រាជធានីភ្នំពេញ ៖ គូប្រកួតប្រដាល់មិត្តភាពដែលឧបត្ថម្ភដោយក្រុមហ៊ុនស្រាសាច់ដុំពិសេសនៅលើសង្វៀនទូរទស្សន៍ស៊ីអិនស៊ីថ្ងៃអាទិត្យទី១១ ធ្នូ ខាងមុខនេះ មានរហូតដល់ទៅ៦គូក្នុងនោះគូដែលគេចាប់អារម្មណ៍ជាងគេ គឺកីឡាករ សុខ ចិន្ដា មកពីក្លិបឃ្លាំងមឿងកីឡាប្រកួតជាមួយកីឡាករ រិទ្ធ មុន្នី មកពីក្លិបមកុដរាជសីហ៍ ។
គូនេះសុទ្ធតែជាអ្នកប្រដាល់ជើងចាស់ប៉ុន្តែកន្លងមកមិនធ្លាប់ជួបគ្នាទេ ។ សុខ ចិន្ដា ជាអ្នកប្រដាល់ដែលមានស្នៀតដៃ និងស្នៀតជើងល្អប៉ុន្តែការមកជួបជាមួយរិទ្ធ មុន្នី លើកនេះគេមិនហ៊ានសន្យាទុកមុនថាយ៉ាងណានោះដែរ ព្រោះគូប្រកួតមួយនេះក៏ជាអ្នកប្រដាល់ចាស់វស្សាដែលមានថ្វីដៃប្រកួតមិនអន់ទេ រាប់តាំងពីស្នៀតកែង ជង្គង់ និងម៉ាត់ឡើងទៅ ។ ទោះបីយ៉ាងណា កីឡាកររូបនេះមិនចេះមើលស្រាលលើគូប្រកួតឡើយ ជាពិសេសពេលជួបគូប្រកួតដែលមានសមត្ថភាពដូចសុខ ចិន្តា នេះតែម្ដង ។ ចាំមើលគូនេះនរណានឹងក្លាយជាអធិរាជនៅលើសង្វៀន?
ក្រៅពីគូដែលទស្សនិកជនចាប់អារម្មណ៍នេះទៅនៅលើសង្វៀនដដែលក៏មានការប្រកួតរវាងកីឡាករខ្លាំងៗជាច្រើនគូទៀតដូចជាកីឡាករងឿន វិចិត្រ មកពីក្លិបតាព្រហ្មមានជ័យប្រកួតជាមួយកីឡាករ មាឃ សុវណ្ណារ៉ា មកពីក្លិបរាជសីហ៍ខេត្តរតនគិរី ។ កីឡាករ សិទ្ធ លីជា មកពីក្លិបសាមគ្គីកូនខ្មែរ ប្រកួតជាមួយកីឡាករឡុង ខេត្ត មកពីក្លិបខ្លារខិនមានរិទ្ធ ។ កីឡាករឡៅ រតនា មកពីក្លិបទ័ពពិសេសឆត្រយោង៩១១ ប្រកួតជាមួយកីឡាករ ធន់ មករា មកពីសមាគមកីឡាប្រដាល់ក្រសួងការពារជាតិ ។
កីឡាករ លី ហ៊ាង មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ កន រិទ្ធី មកពីក្លិបនាគរាជគុនខ្មែរ និងគូចុងក្រោយកីឡាករ គជសារ ចាន់រាជ មកពីក្លិបកុលបុត្រគុនខ្មែរ ប្រកួតជាមួយកីឡាករ ឡុង សុធា មកពីក្លិបខ្លារខិនមានរិទ្ធ៕
ចែករំលែកព័តមាននេះ