រាជធានីភ្នំពេញ ៖ ប្រជាពលរដ្ឋកម្ពុជារំពឹងទទួលបានព័ត៌មានល្អទាក់ទងនឹងដំណក់ប្រេងដំបូងពីប្រទេសរបស់ខ្លួននាពេលឆាប់ៗនេះ។ ប៉ុន្តែការឆ្លើយតបរបស់មន្ត្រីជាន់ខ្ពស់នៃក្រសួងរ៉ែ និងថាមពល លើកឡើងថា ដំណក់ប្រេង
រាជធានីភ្នំពេញ ៖ ប្រជាពលរដ្ឋកម្ពុជារំពឹងទទួលបានព័ត៌មានល្អទាក់ទងនឹងដំណក់ប្រេងដំបូងពីប្រទេសរបស់ខ្លួននាពេលឆាប់ៗនេះ។ ប៉ុន្តែការឆ្លើយតបរបស់មន្ត្រីជាន់ខ្ពស់នៃក្រសួងរ៉ែ និងថាមពល លើកឡើងថា ដំណក់ប្រេងដំបូងទទួលបានយឺតឬលឿន គឺអាស្រ័យលើតម្លៃប្រេងនៅលើទីផ្សារអន្តរជាតិ ។
លោក ម៉េង សក្តិធារ៉ា រដ្ឋលេខាធិការក្រសួងរ៉ែ និងថាមពល បានថ្លែងឲ្យដឹងតាមទូរស័ព្ទកាលពីថ្ងៃទី៥ ធ្នូ កន្លងមកថា ការទទួលបានដំណក់ប្រេងដំបូងមិនទាន់មានភាពច្បាស់លាស់នៅឡើយទេ វាអាចរំពឹងទទួលបាននៅឆ្នាំ២០១៨ ឬឆ្នាំ២០១៩ ឬយូរជាងនេះ ដែលអាស្រ័យតាមតម្លៃប្រេងលើទីផ្សារអន្តរជាតិ ។
នីតិវិធីនៃការទាញយកប្រេង និងក្រុមហ៊ុនដែលវិនិយោគលើវិស័យនេះមានភាពស្មុគស្មាញច្រើនតាមរយៈការដោះដូរ ឬទិញលក់ភាគហ៊ុនជាបន្តបន្ទាប់ ។ ជាលទ្ធផល រហូតមកទល់ពេលនេះ មានតែក្រុមហ៊ុន Kris Energy ដែលបានកាន់កាប់១០០% មានសិទ្ធិទាញយកប្រេងពីសមុទ្រខ្មែរនៅតំបន់មួយដែលគេឲ្យឈ្មោះថា ប្លុកអេ ។
ការកាន់កាប់ភាគហ៊ុនរហូតដល់១០០%របស់ក្រុមហ៊ុន Kris Energy គឺបន្ទាប់ពីក្រុមហ៊ុន Moriko របស់ជប៉ុន និងក្រុមហ៊ុន GS Caltex របស់សាធារណរដ្ឋកូរ៉េបានលក់ភាគហ៊ុនឲ្យក្រុមហ៊ុននេះ ។
លោក ម៉េង សក្តិធារ៉ា ថ្លែងបន្តថា ៖ «ក្រុមហ៊ុន Kris Engergy បានទទួលការយល់ព្រមពីរាជរដ្ឋាភិបាលរួចហើយ ។ ដូច្នេះ យើងរំពឹងថា ដំណក់ប្រេងដំបូងអាចទទួលបាននៅឆ្នាំ២០១៨ ឬឆ្នាំ២០១៩ ខាងមុខ » ។
តើតម្លៃប្រេងនៅកម្ពុជានឹងធ្លាក់ចុះឬទេ នៅពេលកម្ពុជាទទួលបានដំណក់ប្រេងដោយខ្លួនឯង លោក ម៉េង សក្តិធារ៉ា ថ្លែងថា វាមិនពាក់ព័ន្ធគ្នានឹងការធ្លាក់ចុះនៃតម្លៃប្រេងនោះទេ ដោយសារប្រេងយកចេញពីសមុទ្រជាប្រភេទរ៉ែប្រេង ដែលត្រូវការកែច្នៃ ទើបអាចយកមកប្រើប្រាស់បាន និងត្រូវលក់ទៅកាន់ទីផ្សារអន្តរជាតិ ។ ប៉ុន្តែបើរោងចក្រកែច្នៃប្រេងនៅកម្ពុជាអាចដំណើរការបាន វាអាចជួយសម្រួលច្រើនដល់ការងារនេះ ។
លោកបន្តថា ៖ « រាជរដ្ឋាភិបាលបានអនុម័តយល់ព្រមលើការសាងសង់រោងចក្រចម្រាញ់ប្រេងនៅកម្ពុជារួចហើយ ប៉ុន្តែការសាងសង់មិនទាន់បានចាប់ផ្តើមទេ ដោយសារត្រូវសិក្សាពីផលប៉ះពាល់បរិស្ថានសង្គមរយៈពេលយូរតទៅទៀត » ។
ទោះជាយ៉ាងណា កាលពីឆ្នាំមុន លោក ឌិត ទីណា រដ្ឋលេខាធិការក្រសួងរ៉ែ និងថាមពល ធ្លាប់លើកឡើងថា កម្ពុជានឹងទទួលបានដំណក់ប្រេងដំបូងនៅឆ្នាំ២០១៨ ខាងមុខនេះ ។
តម្លៃប្រេងឥន្ធនៈនៅកម្ពុជាបានធ្លាក់ចុះ ស្របនឹងទីផ្សារប្រេងអន្តរជាតិផងដែរ ប៉ុន្តែបើធៀបជាមួយប្រទេសជិតខាងវិញ ប្រេងនៅកម្ពុជាមានតម្លៃថ្លៃជាងគេនៅឡើយ ដែលបញ្ហានេះរាជរដ្ឋាភិបាលតែងលើកឡើងថា ដោយសារកម្ពុជាមិនទាន់អាចចម្រាញ់ប្រេងដោយខ្លួនឯងបាន ៕
ចែករំលែកព័តមាននេះ