រាជធានីភ្នំពេញ ៖ ការប្រកួតប្រដាល់វគ្គសន្សំពិន្ទុឈានទៅដណ្ដើមខ្សែក្រវាត់គោជល់ក្នុងប្រភេទទម្ងន់៦៥គីឡូក្រាម នៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី១០ ធ្នូ ខាងមុខនេះ ឈានចូលមកដល់វគ្គពាក់កណ្ដាលផ្ដាច់ព្រ័ត្រហើយ ។ ឃុន សំខាន់
រាជធានីភ្នំពេញ ៖ ការប្រកួតប្រដាល់វគ្គសន្សំពិន្ទុឈានទៅដណ្ដើមខ្សែក្រវាត់គោជល់ក្នុងប្រភេទទម្ងន់៦៥គីឡូក្រាម នៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី១០ ធ្នូ ខាងមុខនេះ ឈានចូលមកដល់វគ្គពាក់កណ្ដាលផ្ដាច់ព្រ័ត្រហើយ ។ ឃុន សំខាន់ មកពីក្លិបកងពលតូចលេខ៧០ នឹងត្រូវជួបប្រកួតជាមួយកីឡាករថៃឈ្មោះចមភព សរ.វីរ៉ាវ៉ាន់ និងមឿនសុខហ៊ុច មកពីក្លិបពុទ្ធសិរីវង្សព្រែកតាទែន ជួបប្រកួតជាមួយកីឡាករថៃឈ្មោះនឹង ត្រាកាន ក.កាមន្តវ៉ាត ។
ឃុន សំខាន់ ដែលប្រកួតបាន៤លើក ឈ្នះ២ ចាញ់២ នឹងត្រូវជួបចមភព សរ.វីរ៉ាវ៉ាន់ដែលប្រកួតបាន៤លើកឈ្នះទាំង៤លើកនោះមិនទាន់ដឹងថា អាចទៅរួចបានប៉ុន្មានទឹកនោះទេ ។ សូម្បីតែលោកទេស សារិន ដែលជាគ្រូបង្ហាត់របស់ឃុន សំខាន់ ក៏មិនហ៊ានអះអាងទុកមុនពីលទ្ធផលចាញ់ឈ្នះដែរដោយសារកីឡាករថៃរូបនេះគឺជាជើងខ្លាំង រីឯ ឃុន សំខាន់ ក៏បង្ហាញតម្រុយមិនខ្លាចគូប្រកួតសូម្បីបន្តិច ទើបលោកឱ្យរង់ចាំមើលការប្រកួតជាក់ស្ដែងជំនួសឱ្យការប៉ាន់ស្មានលទ្ធផលមុនការប្រកួតចាប់ផ្ដើម ។
ចំណែកមឿន សុខហ៊ុច ប្រកួតបាន៤លើកឈ្នះ៣ ចាញ់១ នឹងជួបប្រកួតជាមួយនឹង ត្រាកាន ក.កាមន្តវ៉ាត ដែលប្រកួតបាន៤លើក ឈ្នះ៣ចាញ់១ដូចគ្នា ។ ប្រកួតលើកនេះអ្នកធ្លាប់តាមដានការប្រកួតភាគច្រើនគេមានជំនឿចិត្តលើមឿន សុខហ៊ុច ច្រើនជាងដោយ សារកីឡាករកម្ពុជារូបនេះមានល្បិចប្រយុទ្ធល្អគ្រាន់បើ ផ្លែកែង និងជង្គង់អាចប្រើការបានល្អអាចធ្វើឱ្យគូប្រកួតល្មមៗពិបាកទប់ទល់ខ្លាំងណាស់ ។ ទោះបីយ៉ាងណា មឿន សុខហ៊ុច មិនហ៊ានមើលស្រាលលើគូប្រកួតទេ ដូច្នេះមានតែសាកគ្នាមើលសិនប៉ុណ្ណោះទើបដឹងថាអ្នកណាខ្លាំងជាងអ្នកណា ។
