មហាយក្សចិនបានច្រានចោលការព្រមានពីប្រធានអង្គការណាសា (NASA) ដែលចោទថា ចិនអាចនឹងកាន់កាប់ឋានព្រចន្ទ ដែលជាផ្នែកមួយនៃកម្មវិធីយោធាចិន ដោយលើកឡើងថា ចិនតែងតែអំពាវនាវឲ្យមានការកសាងសហគមន៍ប្រជាជាតិនៅទីអវកាស។
ចិនបានបង្កើនល្បឿនកម្មវិធីអវកាសរបស់ខ្លួនក្នុងរយៈពេលមួយទសវត្សរ៍កន្លងទៅនេះ ដោយផ្តោតសំខាន់លើការរុករកឋានព្រះចន្ទ។ ចិនបានចុះចតយាន្តគ្មានមនុស្សបើកជាលើកដំបូងនៅឋានព្រះចន្ទនៅក្នុងឆ្នាំ២០១៣និងរំពឹងថា នឹងបា.ញ់បង្ហោះរ៉ុក្កែតដែលមានថាមពលគ្រប់គ្រាន់ដើម្បីបញ្ជូនអវកាសយានិកទៅកាន់ព្រះចន្ទនៅបំណាច់ទសវត្សនេះ។
«យើងត្រូវតែមានការព្រួយបារម្ភខ្លាំងដែលថាចិនកំពុងចុះចតនៅលើព្រះច័ន្ទ និងនិយាយថា៖ វាជារបស់យើងហើយឥឡូវនេះ សូមអ្នកចេញទៅឲ្យឆ្ងាយ»។ នេះជាការថ្លែងរបស់លោក Bill Nelson ប្រាប់កាសែតអាឡឺម៉ង Bild នៅក្នុងកិច្ចសម្ភាសមួយដែលចុះផ្សាយកាលពីថ្ងៃសៅរ៍កន្លងទៅនេះ។
ប្រធានភ្នាក់ងារអវកាសអាមេរិកនិយាយថា កម្មវិធីអវកាសរបស់ចិនគឺជាកម្មវិធីយោធា ហើយចិនបានលួចគំនិត និងបច្ចេកវិទ្យាពីប្រទេសផ្សេងៗ។ ប៉ុន្តែការចោទប្រកាន់របស់ NASA ត្រូវបានចិនបដិសេធ។
អ្នកនាំពាក្យក្រសួងការបរទេសចិនលោក Zhao Lijian និយាយថា «នេះមិនមែនជាលើកទីមួយទេ ដែលប្រធានរដ្ឋបាលអាកាសចរណ៍ និងអវកាសជាតិអាមេរិក មិនអើពើនឹងការពិត និងនិយាយដោយមិនទទួលខុសត្រូវអំពីប្រទេសចិន» ។
«ភាគីអាមេរិកបានបង្កើតឡើងជានិច្ចនូវយុទ្ធនាការលាបពណ៌ប្រឆាំងនឹងការខិតខំប្រឹងប្រែងអវកាសធម្មតា និងសមហេតុផលរបស់ចិន ហើយចិនប្រឆាំងដាច់ខាតចំពោះការលើកឡើងដែលមិនទទួលខុសត្រូវបែបនេះ»។
អ្នកនាំពាក្យរូបនោះបញ្ជាក់ថា ចិនតែជំរុញការកសាងអនាគតរួមគ្នាសម្រាប់មនុស្សជាតិនៅលំហរអាកាស និងប្រឆាំងចំពោះការបំពាក់អាវុ.ធ និងការប្រណាំងសព្វាវុ.ធនៅទីអវកាស។
សូមបញ្ជាក់ថា ក្រោមកម្មវិធី Artemis អង្គការណាសាគ្រោងនឹងបញ្ជូនបេសកម្មនាវិកទៅកាន់គន្លងព្រះច័ន្ទនៅក្នុងឆ្នាំ ២០២៤ និងធ្វើការចុះចតនៅជិតប៉ូលខាងត្បូងនៅឆ្នាំ ២០២៥។ ចំណែកចិនវិញគ្រផងនឹងបញ្ជូនបេសកកម្មទៅកាន់ប៉ូលខាងត្បូងរបស់ព្រះច័ន្ទនៅក្នុងទសវត្សរ៍នេះ៕ (យោងតាមប្រភព៖ Reuters)
ចែករំលែកព័តមាននេះ