រាជធានីភ្នំពេញ ៖ កាលពីរសៀលថ្ងៃទី៩ ធ្នូ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យកីឡាករសុខ ចាន់មាន ជាម្ចាស់មេដាយមាស លំដាប់ថ្នាក់ពិភពលោក ប្រភេទកីឡាប៉េតង់ និងប្រតិភូកីឡាទាំងអស់ ដែលវិលត្រឡប់មកពីប្រទេសម៉ាដាហ្គាស្កា ចូលជួបសម្ដែងការគួសម និងប្រគល់ប្រាក់រង្វាន់ ។
លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានមានប្រសាសន៍ឱ្យដឹងថា កីឡាករសុខ ចាន់មាន ជាម្ចាស់មេដាយមាសកីឡាប៉េតង់ពិភពលោកឆ្នាំ២០១៦ ក្រៅពីទទួលបានប្រាក់រង្វាន់លើកទឹកចិត្តរបស់រាជរដ្ឋាភិបាល ដែលមានចែងនៅក្នុងអនុក្រិត្យចំនួន១២០លានរៀលហើយ ត្រូវបានសម្ដេចផ្ដល់នូវប្រាក់រង្វាន់ផ្ទាល់ខ្លួនរបស់សម្ដេច បន្ថែមពីលើចំនួន១ម៉ឺនដុល្លារទៀត ។
ហើយនៅក្នុងនោះ សម្ដេចក៏បានប្រកាសដំឡើងឋានន្តរស័ក្ដិ ពីស័ក្ដិ៣ឡើង ទៅដល់ស័ក្ដិ៤ ។ មិនតែប៉ុណ្ណោះ ប្រសិនបើកីឡាករ សុខ ចាន់មាន ឈ្នះមេដាយមាសម្ដងទៀត នឹងធ្វើការដំឡើងដល់ស័ក្ដិ៥តែម្ដង ។
ជាមួយគ្នានោះដែរ គ្រូបង្វឹកក៏ទទួលបានប្រាក់រង្វាន់លើកទឹកចិត្តពីរាជរដ្ឋាភិបាល១២០លានរៀល ស្មើនិងកីឡាករជ័យលាភីដែរ ហើយសម្ដេចតេជោ បានផ្ដល់ប្រាក់រង្វាន់ផ្ទាល់ខ្លួន លើកទឹកចិត្តបន្ថែម៣ពាន់ដុល្លារ និងថ្នាក់ដឹកនាំ២ពាន់ដុល្លារ ចំណែកកីឡា៣រូបទៀត ដែលមិនទទួលបានមេដាយ ក្នុងមួយនាក់១ពាន់ដុល្លារ ។
កីឡាករសុខ ចាន់មាន ដែលដណ្ដើមបានមេដាយមាសពិភពលោក លើប្រភេទកីឡាប៉េតង់នៅប្រទេសម៉ាដាហ្គាស្កា នាពេលនេះ គេប្រកួតលើវិញ្ញាសាវាយយកពិន្ទុឈ្នះកីឡាករបារាំង នៅវគ្គប្រកួតផ្ដាច់ព្រ័ត្រ ។
គួរំលឹកថា ព្រឹត្តិការណ៍ប្រកួតកីឡាប៉េតង់កម្រិតពិភពលោឆ្នាំ២០១៦ នៅប្រទេសម៉ាដាហ្គាស្កាលើកនេះ ធ្វើឡើងចាប់ពីថ្ងៃទី១ ដល់ថ្ងៃទី៤ ធ្នូ ដែលមានបណ្ដាប្រទេសចំនួន៤៧ចូលរួម ប្រកួតលើវិញ្ញាសាចំនួន២ គឺប្រកួតវាយយកពិន្ទុ និងប្រកួត៣នាក់ទល់នឹង៣នាក់ ។
នេះគឺជាមោទនភាពថ្មីមួយទៀត ដែលកីឡាករសុខ ចាន់មាន នាំមកនូវមហាកិត្តិយសយ៉ាងធំធេង មកជូនជាតិមាតុភូមិកម្ពុជាយើងបន្ទាប់ពីវិរៈកីឡាកីឡាការិនី កែរ ឡេង ឈ្នះមេដាយមាសពិភពលោក លើប្រភេទកីឡាប៉េតង់ ប្រកួតវិញ្ញាសាវាយ យកពិន្ទុនៅប្រទេសថៃ កាលពីឆ្នាំ២០១៥ ។
ចែករំលែកព័តមាននេះ