រាជធានីភ្នំពេញ ៖ នៅយប់ថ្ងៃអាទិត្យទី១១ ធ្នូ ខានស្អែកនេះ ប្រដាល់«កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និងថៃ២រូបប៉ះគ្នា ។ ការប្រកួតនៅចុងសប្ដាហ៍នេះ កីឡាករ ឆៃ សារ៉ា ជាម្ចាស់ខ្សែក្រវាត់មួយរូបដែរ និងកីឡាករវ័យក្មេង វេង សុភ័ក្ត្រ ដែលសុទ្ធតែជើងខ្លាំងត្រូវបានសង្វៀនមួយនេះបើកផ្លូវឱ្យស្វាគមន៍កីឡាករថៃមកពីបាងកក ដោយរំពឹងថា ការប្រកួតនៅយប់ថ្ងៃអាទិត្យនេះនឹងកក្រើកខ្លាំងមិនខាន ។
ការប្រកួតដែលនឹងចាប់ផ្ដើមឡើងពីម៉ោង៨យប់ក្រោមការរៀបចំរបស់ស្រាបៀរ Black Cat និងស្ថិតនៅលើសង្វៀនទូរទស្សន៍អាស៊ីអាគ្នេយ៍នេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍នេះដំណើរការចំពេលរាត្រីថ្ងៃអាទិត្យ ដែលមានអ្នកទស្សនាយ៉ាងកកកុញស្រាប់ បើទោះជាការប្រកួតស្ថិតជាលក្ខណៈជាតិ និងជាតិក្ដី ។ កីឡាករកម្ពុជា២រូប គឺ ឆៃ សារ៉ា និង វេង សុភ័ក្ត្រ ក្លាយជាគូប្រកួតស៊ីសាច់ហុតឈាមជាមួយកីឡាករថៃនៅយប់ថ្ងៃអាទិត្យ ដែលនឹងមកដល់នៅថ្ងៃខានស្អែក ។ អ្នករៀបចំការប្រកួតបានអះអាងថា កីឡាករទាំង៤រូបមានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិរបស់ស្រាបៀរប្លេកខេត ឲ្យពួកគេប្រកួតគ្នានេះ ។ ក្នុងនោះ ភាគីខាងកីឡាករកម្ពុជាបានទាំងសុំខ្លួនឯងសាកកណ្ដាប់ដៃគ្នាតាំងពីឮមានការផ្គូផ្គងនោះផង ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ឆៃ សារ៉ា មកពីក្លិបក្រសួងការពារជាតិ ឱ្យឡើងប៉ះប្រកួតជាមួយកីឡាកថៃឈ្មោះផា យ៉ាក់ឡេក ក្នុងនាមជាគូឯកអន្តរជាតិសម្រាប់ប្រដាល់អន្តរជាតិនៅយប់ថ្ងៃអាទិត្យនោះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយភាគីទាំងពីរសុទ្ធតែបានដឹងពីគ្នា និងទទួលយកការផ្គូផ្គងសម្រាប់ការជួបគ្នា ។ កីឡាករឆៃ សារ៉ា លោកចាត់ទុកថា ជាជើងខ្លាំងម្នាក់នៅលើសង្វៀនប្រដាល់អន្តរជាតិ ទើបសម្រេចឱ្យឡើងប្រកួតនៅលើសង្វៀន Black Cat ដែលជាព្រឹត្តិការណ៍ចម្រុះដោយកីឡាករខ្លាំងៗនៅក្នុងពិភពប្រដាល់ ។
លោកជឿជាក់ថា សមត្ថភាពកីឡាកររូបនេះវាយសន្ធាប់បានល្អ បើទោះជាមុននេះបន្តិចគេត្រូវបរាជ័យក្រោមដៃកីឡាករថៃដែលធ្វើឱ្យអ្នកគាំទ្រខកចិត្តក្ដី ។ លោកថា ការចាញ់នោះជារឿងភ្លាត់ស្នៀតប៉ុណ្ណោះ ប៉ុន្តែធាតុពិតគឺលោកទុកចិត្តកីឡាករកម្ពុជារូបនេះ ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើ ។ លោកថា គូនេះជាជំនួបអ្នកខ្លាំងប៉ះអ្នកខ្លាំង ទើបលោករំពឹងយ៉ាងច្រើនថា ការប្រកួតដែលនឹងធ្វើឡើងពិតជាល្អត្រូវចិត្ត ។ ក្នុងជំនួបគូនេះ កីឡាករថៃផា យ៉ាក់ឡេក ធ្លាប់ប្រកួត៧២លើក ឈ្នះ៥៩លើក និងចាញ់១៣លើក ក្នុងពេលដែលកីឡាករកម្ពុជា ធ្លាប់ប្រកួត៦៣លើក ឈ្នះ៥១លើក ចាញ់១១លើក និងស្មើ១លើក ។
សម្រាប់កីឡាករវេង សុភ័ក្ត្រ លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃឈ្មោះយ៉ត សេនឆាយ នៅក្នុងព្រឹត្តិការណ៍ប្រដាល់អន្តរជាតិរបស់ស្រាបៀរBlack Cat នៅយប់ថ្ងៃអាទិត្យនោះដែរ ។ លោកថា ការប្រកួតរបស់គូនេះ នៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែល វេង សុភ័ក្ត្រ ទើបតែឡើងកូដតែពេលខ្លះម្ដងល្អម្ដងធ្លាក់ដៃពិបាកប៉ាន់ស្មានពីកម្រិតប្រកួត១០០ភាគរយ ហើយកីឡាករថៃក៏មិនណយ ។ លោកថា កីឡាករថៃធ្លាប់ប្រកួត៧៣លើក ឈ្នះ៦៨លើក និងចាញ់៥លើក រីឯកីឡាករកម្ពុជាដ្បិតថាក្មេងមែន តែក៏ធ្លាប់ប្រកួត៦១លើក ឈ្នះ៥១លើក ចាញ់៩លើក និងស្មើ១លើក ។ នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនទូរទស្សន៍អាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិផងដែរ ៕
ចែករំលែកព័តមាននេះ