រឿងរ៉ាវចោទប្រកាន់ថា មិនព្រមបើកលុយកាក់ឱ្យអ្នកសិល្បៈ ឬអ្នកធ្វើការជាមួយហាក់ទៅណាមិនឆ្ងាយពីលោក អ៊ិន សុភិន សោះ។ ជាក់ស្តែងថ្មីៗនេះ បុរសជាជនជាតិបរទេសម្នាក់ចេញមុខចោទប្រកាន់លោក អ៊ិន សុភិន ម្ចាស់ផលិតកម្ម «មហាហង្ស» ថា
រាជធានីភ្នំពេញ ៖ រឿងរ៉ាវចោទប្រកាន់ថា មិនព្រមបើកលុយកាក់ឱ្យអ្នកសិល្បៈ ឬអ្នកធ្វើការជាមួយហាក់ទៅណាមិនឆ្ងាយពីលោក អ៊ិន សុភិន សោះ។ ជាក់ស្តែងថ្មីៗនេះ បុរសជាជនជាតិបរទេសម្នាក់ចេញមុខចោទប្រកាន់លោក អ៊ិន សុភិន ម្ចាស់ផលិតកម្ម «មហាហង្ស» ថា មិនព្រមបើកលុយប្រាក់ខែ ដែលជាកម្លាំងពលកម្មរបស់ខ្លួនខំធ្វើការឱ្យលោកនោះទេ។ ហេតុការណ៍ នៃការចោទប្រកាន់លោក អ៊ិន សុភិន ថា មិនបានបើកលុយថ្លៃឈ្នួលកម្លាំងពលកម្មដល់បុរសជាជនជាតិមួយរូប បានផ្ទុះឡើងបង្កជារលកកំដៅ និងទទួលបានការចាប់អារម្មណ៍ពីមហាជនអ្នកលេងបណ្ដាញសង្គមជាខ្លាំងនៅថ្ងៃទី០៦ ខែកក្កដា ឆ្នាំ២០២២ នេះ។
ម្ចាស់គណនីហ្វេសប៊ុកជនជាតិបរទេសម្នាក់ឈ្មោះ Goalkeeper Coach Luis Fernado Vitorino បានបង្ហោះសាររៀបរាប់ពាក់ព័ន្ធរឿងរ៉ាវរបស់ខ្លួនថា រូបលោកត្រូវបានម្ចាស់ផលិតកម្ម «មហាហង្ស» ដែលគេស្គាល់ថា ជាលោក អ៊ិន សុភិន មិនព្រមបើកប្រាក់ខែជូន ដោយគិតមកដល់ពេលនេះ មានរយៈពេលជាង៣ខែទៅហើយ ។
នេះបើតាមការបង្ហោះសំណេរជាភាសាអង់គ្លេសយ៉ាងវែងអន្លាយរបស់ជនជនជាតិបរទេសខាងលើ ដែលត្រូវបានបកប្រែថា «សួស្តីមិត្តភក្តិទាំងអស់គ្នា ខ្ញុំចង់ចែករំលែកឱ្យដឹងពីទុក្ខលំបាករបស់ខ្ញុំចំពោះមនុស្សម្នាក់ដែលហៅខ្លួនឯងថា ជាជនជាតិខ្មែរ។ ខ្ញុំបានរស់នៅប្រទេសកម្ពុជាជាង ៦ ឆ្នាំមកហើយ ហើយខ្ញុំពុំធ្លាប់មានបញ្ហាណាមួយសោះឡើយ ប៉ុន្តែនៅឆ្នាំមុននេះ ខ្ញុំបានធ្វើការជាគ្រូបង្វឹកដល់ក្រុមបាល់ទាត់ «មហាហង្ស» ហើយបុរសម្នាក់ដែលមានឈ្មោះថា អ៊ិន សុភិន បានសន្យាថានឹងបង់លុយប្រាក់ខែឱ្យខ្ញុំ។ ខ្ញុំបានធ្វើការជារៀងរាល់ថ្ងៃ មិនដែលខកខានការបង្ហាត់ម្តងណាឡើយ ហើយរយៈពេល ៣ ខែដែលបានធ្វើការ គឺខ្ញុំមិនទទួលបានប្រាក់ខែសោះឡើយ ទាំងដែលគ្រប់គ្នាដឹងស្រាប់ហើយថា ខ្ញុំជាជនបរទេស គឺមិនមានវិធីផ្សេងអាចរកប្រាក់បានឡើយ។
