សូមកុំយល់ច្រឡំ ជុំវិញការតែងតាំងប្រធានក្រុមតំណាងរាស្ត្រជាប្រធានក្រុមសំឡេងភាគតិច
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍បកស្រាយ
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍បកស្រាយបញ្ជាក់ដល់សាធារណមតិ ដែលផ្សាយនៅលើបណ្តាញទំនាក់ទំនងសង្គមហ្វេសប៊ុក និងវេបសាយមួយចំនួន ដែលនៅតែនិយាយថា ប្រធានក្រុមសំឡេងភាគតិចគឺទុកនៅលោក សម រង្ស៊ី ហើយប្រធានក្រុមតំណាងរាស្ត្រទុកនៅជូនលោក កឹម សុខា គឺមានការបកស្រាយយ៉ាងដូច្នេះ ។
ទាក់ទងទៅនឹងការចុះផ្សាយរបស់ហ្វេសប៊ុក និងវេបសាយខាងលើ នាព្រឹកថ្ងៃទី៧ ខែធ្នូ នៅវិមានរដ្ឋសភា សម្តេចតេជោមានប្រសាសន៍បញ្ជាក់ជូនសាធារណមតិថា ដើម្បីធានាថាអ្វីដែលសម្តេចប្រធានរដ្ឋសភាធ្វើការសម្រេចតែងតាំងនោះត្រឹមត្រូវ ខ្ញុំសូមអាននិងបកស្រាយឱ្យបានច្បាស់ទៅលើមាត្រា៤៨ ត្រង់កថាខណ្ឌមួយនិយាយថា ប្រធានក្រុមតំណាងរាស្ត្រនៃគណបក្សនយោបាយក្រៅរាជរដ្ឋាភិបាលដែលមានអាសនៈក្នុងរដ្ឋសភាចាប់ពី២៥%ឡើងទៅ មានឈ្មោះហៅថា ប្រធានក្រុមមតិភាគតិចនៅរដ្ឋសភា ។
ប្រធានក្រុមមតិភាគតិច ជាគូសន្ទនាជាមួយប្រមុខរាជរដ្ឋាភិបាលទាក់ទងទៅនឹងបញ្ហាប្រទេសជាតិ ។ ប្រធានក្រុមមតិភាគតិចមានឋានៈស្មើនាយករដ្ឋមន្ត្រី ។ នៅទីនេះ អត្ថបទនេះបានបញ្ជាក់ច្បាស់ថា លុះត្រាតែមនុស្សនោះត្រូវបានតែងតាំងធ្វើជាប្រធានក្រុមតំណាងរាស្ត្រសិន ទើបមានសិទ្ធិធ្វើជាប្រធានក្រុមសំឡេងភាគតិច។ ដូច្នេះ ឆ្លងកាត់នូវការតែងតាំងនេះនៅក្នុងមាត្រា៤៨នេះ មិនតម្រូវឱ្យមានមនុស្ស២នាក់កាន់តំណែងប្រធានក្រុមភាគតិចម្នាក់ និងប្រធានក្រុមតំណាងរាស្ត្រម្នាក់ទៀតទេ ។
ដូច្នេះនៅព្រឹកនេះខ្ញុំមានគោលដៅថា ប្រសិនបើជាមិនអាចទទួលធ្វើការតែងតាំងបាន គឺមានតែវិធីដកត្រឡប់ដោយធ្វើវិសោធនកម្មមាត្រា៤៨ ដោយដកចេញទាំងអស់នូវតួនាទីតំណែង ។
ប៉ុន្តែដូចជាការល្អដែរ ដោយឥឡូវនេះលោកកឹម សុខា ក៏បានបញ្ជាក់ ឥឡូវលោកនឹងក្លាយទៅជាដៃគូរបស់សម្តេចក្រឡាហោម ស ខេង ក្នុងឋានៈជាប្រធាននៃក្រុមតំណាងរាស្ត្រ ហើយធ្វើជាដៃគូរបស់ខ្ញុំ ក្នុងឋានៈពិគ្រោះយោបល់លើបញ្ហាប្រទេសជាតិដែលត្រូវទំនាក់ទំនងជាមួយនាយករដ្ឋមន្ត្រី ។
សម្តេចតេជោមានប្រសាសន៍បន្តថា ខ្ញុំគិតថាមិនមានអ្វីកើតឡើងទេ តែគ្រាន់តែបញ្ជាក់ជូនសាធារណមតិឱ្យបានច្បាស់ និងកុំមានការបកស្រាយខុសទៅលើអត្ថបទដែលយើងបានធ្វើ ព្រោះអត្ថបទនេះខ្លួនខ្ញុំជាអ្នកតាក់តែងជូនទាំងស្រុង ហើយតាក់តែងឱ្យលោក សម រង្ស៊ី មានការងារធ្វើកាលពីពេលនោះ ហើយគ្រប់គ្រងបក្សឱ្យបាន ។ ចុងក្រោយ រៀបចំនៅក្នុងបន្ទប់ការងាររបស់ខ្ញុំនៅក្នុងរដ្ឋសភា ហើយបញ្ជូនឱ្យគណៈកម្មការនីតិកម្ម ដើម្បីបំពេញចូលទៅក្នុងនោះ រាប់ទាំងមធ្យោបាយគិតគូរទាំងមធ្យោបាយជំនួយការនិងតួនាទី ។
ដូច្នេះចំណុចនេះ គឺគិតគឺសូមសាធារណមតិកុំមានការភ័ន្តច្រឡំណាមួយក្នុងការបកស្រាយខុសក្នុងប៉ុន្មានសិបម៉ោងនេះ គឺសូមមេត្តាបញ្ឈប់ការនិយាយខុសថាប្រធានរដ្ឋសភាធ្វើមិនត្រឹមត្រូវ ។
ព្រោះថា គេស្នើសុំតែងតាំងតែប្រធានក្រុមតំណាងរាស្ត្រ ហេតុអ្វីបានទទួលស្គាល់ជាប្រធានសំឡេងភាគតិច នេះជាស្នាមទំនាស់ក្នុងអត្ថបទនេះតែម្តង ។ ប្រសិនមានការចរចាខុសគ្នា ខ្ញុំស្នើសុំឱ្យមានការធ្វើវិសោធនកម្មលុបចោលទាំងអស់ហើយវិលទៅរក៤៨វិញ គឺចប់សព្វគ្រប់ហើយ ធ្វើការរហ័ស ៕
ចែករំលែកព័តមាននេះ