នៅលើសង្វៀនដដែលក្រៅពីគូដណ្ដើមខ្សែក្រវាត់ក៏មានគូមិត្តភាពដែលសុទ្ធតែជាកីឡាករល្អៗផងដែរដូចជា កីឡាករ ភិន សុទី មកពីក្លិបអប់រំកាយស្រុកអន្លង់វែង ប្រកួតជាមួយកីឡាករ ផាន ចំណាន មកពីក្លិបរាជសីហ៍ខេត្តរតនៈគិរីនិងគូចុងក្រោយកីឡាករ ធី តុងហ៊ី មកពីក្លិបសាលវ័ន្តកីឡា ប្រកួតជាមួយកីឡាករ វី សេរីចាន់ឌីន មកពីក្លិបខ្លារខិនមានរិទ្ធ ។
ដោយឡែកនៅលើសង្វៀនទូរទស្សន៍ស៊ីធីអិន ថ្ងៃសៅរ៍នោះដែរ ក៏មានការប្រកួតប្រដាល់មិត្តភាពអន្តរជាតិកម្ពុជា-ថៃដែលប្រជុំដោយកីឡាករជើងខ្លាំងលំដាប់ជួរមុខដូចគ្នា ។ សមាសភាពគូប្រកួតលក្ខណៈមិត្តភាពអន្តរជាតិកម្ពុជា-ថៃមាន កីឡាករកម្ពុជាចាន់ សំអាតមកពីក្លិបអប់រំកាយស្រុកអន្លង់វែង ធ្លាប់ប្រកួតបាន៤៤ដងឈ្នះ២៧ដង ចាញ់១៦ដងស្មើ១ដង និងធ្លាប់ផ្ដួលគូប្រកួតឱ្យសន្លប់បាន១៥ដង នឹងជួបប្រកួតជាមួយកីឡាករថៃឈ្មោះចេមស៊ីកខាន ស.ស៊ិឆាត ក្នុងប្រភេទទម្ងន់៦០គីឡូក្រាម ។
កីឡាករថៃរូបនេះ ធ្លាប់ប្រកួតបាន៧០ដង ឈ្នះ៥៥ដង ចាញ់១៣ដង ស្មើ២ដង និងផ្ដួលគូប្រកួតឱ្យសន្លប់នៅលើសង្វៀនបាន៨ដង ។ មួយគូទៀត កីឡាករ រឿង សោភ័ណ្ឌ មកពីក្លិបមកុដរាជសីហ៍ ធ្លាប់ប្រកួតបាន១៣៣ដង ឈ្នះ១១៦ដង ចាញ់១៥ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៣២ដង នឹងប្រកួតជាមួយកីឡាករថៃឈ្មោះរុងណាក់ផា ស.សំរ៉ូងយីម ក្នុងប្រភេទទម្ងន់៦៩គីឡូក្រាម ។ កីឡាករថៃរូបនេះធ្លាប់ប្រកួតបាន១៣០ដង ឈ្នះ១០០ដង ចាញ់២៥ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន១៥ដង ។
ចំណែកគូប្រកួតមិត្តភាពធម្មតាវិញមានកីឡាករបឺត សង្ឃឹម មកពីក្លិបរ៉ាហាប់ស្វាយប៉ាក ប្រកួតជាមួយកីឡាករគឿប សុវណ្ណនឿត
មកពីក្លិបមោងឬស្សីមរតកគុនខ្មែរ ។ កីឡាករស៊ុំ សុខឡេង មកពីក្លិបសាលវ័ន្តកីឡា ប្រកួតជាមួយកីឡាករ ចៅ ស្ដាយ មកពីក្លិបសុភានូមានជ័យ និងកីឡាករ ឡុង ឡា មកពីក្លិបអប់រំកាយស្រុកអន្លង់វែង ប្រកួតជាមួយកីឡាករ ធឿនធី មកពីក្លិបអង្គរមានជ័យខេត្តសៀមរាប ៕
ចែករំលែកព័តមាននេះ