រាជធានីភ្នំពេញ ៖ នៅមន្ទីរពេទ្យកាល់ម៉ែត កាលពីព្រឹកថ្ងៃទី៨ ខែធ្នូ មូលនិធិអន្តរជាតិនៃប្រទេសសិង្ហបុរី(SIF) សេវាកម្មសុខាភិបាលសិង្ហបុរី(Sing Health) និងមន្ទីរពេទ្យកាល់ម៉ែត បានប្រារព្ធពិធីបិទវគ្គបណ្តុះបណ្តាលលើវេជ្ជសាស្ត្រសង្គ្រោះបន្ទាន់ បន្ទាប់ពីបានដំណើរការអស់រយៈពេលមួយសប្តាហ៍ ដើម្បីលើកកម្ពស់និយាមនៃការថែទាំវេជ្ជសាស្ត្រសង្គ្រោះបន្ទាន់នៅប្រទេសកម្ពុជា ។
លោកសាស្ត្រាចារ្យ គង់ សត្យា អគ្គនាយករងមន្ទីរពេទ្យកាល់ម៉ែត មានប្រសាសន៍ថា មូលនិធិអន្តរជាតិនៃប្រទេសសិង្ហបុរី(SIF) សេវាកម្មសុខាភិបាល(Sing Health) សហការជាមួយមន្ទីរពេទ្យកាល់ម៉ែត បានបើកវគ្គបណ្តុះបណ្តាលផ្នែកខាងសង្គ្រោះបន្ទាន់កម្រិតស្រាល មធ្យម និងធ្ងន់ នៅមន្ទីរពេទ្យកាល់ម៉ែតរយៈពេលមួយសប្តាហ៍ ។ ការបណ្តុះបណ្តាលនេះធ្វើឡើងចំពោះវេជ្ជបណ្ឌិត គិលានុបដ្ឋាក គឺយើងធ្វើព្រមគ្នាទាំងអស់ដើម្បីធានាបានថា ការផ្តល់សេវាសង្គ្រោះបន្ទាន់នៅមន្ទីរពេទ្យកាល់ម៉ែតមានកម្រិតស៊ីជម្រៅ ហើយមានគុណភាពនិងមានបរិមាណផងដែរ ។
មូលនិធិអន្តរជាតិនៃប្រទេសសិង្ហបុរី(SIF) សេវាកម្មសុខាភិបាលសិង្ហបុរី(Sing Health)បានជ្រើសរើសយកមន្ទីរពេទ្យកាល់ម៉ែតធ្វើជាកន្លែងបណ្តុះបណ្តាលយោងតាមកិច្ចព្រមព្រៀងរវាងមន្ទីរពេទ្យកាល់ម៉ែត និងសេវាកម្មសុខាភិបាលសិង្ហបុរី (Sing Health) ព្រោះថាមន្ទីរពេទ្យកាល់ម៉ែតជាមន្ទីរពេទ្យថ្នាក់ជាតិ ដោយសារតែមន្ទីរពេទ្យនេះទទួលអ្នកជំងឺសង្គ្រោះបន្ទាន់គ្រប់មជ្ឈដ្ឋានទាំងអស់ក្នុងប្រទេសកម្ពុជា ។
អ្នកជំងឺដែលត្រូវបានបញ្ជូនមកសង្គ្រោះនៅមន្ទីរពេទ្យកាល់ម៉ែតមានលក្ខណៈធ្ងន់ធ្ងរស្មុគស្មាញ ដូច្នេះទាមទារឲ្យមានការយកចិត្តទុកដាក់យ៉ាងខ្លាំង ដើម្បីធ្វើម្តេចយើងអាចជួយសង្គ្រោះបានទាន់ពេលវេលា ហើយនិងមានឱកាសដើម្បីព្យាបាលបន្តទៅទៀត ។ ដូច្នេះដោយហេតុថា មិត្តខាងសិង្ហបុរីមានជំនាញផ្នែកសង្គ្រោះបន្ទាន់ ហើយបានជួយបណ្តុះបណ្តាលគ្រូយើងធ្វើម្តេចឲ្យឡើងគុណភាពផ្នែកសង្គ្រោះប្រហាក់ប្រហែលជាមួយប្រទេសជិតខាង ជាពិសេសប្រទេសសិង្ហបុរីតែម្តង ។ ការបណ្តុះបណ្តាលនេះគឺមានឧបករណ៍ទំនើប ដែលអាចធ្វើឲ្យសិក្ខាកាមបានយល់ច្បាស់ ដោយមានការធ្វើត្រាប់ ធ្វើការបង្ហាញជាម៉ានីកាំង គឺថាមានលក្ខណៈងាយស្រួល ។
