មានស្រុកកំណើតនៅក្នុងភូមិថ្នល់ធ្លក ឃុំបឹងស្រង៉ែ ស្រុកឈូក ខេត្តកំពត មុខរបរបើកបររថយន្តក្រុង ។ គាត់មានប្រពន្ធចំនួន៣នាក់ក្នុងនោះប្រពន្ធដើមឈ្មោះ វង ឡែម អាយុ៤៧ឆ្នាំ មានទីលំនៅក្នុងភូមិត្រពាំងស្វាយ ឃុំត្រពាំងធំខាងជើង ស្រុកត្រាំកក់ ខេត្តតាកែវ ។ បុរសនោះបានរៀបការជាមួយប្រពន្ធទី១តាំងពីឆ្នាំ១៩៨៧មកម្ល៉េះ មានកូន២នាក់នៅក្នុងបន្ទុកគ្រួសារ និងមានសំបុត្របញ្ជាក់អាពាហ៍ពិពាហ៍ផងដែរ ។ ប្រពន្ធទី២មានឈ្មោះ ស៊ឹប ស៊ុយហេង អាយុ៥៤ឆ្នាំមុខរបរលក់ដូរ មានស្រុកកំណើតនៅក្នុងភូមិហាន់ជ័យទី២ ឃុំហាន់ជ័យ ស្រុកឆ្លូង ខេត្តក្រចេះ និងមានទីលំនៅបច្ចុប្បន្នក្នុងភូមិត្រពាំងព្រីង ឃុំក្រចេះ ស្រុកក្រចេះ ខេត្តក្រចេះ ។ រវាងប្តីជាមួយប្រពន្ធទី២នេះអត់បានរៀបការនោះទេបានយកគ្នាជាប្ដីប្រពន្ធរយៈពេល១៣ឆ្នាំមកហើយតាំងពីអំឡុងឆ្នាំ២០០៣មកម្ល៉េះ មានកូនម្នាក់ប៉ុន្តែកើតមកស្លាប់ និងបានចុះសំបុត្របញ្ជាក់អាពាហ៍ពិពាហ៍នៅក្នុងឃុំក្រចេះផងដែរ ។
ដោយឡែកប្រពន្ធទី៣ក្មេងជាងគេឈ្មោះ ស្រីមុំ អាយុជាង៣០ឆ្នាំ មានទីលំនៅក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។ មិនតែប៉ុណ្ណោះបានយកគ្នាជាប្ដីប្រពន្ធរយៈពេល៥ឆ្នាំមកហើយដោយមិនបានរៀបការនោះឡើយ គឺតាំងពីអំឡុងឆ្នាំ២០១១មកម្ល៉េះមានកូនម្នាក់ប៉ុន្តែកើតមកស្លាប់ដែរ ។ ហើយបុរសនោះ និងនាងមិនបានចុះសំបុត្របញ្ជាក់អាពាហ៍ពិពាហ៍ជាមួយគ្នាទេ ហើយសព្វថ្ងៃបុរសនោះមិនសូវបានទៅរកនាងដើម និងនាងទី២នោះឡើយគឺបានស្នាក់នៅជាមួយនាងទី៣ ដែលនៅក្មេង ។ តាមប្រភពព័ត៌មានបានឱ្យដឹងថា បុរសមានប្រពន្ធច្រើននេះ ជាអ្នកបើករថយន្តក្រុងតែងធ្វើដំណើរទៅគ្រប់ខេត្តក្រុង ហើយមិនមែនមានតែប្រពន្ធ៣នាក់នេះប៉ុណ្ណោះទេ គឺនៅមានផ្សេងទៀតដែលតាមដឹងមានរហូតដល់ទៅ៥នាក់ឯណោះ ។
ប្រពន្ធទី២ដែលបានប្ដឹងឲ្យនគរបាលឃាត់ខ្លួនបុរសជាប្ដីនោះបានឲ្យដឹងថា កាលពីជួបស្រលាញ់គ្នាដំបូងលោកប្ដីបានប្រាប់ថា គាត់ជាបុរសពោះម៉ាយអត់មានប្រពន្ធកូនជាប់ដៃជាប់ជើងនោះទេ គាត់ស្រលាញ់នាងដោយស្មោះ ទើបនៅខណៈនោះគាត់យល់ព្រមស្រលាញ់វិញទៅ ។ បន្ទាប់មកក៏បាននាំគ្នាទៅចុះសំបុត្របញ្ជាក់អាពាហ៍ពិពាហ៍ជាមួយគ្នាថែមទៀតផងដោយមិននឹកស្មានថាប្តីកុហកនោះទេ ។ មិនតែប៉ុណ្ណោះលោកប្ដីមិនត្រឹមតែកុហក់ថា អត់មានប្រពន្ធកូនប៉ុណ្ណោះទេ បានលួចលាក់ទៅមានប្រពន្ធទី៣ម្នាក់ថែមទៀត គឺពិតជាបានក្បត់ចិត្តគាត់ម្ដងហើយម្ដងទៀតជាបន្តបន្ទាប់រហូតមក និងបានទៅរស់នៅជាមួយប្រពន្ធទី៣ទៀត ។ ទង្វើបែបនេះរយៈពេលចុងក្រោយនេះត្រូវបានបែកការណ៏ដឹងដល់គាត់ ទើបមិនអាចអត់ឱនឲ្យបានក៏ប្ដឹងឲ្យនគរបាលប៉ុស្ដិ៍ចោមចៅជួយអន្តរាគមន៏ឃាត់ទាំងប្ដី និងប្រពន្ធទី៣ ដើម្បីដោះស្រាយគ្នាគឺប្ដឹងទារជំងឺចិត្តចំនួន១០លានរៀល និងម៉ូតូម៉ាកហុងដាឌ្រីមសេ១២៥ស៊េរីឆ្នាំ២០១២មួយគ្រឿង ហើយចង់ប្ដីទៅណាក៏ទៅចុះ ប៉ុន្តែប្រសិនបើគ្មានទេ និងសុំឲ្យនគរបាលចាត់ការតាមច្បាប់ ។
ដោយឡែកប្រពន្ធទី៣បាននិយាយថា នាងពិតជាបានយកបុរសនោះជាប្ដីប្រពន្ធមែនហើយក៏មានការដឹងឮ និងយល់ព្រមពីប្រពន្ធទី១របស់គាត់ផងដែរ ។ តាមការអះអាងពីប្រពន្ធទី៣ថា នាងនិងប្រពន្ធដើម មិនដែលមានទំនាស់គ្នានោះឡើយ ផ្ទុយទៅវិញប្រពន្ធដើមបានឲ្យនាងជួយមើលថែប្ដីឲ្យបានល្អ តែងបានទាក់ទងរកគ្នា និងចេះយល់ចិត្តគ្នាទៅវិញទៅមកថែមទៀត ។
នាងប្រពន្ធក្មេងទី៣បន្តថា មុនពេលបានជួបស្រលាញ់គ្នាជាមួយប្ដី នាងមិនបានដឹងថា លោកប្ដីមានអ្នកទី២រួចហើយនោះទេ ដោយនឹកស្មានថាខ្លួននាងគឺជាប្រពន្ធទី២ ។ លុះក្រោយមកស្រាប់តែលេចមុខស្ត្រីឈ្មោះ ស៊ឹប ស៊ុយហេង ទៅរករឿងនាងដោយអះអាងថា គាត់គឺជាប្រពន្ធដើម និងមានកាន់អេតាស៊ីវិលទៅបង្ហាញថែមទៀត ដែលជាហេតុធ្វើឲ្យនាងហួសចិត្តយ៉ាងខ្លាំង មិនតែប៉ុណ្ណោះបានប្ដឹងឲ្យនគរបាលឃាត់ខ្លួននាង និងប្ដីទៀត ។
នាងប្រពន្ធទី៣បានបន្តទៀតថា ក្រោយពេលឃាត់ខ្លួនទៅដល់ប៉ុស្ដិ៍នគរបាលចោមចៅនាងប្រពន្ធទី២បានទាមទារសំណងជំងឺចិត្តពីនាងនិងប្ដីចំនួន១០លានរៀល និងម៉ូតូម៉ាកហុងដាឌ្រីមសេ១២៥ស៊េរីឆ្នាំ២០១២មួយគ្រឿង ។ ខណៈនោះនាងបានទូរស័ព្ទទៅប្រាប់ដំណើររឿង ដល់ប្រពន្ធដើមនៅឯខេត្តតាកែវ ហើយគាត់ ប្រុងធ្វើដំណើរទៅកាន់ប៉ុស្ដិ៍ចោមចៅនោះភ្លាមៗដែរ ប៉ុន្តែដោយសារតែជាប់រវល់ការងារទើបមិនអាចមកបាន និងបានប្រាប់ថា និងមកនៅថ្ងៃទី១៤ ធ្នូ វិញ ។ មិនតែប៉ុណ្ណោះប្រពន្ធទី១បានប្រាប់ថា មិនឲ្យស្ត្រីដែលជាប្រពន្ធទី២ធ្វើបាបប្ដីទេ គាត់នឹងប្ដឹងនាងទី២នោះទារសំណង៥ពាន់ដុល្លារវិញ បើមានលទ្ធភាពឲ្យប្រាក់ប៉ុណ្ណឹងមកហើយ យកប្ដីទៅនៅជាមួយចុះ តែបើគ្មានប្រាក់ទេ និងប្រគល់ប្ដីឲ្យនាងដែលជាប្រពន្ធទី៣មើលថែវិញ ។ លុះដឹងថា ប្រពន្ធដើមចង់ប្ដឹង ទើបនាងទី២សុខចិត្តសម្រួលដោយយកសំណងត្រឹម៦០០ដុល្លារវិញនិងបានធ្វើកិច្ចសន្យាផ្ដាច់ទំនាក់ទំនងជាមួយប្ដី មិនរករឿងទៅថ្ងៃក្រោយទៀតឡើយ ។ ចំពោះសំណងផ្លូវចិត្តនេះប្រពន្ធដើមជាអ្នកចំណាយលុយចំនួន៦០០ដុល្លារក្នុងការបង់ដើម្បីបញ្ចប់រឿងកុំឱ្យបែកផ្សែងតទៅទៀត ៕
ចែករំលែកព័តមាននេះ