គេហទំព័រ MCOT របស់ថៃផ្សាយជាភាសាអង់គ្លេសនៅថ្ងៃទី១៥ ឱ្យដឹងថា ការពិភាក្សាអំពីការមិនទុកចិត្តរយៈពេល៣ថ្ងៃប្រឆាំងលោកនាយករដ្ឋមន្ត្រីអាប់ភីស៊ីត វ៉េចាជីវ៉ា និងសមាជិកគណៈរដ្ឋមន្ត្រីរបស់លោក៩រូបទៀត ចំពោះការចោទប្រកាន់ពីបរាជ័យក្នុងការគ្រប់គ្រងប្រទេស និងការគ្រប់គ្រងអំពើពុករលួយបានចាប់ផ្តើមកាលពីព្រឹកថ្ងៃទី១៥ មីនា ហើយការបោះឆ្នោតពីការមិនទុកចិត្តនឹងត្រូវធ្វើឡើងនៅថ្ងៃទី១៨ មីនា ខាងមុខនេះ ។ ការចាប់ផ្តើមពិភាក្សានេះដឹកនាំដោយលោក Mingkwan Saengsuwan សមាជិសភាគណបក្សភឿថៃ ។
ការពិភាក្សាអំពីការមិនទុកចិត្តនេះធ្វើឡើងសំដៅលើការចោទប្រកាន់អំពីបរាជ័យរបស់រដ្ឋាភិបាលលោកអាប់ភីស៊ីត ក្នុងការគ្រប់គ្រងប្រទេស និងពីបទជាប់ពាក់ព័ន្ធជាមួយអំពើពុករលួយ ហើយក្នុងនោះរដ្ឋាភិបាលរបស់លោកអាប់ភីស៊ីត ក៏ត្រូវបានចោទប្រកាន់ពីបទរំលោភអំណាចផងដែរ ដោយការដាក់ឱ្យប្រើប្រាស់ច្បាប់សន្តិសុខពិសេសក្នុងគ្រាមិនចាំបាច់ ដែលរឹតបន្តឹងសេរីភាព និងសិទ្ធិមនុស្ស ។ រដ្ឋមន្ត្រី៨រូបរបស់លោកនាយករដ្ឋមន្ត្រីអាប់ភីស៊ីត រងការចោទប្រកាន់ពីបទពុករលួយផងដែរ ។ ក្នុងការពិភាក្សានាថ្ងៃដំបូង គណបក្សភឿថៃផ្តោតទៅលើក្រសួងពាណិជ្ជកម្ម និងការបរាជ័យរបស់ក្រសួងនេះក្នុងការដោះស្រាយបញ្ហាការឡើងថ្លៃ ប្រេងដូង និងការខ្វះខាតប្រេងដូង។
រដ្ឋមន្ត្រីទាំង៩រូប មានទាំងលោកស៊ូថេប ធឿក ស៊ូបាន់ ឧបនាយករដ្ឋមន្ត្រីផង នឹងប្រឈមមុខការបាត់បង់តំណែង ៕
ចែករំលែកព័តមាននេះ