ខេត្តប៉ៃលិន ៖ ប្រជាពលរដ្ឋម្នាក់ឈ្មោះសំ ភុង អាយុ៤៨ឆ្នាំ សញ្ជាតិខ្មែរ-ថៃ មានប្រពន្ធឈ្មោះម៉ា នីដា អាយុ៣៨ឆ្នាំ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ បានកាក់កបនឹងរបរដាំដំណាំល្ហុង នៅក្នុងដីចម្ការរបស់ខ្លួន ដែលមានជាង១ម៉ឺន៥ពាន់ដើម។
បើទោះបីជាទីផ្សារនៅក្នុងឆ្នាំ២០១៦នេះ មានការធ្លាក់ចុះយ៉ាងខ្លាំងគួរឱ្យកត់សម្គាល់ក៏ដោយ តែគាត់អាចលក់បានប្រាក់ជាច្រើន ។ ការដាំដំណាំល្ហុងនេះ ធ្វើឡើងនៅក្នុងចម្ការមួយកន្លែងក្បែរចម្ការផ្កាស្បៃរឿង ក្នុងភូមិបឹងព្រលឹត ឃុំស្ទឹងកាច់ ស្រុកសាលាក្រៅ ។
ប្រភពពីលោកសំ ភុង ជាម្ចាស់ចម្ការល្ហុងខាងលើបានរៀបរាប់ឱ្យដឹងថា នេះជាលើកដំបូងហើយ ដែលលោកបានសាកល្បងដាំ ដំណាំល្ហុងជាង១០ហិកតានៅក្នុងចម្ការមួយកន្លែង ដោយគ្រាន់តែប្រើជីធម្មជាតិ ពោលគឺដាក់លាមកជ្រូក ដែលបូមចេញពីទ្រុងប៉ុណ្ណោះ ដែលមិនធ្វើឱ្យប៉ះពាល់ដល់សុខភាពអ្នកទទួលនោះឡើយ ។
លោកបន្តថា ពូជល្ហុងដែលខ្លួនដាំមាន៣ប្រភេទ គឺ១-ពូជកូកូ ២-ពូជខែកដាំ ដាំសម្រាប់លក់ឱ្យឈ្មួញទិញចូលទៅក្នុងរោងចក្រ សម្រាប់ផលិតធ្វើជាម្ហូបអាហារ និង៣-ពូជហូឡែន មានរសជាតិផ្អែមឆ្ងាញ់ សម្រាប់លក់ឱ្យប្រជាពលរដ្ឋទិញយកទៅចិតទទួលទាន អាចជួយសម្រួលឱ្យងាយស្រួលក្នុងការបត់ជើងធំ ខណៈមានជម្ងឺទល់លាមក ហើយពូជល្ហុងទាំងនោះសុទ្ធ តែនាំចូលមកពីប្រទេសថៃ ដោយដាំតាំងពីតូច រហូតមកដល់ប្រមូលផលនេះ អស់រយៈពេលជាង៧ខែមកហើយ ។
តាំងពីការដាំរហូតមកដល់ប្រមូលផលនេះ ក្នុង១ថ្ងៃៗ លោកសំ ភុង បានជួលកម្មករចាប់ពី១៥ ទៅ២០នាក់ ដោយបេះល្ហុងចាប់ពី២ ទៅ៣តោនលក់ឱ្យឈ្មួញដឹកយកទៅលក់នៅតាមទីផ្សារក្នុងប្រទេសកម្ពុជា និងប្រទេសថៃ ។ ចំណែកលោក នឿន ជាឈ្មួញទិញផ្លែល្ហុងក្នុងចម្ការខាងលើ បានឱ្យដឹងថា ល្ហុងពូជ កូកូ និងពូជខែកដាំ ដែលសម្រាប់នាំចូលរោងចក្រ ខ្មែរយើងក៏ទិញយកទៅទទួលទានដែរ ដោយទិញពីម្ចាស់ចម្ការ១គីឡូក្រាមតម្លៃ៦ទៅ៧បាត(ប្រាក់ថៃ) ជិត១ពាន់រៀល ។
ចែករំលែកព័តមាននេះ