បើតាមសំណេរដដែលខាងលើបន្តថា ខ្ញុំពិតជាពិបាកចិត្តជាខ្លាំង ដែលរឿងនេះបានកើតឡើងក្នុងជីវិតខ្ញុំ។ ខ្ញុំមានឪពុកម្នាក់ដែលមានជំងឺ និងប្រពន្ធដែលត្រូវការថ្នាំជាប្រចាំ ហើយខ្ញុំពិតជាត្រូវការប្រាក់ខែនេះណាស់ មានអ្នកណាអាចជួយខ្ញុំបានទេ លោក អ៊ិន សុភិន បានសន្យាថា ត្រឹម២ខែ និងបង់លុយប្រាក់ខែចំនួន៣ខែនោះឱ្យខ្ញុំ។ តែមិនឃើញ ហេតុដូចនេះសូមប្រយ័ត្នចំពោះបុគ្គលរូបនេះ។ ហើយបើសិនមាននរណាអាចជួយខ្ញុំឱ្យលោក អ៊ិន សុភិន សងលុយខ្ញុំបាន សូមប្រាប់ឱ្យខ្ញុំដឹងផង។ គ្មានលុយបង់ប្រាក់ខែឱ្យខ្ញុំ ទាំងដែលខ្ញុំរង់ចាំដល់ទៅជាង៤ខែ! លោកមិនសក្តិសមជាមនុស្សតំណាងខ្មែរនោះឡើយ។
ឆ្លើយតបនឹងការចោទប្រកាន់ខាងលើនេះ លោក អ៊ិន សុភិន បានបដិសេធទាំងស្រុង ដោយលោកពោលពាក្យថា លោកមិនបានបោ.កប្រាស់ជនជាតិបរទេសម្នាក់នោះឡើយ។ ព្រមជាមួយគ្នានោះ ម្ចាស់ផលិតកម្ម «មហាហង្ស» នៅថ្ងៃទី០៦ ខែកក្កដា ឆ្នាំ២០២២ នេះបានប្រកាសលើបណ្តាញសង្គមហ្វេសប៊ុក ដោយប្រកាសឱ្យមហាជនជួយលោកផ្តល់ព័ត៌មានអំពីជនបរទេសខាងលើ។
លោក អ៊ិន សុភិន បានសរសេរសំណេរដែលមានខ្លឹមសារយ៉ាងដូច្នេះថា « ខ្ញុំសូមប្រកាសថា ជនបរទេសម្នាក់នេះ ចូលចិត្តមករំខានក្នុងការងាររបស់ខ្ញុំ ហើយសូមបញ្ជាក់ថា វាជាជនបរទេសម្នាក់បានបោ.កប្រាស់សេចក្ដីទុកចិត្តរបស់ក្រុមការងារ ហើយក៏គ្មានអ្វីពាក់ពន្ធ័នឹរឿងលុយកាក់ដែរ យើងបានហៅជននេះមកជួប Police ដែរ តែវាមិនចូលមកជួបទេ បើជួបជនបរទេសនេះ កន្លែងណា សូមជួយផ្ដល់ព័ត៌មានមក Telegram 012 222 114 កំពុងតែរកមុខផង សូមអរគុណ »។
ចំពោះរឿងរ៉ាវខាងលើនេះ ទទួលបានការចាប់អារម្មណ៍ពីសំណាក់អ្នកលេងបណ្តាញសង្គមទាំងជនជាតិខ្មែរ និងជនជាតិបរទេស ដោយខ្លះកាន់បញ្ចេញមតិឱ្យលោក អ៊ិន សុភិន សងលុយទៅជនបរទេសនោះទៅ ហើយខ្លះទៀតក៏បានលើកឡើងថា រូបគាត់មិនហ៊ាន សន្និដ្ឋានថា ខាងណាខុសណាត្រូវទេ ព្រោះយើងមិនច្បាស់ជាងសាមីខ្លួនគេទេ យើងមិនមែនមនុស្ស នៅក្នុងសាច់រឿងនឹង តែខ្លះក៏ស្តីបន្ទោសលោក អ៊ិន សុភិន ថា មានចេតនាគេចវេសមិនដោះស្រាយលុយកាក់ឱ្យជនបរទេសនោះ ហើយថែមទាំងប្លុកឆាតជាមួយអ្នកចោទប្រកាន់លោកថែមទៀត៕
ចែករំលែកព័តមាននេះ