ខេត្តព្រះសីហនុ ៖ នារយៈពេល៤ខែនៃយុទ្ធនាការផ្សព្វផ្សាយប្រមូលពន្ធលើមធ្យោបាយយានយន្តគ្រប់ប្រភេទក្នុងឆ្នាំ២០១៦ ត្រូវបានបិទកញ្ចប់ទិន្នន័យទទួលការបង់ពន្ធប្រចាំឆ្នាំ កាលពីថ្ងៃទី៣០ វិច្ឆិកា កន្លងមក ។ លទ្ធផលបូកសរុប
ខេត្តព្រះសីហនុ ៖ នារយៈពេល៤ខែនៃយុទ្ធនាការផ្សព្វផ្សាយប្រមូលពន្ធលើមធ្យោបាយយានយន្តគ្រប់ប្រភេទក្នុងឆ្នាំ២០១៦ ត្រូវបានបិទកញ្ចប់ទិន្នន័យទទួលការបង់ពន្ធប្រចាំឆ្នាំ កាលពីថ្ងៃទី៣០ វិច្ឆិកា កន្លងមក ។ លទ្ធផលបូកសរុបចំនួនរថយន្ត និងថវិការបស់សាខាពន្ធដារខេត្តឃើញថា មានការកើនឡើងគួរឱ្យកត់សម្គាល់ជាងឆ្នាំ២០១៥ ។ នេះបើតាមប្រសាសន៍របស់លោក នុត វុត្ថា ប្រធានសាខាពន្ធដារខេត្ត បានឱ្យដឹងកាលពីរសៀលថ្ងៃទី៥ ធ្នូ ។
លោកបន្តថា ៖ « កាលពីអំឡុងឆ្នាំ២០១៥ រថយន្តដែលចូលមកបង់ពន្ធតាមសេចក្តីប្រកាសរបស់អគ្គនាយកដ្ឋានពន្ធដារសាខាខេត្តព្រះសីហនុ មានចំនួន៧.៩១៧គ្រឿង ទទួលបានថវិកាចំណូល២.៤៩៧.៦៩០.០០០លានរៀល។ ដោយឡែក នៅឆ្នាំ២០១៦ ក្នុងរយៈពេលយុទ្ធនាការដូចគ្នានេះ យានយន្តគ្រប់ប្រភេទដែលមកបង់ពន្ធមានចំនួន៨.៩៨២គ្រឿង ទទួលបានថវិកាចំណូល៣.៩០៦.០៤០.០០០លានរៀល ។ ដូច្នេះ បើធៀបនឹងឆ្នាំ២០១៥ សម្រាប់ឆ្នាំ២០១៦ ចំនួនយានយន្តបានកើនឡើង១.០៦៥គ្រឿង និងកើនថវិកាប្រាក់ពន្ធ១.៤០៨លានរៀលផងដែរ » ។
លោកប្រធានសាខាពន្ធដារខេត្តបន្ថែមថា មិនចំពោះតែការបង់ពន្ធលើមធ្យោបាយយានយន្តប៉ុណ្ណោះទេ ក្នុងនោះការប្រមូលពន្ធលើអចលនវត្ថុផ្សេងៗ ក៏បានកើនឡើងក្នុងលក្ខណៈល្អប្រសើរជាងឆ្នាំមុនៗផងដែរ ។ កត្តាទាំងនេះដោយសារកិច្ចខិតខំប្រឹងប្រែងរបស់លោកអគ្គនាយកពន្ធដារ និងសហការល្អពីមន្ត្រីជំនាញក្រោមឱវាទគ្រប់លំដាប់ថ្នាក់នៃសាខាពន្ធដារក្នុងខេត្ត ក៏ដូចជាសាខាពន្ធដារនៅក្នុងព្រះរាជាណាចក្រកម្ពុជា ជាពិសេស ការយល់ដឹងរបស់ប្រជាពលរដ្ឋ មន្ត្រីរាជការក្នុងការចូលរួមបំពេញកាតព្វកិច្ចជាពលរដ្ឋល្អរស់នៅក្រោមដំបូលនៃច្បាប់រដ្ឋធម្មនុញ្ញ ។
លោកក៏បានសំណូមពរដល់ប្រជាពលរដ្ឋ និងមន្ត្រីរាជការគ្រប់លំដាប់ថ្នាក់ ក្នុងពេលអគ្គនាយកដ្ឋាន និងសាខាពន្ធដារប្រកាសពីយុទ្ធនាការបង់់ពន្ធប្រចាំឆ្នាំនីមួយៗលើមធ្យោបាយយានយន្តគ្រប់ប្រភេទ ក៏ដូចជាការបង់ពន្ធលើអចលនវត្ថ ុផ្សេងៗ មេត្តាចូលរួមដោយរួសរាន់ក្នុងការបំពេញកាតព្វកិច្ចរបស់ខ្លួន ចៀសវាងដល់ថ្ងៃបញ្ចប់ទើបនាំគ្នាសម្រុកមកបង់ពន្ធ ហើយពេលមន្ត្រីជំនាញធ្វើជូនមិនទាន់ បណ្តាលឱ្យមានការខឹងសម្បា ។
លោកបញ្ជាក់ថា ការទទួលបង់ពន្ធយានយន្តប្រចាំឆ្នាំជាលក្ខណៈធម្មតាត្រូវបានបញ្ចប់ក៏ពិតមែន ប៉ុន្តែការចូលខ្លួនមកបង់ពន្ធដែលត្រូវទទួលការផាកពិន័យ សាខាពន្ធដារខេត្តក៏មានមន្ត្រីជំនាញរង់ចាំទទួលជាប្រចាំ ដើម្បីបំពេញបែបបទជូនដល់បងប្អូនប្រជាពលរដ្ឋ មន្ត្រីរាជការរៀងរាល់ម៉ោងធ្វើការ ។ រហូតមកទល់ពេលនេះ ក៏នៅមានអ្នកមកបង់ពន្ធប្រចាំឆ្នាំ ដោយទទួលយកការផាកពិន័យដែលច្បាប់បានកំណត់ជាបន្តបន្ទាប់ផងដែរ ៕
ចែករំលែកព័តមាននេះ