រាជធានីភ្នំពេញ ៖ កាលពីថ្ងៃទី៨ ធ្នូ ម្សិលមិញ ទូរទស្សន៍អាស៊ីអាគ្នេយ៍បានប្រកាសបង្ហាញពីសមាសភាពកីឡាករកម្ពុជាចំនួន៤រូប ដែលត្រូវបានជ្រើសរើសឱ្យប្រកួតដណ្ដើមខ្សែក្រវាត់អន្តរជាតិវគ្គ២របស់ខារ៉ាបាវ ។ សមាសភាពកីឡាករទាំងនោះ
រាជធានីភ្នំពេញ ៖ កាលពីថ្ងៃទី៨ ធ្នូ ម្សិលមិញ ទូរទស្សន៍អាស៊ីអាគ្នេយ៍បានប្រកាសបង្ហាញពីសមាសភាពកីឡាករកម្ពុជាចំនួន៤រូប ដែលត្រូវបានជ្រើសរើសឱ្យប្រកួតដណ្ដើមខ្សែក្រវាត់អន្តរជាតិវគ្គ២របស់ខារ៉ាបាវ ។ សមាសភាពកីឡាករទាំងនោះមិនមានអ្នកណាម្នាក់ដែលមិនល្បីឈ្មោះ និងមិនមានប្រវត្តិប្រកួតច្រើននោះទេ ខណៈដែលកីឡាករបរទេសទាំង៤រូបឯណោះវិញ ក៏សុទ្ធតែជាសមាសភាពអ្នកល្បីនិងមានស្នាដៃមិនអន់ផងដែរសម្រាប់រដូវកាលទី២នេះ ។
លោក ញាណ សុធី អ្នករៀបចំព្រឹត្តិការណ៍ប្រដាល់ប្រចាំនៅទូរទស្សន៍អាស៊ីអាគ្នេយ៍បានអះអាងថា ដោយសារតែការប្រកួតរដូវកាលទី១ ក្នុងព្រឹត្តិការណ៍ដណ្ដើមខ្សែក្រវាត់ខារ៉ាបាវវគ្គ១ទទួលបានជោគជ័យ ទើបលោកសម្រេចរៀបចំរដូវកាលទី២ ដោយដាក់សមាសភាពកីឡាករល្បីៗ និងខ្លាំងៗតែម្ដងនៅក្នុងរដូវកាលទី២ ។ ទោះបីយ៉ាងណាលោកថា ការប្រកួតនៅមិនទាន់ចាប់ផ្ដើមនៅថ្ងៃសៅរ៍ សប្ដាហ៍នេះនៅឡើយទេ ដោយសារតែកីឡាករមួយចំនួននៅជាប់កុងត្រាជាមួយនឹងប៉ុស្ដិ៍ផ្សេង ដែលមិនអាចឡើងប្រកួតដណ្ដើមពិន្ទុនៅថ្ងៃសៅរ៍ទី១០ ធ្នូ នេះបាន ។
លោកថា ការប្រកួតនឹងលើកទៅធ្វើនៅសប្ដាហ៍ក្រោយថ្ងៃទី១៧ ធ្នូ ដើម្បីឱ្យកីឡាករកម្ពុជា និងបរទេសឡើងប្រកួតប៉ះគ្នាតែម្ដងនៅក្នុងថ្ងៃនោះ ។ លោកថា សមាសភាពកីឡាករកម្ពុជាលោកសម្រេចដាក់សុទ្ធតែកីឡាករល្អៗ និងល្បីៗតែម្ដង ដូចជាកីឡាករឡុង សុវណ្ណឌឿន ដែលឆ្លងកាត់ការប្រកួត៩៥លើក ឈ្នះ៨១លើក ចាញ់់៩លើក ស្មើ៥លើក និងធ្លាប់ផ្ដួលគូប្រកួតឱ្យសន្លប់រហូតដល់២៥លើក ។ កីឡាកររឿង សោភ័ណ្ឌ ដែលឆ្លងកាត់ការប្រកួត១៤១លើក ឈ្នះ១២៥លើក ចាញ់១៤លើក និងស្មើ២លើក ។ កីឡាករពុទ្ធ ឆាយរិទ្ធី ឆ្លងកាត់ការប្រកួត៨២លើក ឈ្នះ៦៦លើក ចាញ់១៥លើក និងស្មើ១លើក និងកីឡាករអ៊ុំ ចំរើន ដែលទើបតែចូលរោងការ និងឆ្លងកាត់ការប្រកួត១០០លើក ឈ្នះ៧០លើក ចាញ់៣០លើក និងមិនដែលស្មើ។ លោកថា កីឡាករជើងខ្លាំងកម្ពុជាសុទ្ធតែបង្ហាញខ្លួននៅថ្ងៃសន្និសីទកាសែតដោយពួកគេម្នាក់ៗសុទ្ធតែស្ថិតក្នុងប្រភេទទម្ងន់៦៨គីឡូក្រាម និងសុទ្ធតែបានតាំងចិត្តថានឹងធ្វើឱ្យបានលទ្ធផលវិជ្ជមានដោយមិនឱ្យជាប់ឈ្មោះថាប្រកួតមិនអស់ដៃ ឬលក់ខ្លួន ។
