ខេត្តបន្ទាយមានជ័យ ៖ វរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា ដោយអនុវត្តតាមបទបញ្ជារបស់ឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តក្នុងរយៈពេល២ថ្ងៃគឺថ្ងៃទី៣ និងទី៤ ខែកក្កដា ឆ្នាំ២០២២ កម្លាំងនគរបាលក្រុងប៉ោយប៉ែត បានធ្វើការស្រាវជ្រាវនិងឃាត់ខ្លួនជនសង្ស័យប្រុសស្រីជាមុខសញ្ញាឆក់ជាបន្តបន្ទាប់សរុបចំនួន២៦នាក់ ដើម្បីរៀបចំសំណុំរឿងបញ្ជូនទៅស្នងការដ្ឋាននគរបាលខេត្ត នៅថ្ងៃទី៦ ខែកក្កដា ឆ្នាំ២០២២ សំដៅចាត់ការបន្តតាមនីតិវិធី ។
លោកអធិការបញ្ជាក់ថា ថ្ងៃទី៣ ខែកក្កដា ឆ្នាំ២០២២ កម្លាំងសមត្ថកិច្ចបានទទួលព័ត៌មានពីជនរងគ្រោះថា មានករណីចោរឆក់ទូរស័ព្ទរបស់ខ្លួនម៉ាកអាយហ្វូន នៅខាងលិចហាងប្ដូរប្រាក់ហេង ម៉េត ផ្លូវជាតិ៥ ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ។
បន្ទាប់ពីបានទទួលព័ត៌មាននេះ កម្លាំងសមត្ថកិច្ចបានចុះទៅដល់ និងឆែកកាម៉េរ៉ាសុវត្ថិភាព ។ លុះនៅថ្ងៃទី៤ ខែកក្កដា ឆ្នាំ២០២២ វេលាម៉ោង៨និង៣០នាទីព្រឹក កម្លាំងសមត្ថកិច្ចបានស្រាវជ្រាវនិងឃាត់ខ្លួនជនសង្ស័យចំនួន៥នាក់ នៅផ្ទះសំណាក់«ពន្លឺពេជ្រ» បន្ទប់លេខ៣ ជាន់ក្រោម ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត និងម៉ូតូ១គ្រឿងម៉ាក MOOVE ពណ៌ក្រហម ។
ក្រោយពីឃាត់ខ្លួននិងសួរចម្លើយជនសង្ស័យទាំង៥នាក់នេះ កម្លាំងសមត្ថកិច្ចក៏បន្តទៅឃាត់ខ្លួនជនសង្ស័យជាបន្តបន្ទាប់ចំនួន៤នាក់ទៀត និងម៉ូតូ១គ្រឿងម៉ាកហុងដាឌ្រីម សេ១២៥ ពណ៌ខ្មៅ គ្មានផ្លាកលេខ ។
លោកអធិការបន្តថា បន្ទាប់ពីឃាត់ខ្លួនជនសង្ស័យទាំង៩នាក់នេះមក នៅថ្ងៃទី៤ ខែកក្កដា ឆ្នាំ២០២២ដដែលនោះ កម្លាំងសមត្ថកិច្ចបានធ្វើការស្រាវជ្រាវករណីឆក់ទូរស័ព្ទ ឃាត់ខ្លួនបានជនសង្ស័យចំនួន៥នាក់បន្ថែមទៀត ជាមុខសញ្ញាឆក់យ៉ាងសកម្មនៅក្រុងប៉ោយប៉ែត ដែលកម្លាំងសមត្ថកិច្ចតាមប្រមាញ់ជាយូរមកហើយ ។ ជនសង្ស័យទាំង៥នាក់នេះ ត្រូវបានឃាត់ខ្លួននៅផ្ទះសំណាក់«ពន្លឺពេជ្រ» បន្ទប់លេខ១៤ជាន់ទី១ ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ព្រមទាំងដកហូតម៉ូតូ១គ្រឿងម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០២២ គ្មានផ្លាកលេខ ។
លុះនៅថ្ងៃទី៥ ខែកក្កដា ឆ្នាំ២០២២ វេលាម៉ោងប្រហែល៣រសៀល កម្លាំងនគរបាលព្រហ្មទណ្ឌក្រុងប៉ោយប៉ែត បន្តស្រាវជ្រាវឃាត់ខ្លួន មុខសញ្ញាឆក់មានប្រុសមានស្រីបានមួយក្រុមទៀត ដែលមានគ្នីគ្នាចំនួន១២នាក់ នៅក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត នៅពេលធ្វើតេស្តទឹកនោមឃើញវិជ្ជមានសារធាតុញៀនទាំងអស់គ្នា ៕
ចែករំលែកព័តមាននេះ