លោកសាស្ត្រាចារ្យ គង់ សត្យា បញ្ជាក់ថា ការបណ្តុះបណ្តាលនេះគឺជាលើកទី៣ហើយដែលយើងបានធ្វើពីរលើករួចមកហើយ ។ ក្នុងការបណ្តុះបណ្តាលលើកទី៣នេះ គឺមានការបណ្តុះបណ្តាលផ្នែកសង្គ្រោះបន្ទាន់ផ្នែកបេះដូង ផ្នែកសង្គ្រោះបន្ទាន់ទូទៅ និងផ្នែកសង្គ្រោះបន្ទាន់ខាងប្រព័ន្ធប្រសាទ ។
លោកស្រី Jean Tan នាយិកាប្រតិបត្តិរបស់ SIF ថ្លែងថា ការងារនៅក្នុងប្រទេសកម្ពុជាដែលរៀបចំរួមគ្នាដោយជនជាតិសិង្ហបុរី និងជនជាតិកម្ពុជា គឺផ្សារភ្ជាប់ និងសហប្រតិបត្តិការដើម្បីការផ្លាស់ប្តូរជាវិជ្ជមានមួយ ។ យើងមានសកម្មភាពនៅប្រទេសកម្ពុជាតាំងពីឆ្នាំ១៩៩២មកម្ល៉េះ ដោយធ្វើការរួមគ្នា ដើម្បីកសាងសមត្ថភាពក្នុងការថែទាំវេជ្ជសាស្ត្រ ការបណ្តុះបណ្តាល និងការប្រាស្រ័យទាក់ទងគ្នាក្នុងសង្គម ។
នៅក្នុងដំណើរការនេះ យើងអាចស្គាល់និងយល់គ្នាកាន់តែច្បាស់ ហើយការថែទាំវេជ្ជសាស្ត្រសង្គ្រោះបន្ទាន់ និងគម្រោងគ្រប់គ្រងនេះគឺជាការខិតខំប្រឹងប្រែងបន្តទៀត ដើម្បីសហភាតរភាពក្នុងការចែករំលែកបទពិសោធន៍ និងធនធានដើម្បីលើកកម្ពស់គុណភាណនៃជីវិតក្នុងការចែករំលែកទៅអនាគត ។
គួរបញ្ជាក់ថា ក្នុងរយៈពេល៣ឆ្នាំ អ្នកជំនាញផ្នែកវេជ្ជសាស្ត្រសង្គ្រោះបន្ទាន់ ថែទាំសង្គ្រោះបន្ទាន់ និងសម្ព័ន្ធសុខាភិបាលពីប្រទេសសិង្ហបុរី ជួយបណ្តុះបណ្តាលគ្រូបង្គោលដែលរួមមានគ្រូពេទ្យ២០រូប គិលានុបដ្ឋាក៤០រូប និងអ្នកព្យាបាលដោយចលនា១០រូប ពីមន្ទីរពេទ្យកាល់មែ៉ត មន្ទីរពេទ្យមិត្តភាពខ្មែរ-សូវៀត មន្ទីរពេទ្យព្រះកុសុមៈ មជ្ឈមណ្ឌលជាតិគាំពារមាតានិងទារក និងសាកលវិទ្យាល័យវិទ្យាសាស្ត្រសុខាភិបាល ។ គ្រូបង្គោលទាំង៧០រូបនេះ មានភារៈចែករំលែកចំណេះដឹងរបស់ខ្លួនដល់មិត្តរួមការងារដើម្បីបង្កើតជាសហគមន៍អ្នកជំនាញផ្នែកនេះឲ្យកាន់តែធំឡើង ដើម្បីឆ្លើយតបតាមតម្រូវការដ៏ចាំបាច់ ៕
ចែករំលែកព័តមាននេះ