លោកថា សមាសភាពកីឡាករកម្ពុជាសុទ្ធតែល្អ និងមានកេរ្តិ៍ឈ្មោះតែលោកមិនទាន់ប្រាកដថា នឹងឈ្នះកីឡាករបរទេសនៅឡើយទេ ដោយសារតែភាគីខាងបរទេសគឺមាន២រូបជាកីឡាករឡាវ និង២រូបទៀតជាកីឡាករថៃដែលម្នាក់ៗសុទ្ធតែមានក្រេឌីត និងមានអ្នកទស្សនាកម្ពុជាភាគច្រើនទទួលស្គាល់ថ្វីដៃ ។ លោកថា ការប្រកួតមួយនេះនឹងកក្រើកខ្លាំងជាងរដូវកាលទី១របស់ប្រដាល់អន្តរជាតិខារ៉ាបាវ ដោយផ្អែកថាកីឡាករទាំង២ភាគីសុទ្ធតែល្បី និងខ្លាំង ។
លោក ញាណ សុធី បន្តថា ក្នុងវេទិកាសន្និសីទកាសែតនោះ កីឡាករបរទេសមិនត្រូវបានអញ្ជើញឱ្យបង្ហាញខ្លួននោះទេ ដោយសារតែថ្លៃសំបុត្រយន្តហោះ ឬថ្លៃធ្វើដំណើរដោយរថយន្តក៏ត្រូវចំណាយខ្ពស់សម្រាប់ពួកគេ ។ ទោះបីយ៉ាងណា លោកបានបង្ហាញឱ្យស្គាល់ពីសមាសភាពកីឡាករបរទេសទាំង៤ ដោយថាកីឡាករថៃរួមមាន កីឡាករ Keng Kat ដែលឆ្លងកាត់ការប្រកួតបាន៩០លើក ឈ្នះ៧៩លើក ចាញ់៧៩លើក និងស្មើ១លើក និងកីឡាករ Sang Yout ដែលឆ្លងកាត់ការប្រកួត៧២លើក ឈ្នះ៥៩លើក ចាញ់១២លើក និងស្មើ១លើក ដូចគ្នា ។ ដោយឡែកសម្រាប់សមាសភាពកីឡាករឡាវរួមមាន កីឡាករ Thav Phuo Lavong ដែលឆ្លងកាត់ការប្រកួតបាន១០១លើក ឈ្នះ៨១លើក ចាញ់១៨លើក និងស្មើ២លើក និងកីឡាករ Thav Uolan ដែលឆ្លងកាត់ការប្រកួតបាន៦៣លើក ឈ្នះ៥៣លើក ចាញ់១០លើក និងមិនធ្លាប់ស្មើ ។
លោកថា កីឡាករទាំង៨រូបត្រូវបានបែងចែកជាក្រុមខ្មែរ និងបរទេសដោយឡែកពីគ្នាដូចព្រឹត្តិការណ៍អន្តរជាតិខារ៉ាបាវវគ្គ១ដែរ ដោយរូបមន្តគឺកីឡាករខ្មែរត្រូវប្រកួតជាមួយកីឡាករបរទេសរហូតទាល់តែអស់ ហើយយកអ្នកមានពិន្ទុខ្ពស់ជាងគេតំណាងឱ្យក្រុមកម្ពុជាម្នាក់ និងម្នាក់ទៀតតំណាងឱ្យក្រុមកីឡាករបរទេសឡើងប្រកួតគ្នាក្នុងវគ្គផ្ដាច់ព្រ័ត្រ។
លោក តែម ម៉ឺន ប្រធានសហព័ន្ធកីឡាប្រដាល់កម្ពុជា បានអះអាងថា សមាសភាពទាំងកីឡាករខ្មែរ និងបរទេសសម្រាប់ព្រឹត្តិការណ៍ដណ្ដើមខ្សែក្រវាត់ខារ៉ាបាវវគ្គ២ សុទ្ធតែជាជើងខ្លាំង និងមានប្រវត្តិប្រកួតខ្លាំងដូចគ្នា ។ លោករំពឹងយ៉ាងខ្លាំងថា កីឡាករទាំង៨រូប នឹងប្រកួតគ្នាបានល្អ ហើយមិនលួចទៅទទួលប្រកួតឱ្យមានគ្រោះថ្នាក់ ឬដើរហើរមិនគិតពីសុវត្ថិភាព បណ្ដាលឱ្យប៉ះពាល់ការប្រកួតក្នុងពេលដណ្ដើមពិន្ទុគ្នានោះទេ ។ លោកថា កីឡាករម្នាក់ៗត្រូវមានមនសិការ និងមានឆន្ទៈ ទើបអាចជំរុញឱ្យវិស័យប្រដាល់រីកចម្រើន ជាពិសេសគឺឱ្យម្ចាស់កម្មវិធី គឺក្រុមហ៊ុនខារ៉ាបាវ ដែលបានបោះទុនមានកម្លាំងចិត្តបន្តការឧបត្ថម្ភដល់វិស័យប្រដាល់នៅកម្ពុជា ៕
ចែករំលែកព័តមាននេះ