ភ្ញាក់ផ្អើល! ស្តេចហ្គីតាសូឡូ Carlos Santana សន្លប់លើឆាក អំឡុងការសម្តែង
សហរដ្ឋអាមេរិក ៖ ស្តេចហ្គីតាសូឡូ Carlos Santana បានសន្លប់នៅលើឆាក អំឡុងការសម្តែងរបស់
សហរដ្ឋអាមេរិក ៖ ស្តេចហ្គីតាសូឡូ Carlos Santana បានសន្លប់នៅលើឆាក អំឡុងការសម្តែងរបស់គាត់ ដែលធ្វើឡើងក្នុងរដ្ឋ Michigan កាលពីយប់ថ្ងៃទី៥ ខែកក្កដា កន្លងទៅ។ ដោយបង្កជាការភ្ញាក់ផ្អើលយ៉ាងខ្លាំង សម្រាប់អ្នកចូលរួមទស្សនាការប្រគំតន្ត្រីនោះ។ នេះបើយោងតាមការចេញផ្សាយពីសារព័ត៌មាន New York Post។
ហេតុការណ៍ដ៏ភ្ញាក់ផ្អើលនេះ កើតឡើងនៅលើឆាកនៃរោងមហោស្រពតន្ត្រី Pine Knob ក្នុងទីក្រុង Clarkston ដោយគេសង្កេតឃើញ អំឡុងពេលកំពុងសម្តែងសុខៗ លោក Santana បានដើរទៅអង្គុយខាងក្រោយមួយសន្ទុះ ហើយក៏សន្លប់បាត់បង់ស្មារតី មុនពេលទទួលបានការជួយសង្គ្រោះពីសំណាក់ក្រុមការងារ និងបុគ្គលិកពេទ្យជាច្រើននាក់។
ហ្វូងអ្នកចូលរួមទស្សនាបាននាំគ្នាអធិស្ឋាន សម្រាប់ស្តេចហ្គីតាឡាទីនដ៏ល្បីល្បាញវ័យ៧៤ឆ្នាំរូបនេះ អំឡុងពេលនៃការសង្គ្រោះបឋម។ មុនពេលគាត់ត្រូវបានគេបញ្ជូនចេញពីឆាកប្រគំតន្ត្រីជាមួយរទេះរុញ។ ដោយគ្រប់គ្នាបានឃើញគាត់គ្រវីដៃទៅកាន់ហ្វូងអ្នកទស្សនាផងដែរ។
ក្រោយហេតុការណ៍ដ៏ភ្ញាក់ផ្អើលនេះ អ្នកតំណាងលោក Santana បានបញ្ជាក់ថា ស្ថានភាពរបស់គាត់បានល្អប្រសើរហើយ។ ក្រោយបានយកឈ្នះលើការហត់នឿយដោយកំដៅ និងការខ្សោះជាតិទឹក។ ខណៈការប្រគំតន្ត្រីបន្តបន្ទាប់របស់គាត់ត្រូវពន្យារពេល។ ហើយព័ត៌មានលម្អិតនឹងត្រូវជម្រាបជូននៅពេលក្រោយ។
សូមរំលឹកថា លោក Carlos Santana ធ្លាប់ត្រូវបានបញ្ជូនទៅកាន់មន្ទីរពេទ្យ កាលពីខែធ្នូ ឆ្នាំ២០២១ កន្លងទៅ។ បន្ទាប់ពីគាត់មានបញ្ហាឈឺនៅក្នុងទ្រូង។ ហើយក្រោយមកភ្នាក់ងាររបស់គាត់បានប្រកាសថា គាត់ត្រូវទទួលការវះកាត់បេះដូង ដែលមិនបានគ្រោងទុក៕
ចែករំលែកព័តមាននេះ