បច្ចុប្បន្ន ការវិនិយោគ មិនមែនជារឿងដែលនៅឆ្ងាយពីខ្លួន ឬសម្រាប់តែអ្នកមានទ្រព្យតទៅទៀតទេ គឺគ្រប់គ្នាអាចវិនិយោគបានតាមប្រាក់ចំណូលរបស់ខ្លួន ។ ចំណេះដឹងនៃការវិនិយោគ ក៏អាចទៅកាន់ដោយងាយនៅតាមតូប
បច្ចុប្បន្ន ការវិនិយោគ មិនមែនជារឿងដែលនៅឆ្ងាយពីខ្លួន ឬសម្រាប់តែអ្នកមានទ្រព្យតទៅទៀតទេ គឺគ្រប់គ្នាអាចវិនិយោគបានតាមប្រាក់ចំណូលរបស់ខ្លួន ។ ចំណេះដឹងនៃការវិនិយោគ ក៏អាចទៅកាន់ដោយងាយនៅតាមតូបលក់សៀវភៅ និងអុីនធើរណេត ។ ប៉ុន្តែការវិនិយោគគ្រប់ពេលនឹងបានទទួលផលតបស្នងល្អជានិច្ចនោះ គឺអាស្រ័យលើកត្តាច្រើនយ៉ាង ។
បើតាមស្ថិតិបង្ហាញថា មនុស្សភាគច្រើនបានបរាជ័យក្នុងការវិនិយោគ ។ យើងអាចមកមើលមូលហេតុដែលធ្វើឱ្យពួកគេបរាជ័យ ឬវិនិយោគហើយមិនសម្រេចតាមគោលដៅផ្នែកហិរញ្ញវត្ថុ ដោយសារអ្វីខ្លះ ?
១-មិនព្រមចាប់ផ្តើម ឬមិនស្វែងរកចំណេះដឹង ៖
ពួកគេតែងនិយាយថា ចាំបន្តិចសិន នៅមិនទាន់បានត្រៀមខ្លួន ដែលហៅថា ពន្យារពេលពីមួយថ្ងៃទៅមួយថ្ងៃជារឿយៗ ។ នៅពេលមិនព្រមចាប់ផ្តើម ចំណេះដឹងក្នុងការវិនិយោគរបស់យើង ក៏មិនរីកលូតលាស់ដែរ ។ ការគ្រាន់តែស្តាប់គេនិយាយ ឬដឹងត្រឹមសើៗ វាពិតជាមិនទទួលជោគជ័យយ៉ាងពិតប្រាកដ ព្រោះការវិនិយោគ ជាវិទ្យាមួយដែលត្រូវសិក្សា ។
២-ខ្លាចខាតទុន ខ្លាចលំបាក ឬខ្លាចត្រូវគេបោកប្រាស់ ៖
ការខ្លាច គឺកើតពីការមិនដឹង ខណៈយើងមិនព្រមចាប់ផ្តើមសិក្សា និងមិនដើរទៅរកវា ហេតុនេះ ភាពភ័យខ្លាចនៅតែមាន ព្រោះតែមិនបានរៀនសូត្រ ។ ពិតហើយ ការខ្លាចគឺជារឿងដែលល្អសម្រាប់អ្នកជំនួញ ព្រោះនឹងធ្វើឱ្យយើងមិនប្រញាប់ប្រញាល់ខ្លាំងពេក ប៉ុន្តែការខ្លាចនោះត្រូវស្ថិតនៅលើមូលដ្ឋានហានិភ័យអាចទទួលយកបាន ។ នៅពេលបានយល់ពីហានិភ័យ យើងនឹងមិនខ្លាចខ្លាំងពេកទេ ។
ប៉ុន្តែដើម្បីកម្ចាត់ភាពភ័យខ្លាចចេញពីយើងនោះ ត្រូវចាប់ផ្តើមពីការឈានជើងទៅសិក្សាជាមុន កុំរវល់តែស្រមៃ និងគិតដល់ការវិនិយោគក្នុងទស្សនៈអវិជ្ជមាន ព្រោះអាចធ្វើឱ្យយើងបាត់បង់ឱកាសល្អក៏ថាបាន ។
៣-គ្មានពេលវេលាតាមដានទិន្នន័យ ៖
នៅពេលវិនិយោគអ្វីមួយហើយ ត្រូវមានពេលវេលាក្នុងការវិភាគ ដោយយើងត្រូវតាមដានដំណឹងពីទ្រព្យដែលវិនិយោគនោះ ។ ប៉ុន្តែបច្ចុប្បន្ន មានបច្ចេកវិទ្យាអាចជួយឱ្យយើងប្រើពេលវេលាបានយ៉ាងមានប្រសិទ្ធភាព ។ សាកល្បងយកមកប្រើប្រាស់ ដើម្បីបន្ថែមឱ្យការវិនិយោគទូលំទូលាយ ។
យើងអាចរកប្រភេទការវិនិយោគដែលសមស្របនឹងរយៈពេលរបស់ខ្លួនដូចជា បើសិនជាមិនសូវមានពេលវេលា ក៏អាចវិនិយោគលើទ្រព្យដែលមានការប្រែប្រួលតិច គឺអាចជួយបានមួយផ្នែកផងដែរ ។
៤-វិនិយោគទៅលើអ្វីមិនស្ទាត់ ឬគ្មានចំណេះដឹង ៖
