ភ្ញៀវទេសចរជាតិជិះយន្តហោះក្នុងស្រុកនៅមានកម្រិត
រាជធានីភ្នំពេញ ៖ សព្វថ្ងៃ ក្រុមហ៊ុនអាកាសចរណ៍ដែលបើកថ្មីៗ និងបើកយូរមកហើយនៅកម្ពុជា ភាគច្រើនគឺសំដៅលើភ្ញៀវអន្តរជាតិជាអ្នកធ្វើដំណើរតាមជើងហោះហើរ …
រាជធានីភ្នំពេញ ៖ សព្វថ្ងៃ ក្រុមហ៊ុនអាកាសចរណ៍ដែលបើកថ្មីៗ និងបើកយូរមកហើយនៅកម្ពុជា ភាគច្រើនគឺសំដៅលើភ្ញៀវអន្តរជាតិជាអ្នកធ្វើដំណើរតាមជើងហោះហើរ ដូចជា ធ្វើដំណើរពីភ្នំពេញ-សៀមរាប ឬក្រុងព្រះសីហនុជាដើម ចំណែកភ្ញៀវខ្មែរជិះយន្តហោះ គឺតិចតួចនៅឡើយ ។ នេះបើតាមប្រសាសន៍របស់ប្រធានក្រុមប្រឹក្សាភិបាលនៃក្រុមហ៊ុនអាកាសចរណ៍ក្នុងស្រុកកម្ពុជា អង្គរអ៊ែរ បានលើកឡើងកន្លងមក ។
លោក តឹក រ៉េតសំរេច បានមានប្រសាសន៍ថា ៖ « ជើងហោះហើរភ្នំពេញ-សៀមរាប មិនទាន់មានភ្ញៀវខ្មែរជិះយន្តហោះច្រើននោះទេ ហើយរហូតមកដល់ពេលនេះ ខ្ញុំអាចវាយតម្លៃបានថា ក្នុងមួយជើងអាចមានជនជាតិខ្មែរជិះយន្ដហោះត្រឹមជុំវិញ១០០នាក់ ។ ដូចនេះ បើយន្តហោះណាធំបន្តិចដែលអាចមានកៅអី១៨០ អីចឹងធ្វើដំណើរតែមួយជើងមិនទាំងពេញផង ។ ម្យ៉ាងទៀត នៅកម្ពុជាទាំងមូលមានក្រុមហ៊ុនក្នុងស្រុក៣ឯណោះ ដែលបើកការហោះហើររាល់ថ្ងៃ ក្នុងនោះមាន ក្រុមហ៊ុនកម្ពុជា អង្គរអ៊ែរ ក្រុមហ៊ុនស្កាយអង្គរ និងក្រុមហ៊ុនបាសាកា។ ហេតុនេះ បើសិនជាពឹងទៅលើភ្ញៀវខ្មែរនោះ យើងមិនអាចឈរជើងបានទេ ។ ដូចនេះ យើងធ្វើម៉េចត្រូវរកភ្ញៀវពីក្រៅ ជនបរទេស និងភ្ញៀវទេសចរបរទេស ដើម្បីគាំទ្រជើងហោះហើររបស់យើងឲ្យមានស្ថិរភាពអាចទប់ទល់ជាមួយនឹងការប្រកួតប្រជែងពីខាងក្រៅ » ។
ជានិច្ចកាល ក្រុមហ៊ុនអាកាសចរណ៍ក្នុងស្រុកមួយចំនួនតែងរៀបចំកម្មវិធីបញ្ចុះតម្លៃសំបុត្រពីភ្នំពេញ-សៀមរាប ឬក្រុងព្រះសីហនុជាដើម ដោយលក់ក្នុងតម្លៃទាបដើម្បីសម្រួលឲ្យភ្ញៀវខ្មែរមានលទ្ធភាពអាចធ្វើដំណើរតាមជើងហោះហើរបាន ។ ទាក់ទិននឹងបញ្ហានេះ លោក តឹក រ៉េតសំរេច បន្ថែមថា វាមិនមែនជាយុទ្ធសាស្ត្រទីផ្សារស្វែងរកអតិថិជននោះទេ ។ ការធ្វើបែបនេះ គឺគ្រាន់តែជួយបំពេញកៅអីដែលនៅសេសសល់ឲ្យភ្ញៀវខ្មែរបានធ្វើដំណើរតាមជើងហោះហើរដែរតែប៉ុណ្ណោះ ។ លោកថា ៖ « នោះជាប្រូម៉ូសិនដែលយើងរៀបចំ ហើយវាមិនមែនជាទីផ្សារដែលយើងគិតថា ហោះទៅដើម្បីយកលុយពីក្នុងស្រុកទេ ។ ទីផ្សាររបស់យើងមិនអាចផ្អែកលើទីផ្សារក្នុងស្រុកទេ គឺគ្រាន់តែបំពេញកៅអីនៅសល់តិចតួចប៉ុណ្ណោះ តែទីផ្សារដែលយើងប្រឹងប្រែងលក់នោះ គឺទីផ្សារក្រៅស្រុក និងភ្ញៀវបរទេស » ។
លោកបញ្ជាក់ដែរថា ទោះបីជាប្រឹងប្រែងលក់នៅខាងក្រៅក៏ដោយ ក៏ប៉ុន្តែការគាំទ្រនៅខាងក្នុងស្រុកមានសារសំខាន់ណាស់សម្រាប់វិស័យអាកាសចរណ៍ទាំងមូល ព្រោះថាវិស័យនេះក៏ជាចំណែកមួយនៃការអភិវឌ្ឍសេដ្ឋកិច្ច របស់រាជរដ្ឋាភិបាលកម្ពុជាផងដែរ ។
បើតាមទិន្និន័យរបស់អាកាសយានដ្ឋានអន្តរជាតិកម្ពុជា( Cambodia Airport ) បានបង្ហាញថា នៅរយៈពេល១១ខែឆ្នាំ២០១៦នេះ ចំនួនភ្ញៀវចាកចេញក្នុងស្រុក( Domestic Departure )អាកាសយានដ្ឋានអន្តរជាតិភ្នំពេញ មាន១៥៥.៦៩៧នាក់ អាកាសយានដ្ឋានសៀមរាប មាន១៨០.៧៩៨នាក់, អាកាសយានដ្ឋានព្រះសីហនុមានចំនួន៣២.០៣៣នាក់ ។ ចំណែកចំនួនភ្ញៀវក្នុងស្រុកមកដល់( Domestic Arrival ) អាកាសយានដ្ឋានអន្តរជាតិភ្នំពេញ មាន១៣៧.៧៨៨នាក់, អាកាសយានដ្ឋានអន្តរជាតិសៀមរាប មាន១៨៩.៨០២នាក់ អាកាសយានដ្ឋានអន្ដរជាតិ ខេត្តព្រះសីហនុមានចំនួន៤០.៦៣៤នាក់ ៕
ចែករំលែកព័តមាននេះ