អ្នកជំនួញដែលតែងធ្វើតាមព័ត៌មាន វិនិយោគតាមមិត្តភក្តិ តាមញាតិ ឬមានអ្នកណែនាំ គឺតែងជួបបញ្ហា ព្រោះមនុស្សម្នាក់ៗមានទម្លាប់ ដំណើរជីវិតខុសគ្នា ហើយចំណង់ចំណូលចិត្ត និងចំណេះដឹងផ្សេងៗក៏មិនស្មើគ្នាដែរ ។ អ្នកដែលមកបបួល គឺពួកគេស្មានថា ប្រសិនបើល្អសម្រាប់គេ ក៏ត្រូវតែល្អជាមួយមនុស្សដែលគេបបួលដែរ។ អ្នកដែលត្រូវគេបបួលគិតថា នៅគេធ្វើបានល្អ ខ្លួនក៏អាចធ្វើបានល្អដូចគ្នា ។ ការវិនិយោគអាចស័ក្តិសមជាមួយមនុស្សម្នាក់ ប៉ុន្តែមិនស័ក្តិសមជាមួយអ្នកដទៃ គឺជារឿងធម្មតា ។
ដូច្នេះ ចូរវិនិយោគលើអ្វីដែលស្គាល់ ល្អជាងការវិនិយោគតាមមិត្តភក្តិ ញាតិ ឬវិនិយោគព្រោះក្រែងចិត្តអ្នកបបួល ។ ប្រាក់ជារបស់យើង បើសិនជាខាតទុន នឹងគ្មានអ្នកណាមកទទួលខុសត្រូវជំនួសទេ ក្រៅពីខ្លួនឯង ដោយយើងប្រកាន់ថា បើខុសឆ្គង សូមឱ្យកើតដោយផ្ទាល់ដៃរបស់ខ្លួនល្អជាង ព្រោះយ៉ាងហោចណាស់ យើងនឹងទទួលមេរៀនផងដែរ ។
៥-ប្រើយុទ្ធសាស្ត្រខុស ឬដើរខុសផ្លូវ ៖
វាជាការសម្រេចចិត្តខុស ឬជាការដើរខុសផ្លូវតាំងពីយូរ ល្មមតែដឹងខ្លួន គឺយឺតពេលទៅហើយ ខណៈដើមទុនបាត់បង់ ទោះជាហៅមកវិញ ក៏ត្រូវប្រើពេលវេលាយូរទៀតទម្រាំយកប្រាក់នោះមកបាន ដែលធ្វើឱ្យផលតបស្នងប្រៀបដូចនឹងការវង្វេងផ្លូវ និងខាតពេលវេលា ។
៦-មិនបន្ថែមប្រាក់សន្សំ ៖
គឺមិនបន្ថែមប្រាក់វិនិយោគនៅពេលដែលដើមទុនតិច ហើយផលតបស្នងធៀបនឹងភាគរយ ក៏ត្រូវតិចទៅតាម ។ ដូច្នេះ ត្រូវសន្សំប្រាក់ រួចយកប្រាក់ទៅបំពេញការវិនិយោគជារឿយៗ ប៉ុន្តែមិនមានន័យថា មិនឱ្យបន្ថែមលុយខណៈកំពុងខាតទុននោះទេ ។
៧-វិនិយោគបែបភ្នាល់ ៖
ការវិនិយោគ និងការភ្នាល់ មានផ្នែកស្រដៀងគ្នាជាច្រើន ជាពិសេសការវិនិយោគក្នុងរយៈពេលខ្លីៗ ឬហៅថា ការបង្កើតប្រាក់ចំណេញ ។ ពេលខ្លះ អ្នកជំនួញនឹងយល់ច្រឡំលើខ្លួនឯង ព្រោះការបង្កើតប្រាក់ចំណេញនោះមានការប្រែប្រួលខ្លាំង ដោយប៉ះពាល់ដល់អារម្មណ៍ច្រើនផងដែរ រហូតដល់ពេលខ្លះភ្លេចវិធី និងផ្លូវនៃការវិនិយោគរបស់ខ្លួន ហើយក្លាយជាការវិនិយោគបែបភ្នាល់ ។
ការវិនិយោគមិនងាយស្រួលដូចការគិតឡើយ ហើយក៏មិនមែនទទួលបានតែម្យ៉ាងនោះដែរ ។ ការខុសឆ្គង ឬឈានមិនដល់ក្តីសុបិនផ្នែកវិនិយោគ គឺបណ្តាលមកពីមូលហេតុ៧យ៉ាងខាងលើនេះ ។ ចំណុចដំបូងដែលត្រូវធ្វើ គឺក្លាហានសិក្សា និងចាប់ផ្តើមឱ្យបានជាមុននោះភាពភ័យខ្លាចអ្វីដែលមិនស្គាល់នឹងបាត់ទៅ ហើយយើងនឹងអាចដើរលើផ្លូវវិនិយោគដោយជោគជ័យ ។ ចំណែកផលតបស្នងនឹងសមដូចអ្វីដែលសង្ឃឹមនិងតាំងចិត្តនោះ គឺស្ថិតនៅលើថ្វីដៃឱ្យស៊ីជម្រៅដើម្បីរីកចម្រើនថែមទៀត ៕
ចែករំលែកព័តមាននេះ